കൊച്ചി: പൃഥ്വിരാജ്, ആസിഫ് അലി, അപര്ണ്ണ ബാലമുരളി എന്നിവരെ കേന്ദ്ര കഥാപാത്രങ്ങളാക്കി ഷാജി കൈലാസ് സംവിധാനം ചെയ്ത ‘കാപ്പ’യുടെ ട്രെയിലര് റിലീസ് ചെയ്തു. ‘കോട്ട മധു’വായി പൃഥ്വിരാജ് എത്തുന്ന ചിത്രം ജിനു വി ഏബ്രഹാം, ഡോള്വിന് കുര്യാക്കോസ്, ദിലീഷ് നായര് എന്നിവരുടെ പങ്കാളിത്തത്തില് ആരംഭിച്ച തിയറ്റര് ഓഫ് ഡ്രീംസ്, ഫെഫ്ക റൈറ്റേഴ്സ് യൂണിയന്റെ സഹകരണത്തിലാണ് നിര്മ്മിച്ചത്. ജി ആര് ഇന്ദുഗോപന്റെതാണ് തിരക്കഥ.
തിരുവനന്തപുരം നഗരത്തിലെ അധോലോകത്തിന്റെ കഥ പറയുന്ന ഇന്ദുഗോപന്റെ പ്രശസ്ത നോവല് ‘ശംഖുമുഖി’യെ ആസ്പദമാക്കിയാണ് ചിത്രം ഒരുക്കിയത്. ദേശീയ പുരസ്ക്കാര ജേത്രി അപര്ണ ബാലമുരളിയാണ് ചിത്രത്തിലെ നായിക. മഞ്ജു വാര്യര്, അന്ന ബെന്, ഇന്ദ്രന്സ്, നന്ദു, ദിലീഷ് പോത്തന്, ജഗദീഷ് എന്നിവരാണ് മറ്റ് താരങ്ങള്. ഇവര്ക്ക് പുറമെ അറുപതോളം നടീനടന്മാരും അണിനിരക്കുന്നു. മാസ്സ് ആക്ഷന് രംഗങ്ങളോടെ എത്തുന്ന ‘കാപ്പ’ ബിഗ് ബഡ്ജറ്റ് ചിത്രമാണ്.
പൃഥ്വിരാജ് ചിത്രം ‘കടുവ’ക്ക് ശേഷം പൃഥ്വിരാജ്- ഷാജി കൈലാസ് കൂട്ടുകെട്ടിലെത്തുന്ന ‘കാപ്പ’ വന് പ്രതീക്ഷയോടെയാണ് പ്രേക്ഷകര് നോക്കികാണുന്നത്. നേരത്തെ പുറത്തുവിട്ട ടീസര് വലിയ രീതിയില് സ്വീകാര്യത നേടിയിരുന്നു. ഗ്യാങ്സ്റ്റര് ഡ്രാമ വിഭാഗത്തില് പെടുന്ന ചിത്രം തിരുവനന്തപുരം പശ്ചാത്തലമാക്കിയാണ് ഒരുക്കിയിരിക്കുന്നത്. പൃഥ്വിരാജിനോടൊപ്പം അപര്ണ ബാലമുരളി എത്തുന്ന ആദ്യ ചിത്രം എന്ന പ്രത്യേകത ചിത്രത്തിനുണ്ട്.
ജോമോന് ടി ജോണ് ഛായാഗ്രഹണവും ഷമീര് മുഹമ്മദ് ചിത്രസംയോജനവും നിര്വ്വഹിച്ച ചിത്രത്തിന് ജസ്റ്റിന് വര്ഗീസാണ് സംഗീതം പകര്ന്നിരിക്കുന്നത്. കലാസംവിധാനം: ദിലീപ് നാഥ്, വസ്ത്രാലങ്കാരം: സമീറ സനീഷ്, സ്റ്റില്സ്: ഹരി തിരുമല, ഡിസൈന്: ഓള്ഡ് മങ്ക്സ്, പ്രൊഡക്ഷന് കണ്ട്രോളര്: സഞ്ജു വൈക്കം, അനില് മാത്യു, അസോസിയേറ്റ് ഡയറക്ടര്: മനു സുധാകരന്, പ്രൊമോഷന് കണ്സള്ട്ടന്റ്- വിപിന് കുമാര്.
