കൊച്ചി: കുഞ്ചാക്കോ ബോബന് വ്യത്യസ്ത ഗെറ്റപ്പിലെത്തുന്ന ബിഗ് ബജറ്റ് ചിത്രം ‘ന്നാ താന് കേസ് കൊട്’ എന്ന ചിത്രത്തിന്റെ കൗതുകം നിറഞ്ഞ പോസ്റ്റര് പുറത്തിറങ്ങി. ചീമേനി മാന്വല് എന്ന ദിനപ്പത്രത്തില് വന്ന ഫുള് പേജ് വാര്ത്തയുടെ മാതൃകയിലുള്ള ഒഫീഷ്യല് പോസ്റ്ററിന് വലിയ അളവിലുള്ള സ്വീകാര്യതയാണ് സോഷ്യല് മീഡിയാ ഇടങ്ങളില് ലഭിച്ചുകൊണ്ടിരിക്കുന്നത്.
‘എം എല് എയുടെ വീട്ടില് കയറിയ മോഷ്ടാവിനെ പട്ടി കടിച്ചു, നാട്ടുകാര് പിടിച്ചുകെട്ടി പോലീസില് ഏല്പ്പിച്ചു’ എന്ന തലക്കെട്ടോടുകൂടിയ വാര്ത്തയ്ക്കൊപ്പം മലയാളികള് മുന്പെങ്ങും കാണാത്ത ദൈന്യഭാവത്തോടെ, പിന്കാലിലെ മുറിവ് ഡ്രസ് ചെയ്തുകൊണ്ടുള്ള ചാക്കോച്ചന്റെ നില്പ്പും ഭാവവും ആരിലും ചിരിയുണര്ത്തും. മോഷ്ടാവായ നായകന്റെ നിലവിലെ അവസ്ഥ പത്രവാര്ത്താരൂപത്തില് വ്യക്തമാക്കുന്നതിനൊപ്പം ചിത്രത്തിന്റെ ഔദ്യോഗിക റീലീസ് തിയ്യതിയും പോസ്റ്ററിലൂടെ പ്രഖ്യാപിക്കുകയുണ്ടായി. ആഗസ്റ്റ് 12ന് കേരളമെമ്പാടുമുള്ള തിയേറ്ററുകളില് ചിത്രം റിലീസ് ചെയ്യും.
എസ് ടി കെ ഫ്രെയിംസിന്റെ ബാനറില് പ്രശസ്ത നിര്മ്മാതാവ് സന്തോഷ്. ടി കുരുവിള നിര്മ്മാണവും കുഞ്ചാക്കോ ബോബന് പ്രൊഡക്ഷന്സ്, ഉദയ പിക്ചേഴ്സ് എന്നീ ബാനറുകളുടെ കീഴില് കുഞ്ചാക്കോ ബോബന് സഹനിര്മ്മാണവും നിര്വ്വഹിക്കുന്ന ‘ന്നാ താന് കേസ് കൊട്’ ഹാസ്യപശ്ചാത്തലത്തിലാണ് അവതരിപ്പിക്കുന്നത്. ‘ആന്ഡ്രോയ്ഡ് കുഞ്ഞപ്പന്’ എന്ന ജനപ്രിയ ചിത്രത്തിന്റെ സംവിധായകന് രതീഷ് ബാലകൃഷ്ണന് പൊതുവാളാണ് ചിത്രത്തിന്റെ രചനയും സംവിധാനവും നിര്വഹിക്കുന്നത്.
ഷെറിന് റേച്ചല് സന്തോഷ് ആണ് ചിത്രത്തിന്റെ മറ്റൊരു സഹ നിര്മ്മാതാവ്. കുഞ്ചാക്കോ ബോബനാണ് ചിത്രത്തില് കേന്ദ്ര കഥാപാത്രത്തെ അവതരിപ്പിക്കുന്നത്. സൂപ്പര് ഡീലക്്സ്, വിക്രം എന്നീ ചിത്രങ്ങളിലൂടെ പ്രശസ്തയായ തമിഴ് നടി ഗായത്രി ശങ്കര് അഭിനയിക്കുന്ന ആദ്യ മലയാള ചലച്ചിത്രം കൂടിയാണ് ഇത്. ബേസില് ജോസഫ്, ഉണ്ണിമായ തുടങ്ങിയവരാണ് ചിത്രത്തിലെ മറ്റ് പ്രധാന താരങ്ങള്.
ആറ് മാസത്തോളം നീണ്ടുനിന്ന പ്രീ പ്രൊഡക്ഷന് ജോലികളാണ് ചിത്രത്തിന് വേണ്ടി അണിയറ പ്രവര്ത്തകരും നിര്മ്മാതാക്കളും നടത്തിയത്. കാസര്ഗോഡന് ഗ്രാമങ്ങളുടെ പശ്ചാത്തലത്തില് വികസിക്കുന്ന ഈ സിനിമയ്ക്കായി വന് മുന്നൊരുക്കങ്ങള് നടത്തേണ്ടി വന്നിരുന്നു. നിരവധി കലാകാരന്മാരെ ഈ പ്രദേശങ്ങളില് നിന്ന് തന്നെ കാസ്റ്റിംഗ് കോളുകളിലൂടെ കണ്ടെത്തുകയും അവരെ പരിശീലന കളരികളിലൂടെ തിരഞ്ഞെടുക്കുകയും ചെയ്തതിന് ശേഷം സിനിമയുടെ ഒരു ചെറുരൂപം ഈ കലാകാരന്മാരെ വെച്ച് മാത്രം യഥാര്ഥ സിനിമയുടെ ചിത്രീകരണത്തിന് മുന്പേ തന്നെ നടത്തിയിരുന്നു. അറുപത് ദിവസത്തോളം നീണ്ടുനിന്ന ചിത്രീകരണത്തിനായി കാസര്ഗോഡ് ജില്ലയിലെ അഞ്ച് ഗ്രാമങ്ങളിലായി പത്തോളം ലൊക്കേഷനുകള് ഉപയോഗിച്ചിരുന്നു.
ബോളിവുഡ് ഛായാഗ്രാഹകന് രാകേഷ് ഹരിദാസാണ് (ഷേര്ണി ഫെയിം) ഈ ചിത്രത്തിന്റെ ഛായാഗ്രഹണം നിര്വഹിക്കുന്നത്. മനോജ് കണ്ണോത്ത് ചിത്രസംയോജനവും ജോതിഷ് ശങ്കര് കലാസംവിധാനവും നിര്വഹിക്കുന്നു. വൈശാഖ് സുഗുണന് രചിച്ച വരികള്ക്ക് ഡോണ് വിന്സെന്റ് സംഗീതം ഒരുക്കുന്നു. ചീഫ് അസോസിയേറ്റ് ഡയറക്ടര്: സുധീഷ് ഗോപിനാഥ്, ക്രിയേറ്റീവ് പ്രൊഡ്യൂസര്: അരുണ് സി തമ്പി, സൗണ്ട് ഡിസൈനിങ്: ശ്രീജിത്ത് ശ്രീനിവാസന്, സൗണ്ട് മിക്സിംഗ്: വിപിന് നായര്, കോസ്റ്റിയൂം: മെല്വി. ജെ, മേയ്ക്കപ്പ്: ഹസ്സന് വണ്ടൂര്, പ്രൊഡക്ഷന് കണ്ട്രോളര്: ബെന്നി കട്ടപ്പന, കാസ്റ്റിംഗ് ഡയറക്ടര്: രാജേഷ് മാധവന്, പ്രൊഡക്ഷന് എക്സിക്യൂട്ടീവ്: ജംഷീര് പുറക്കാട്ടിരി, ഫിനാന്സ് കണ്ട്രോളര്: ജോബീഷ് ആന്റണി, സ്റ്റില്സ്: ഷാലു പേയാട്, പരസ്യകല: ഓള്ഡ് മങ്ക്സ്, പി ആര് ഒ: മഞ്ജു ഗോപിനാഥ്, മാര്ക്കറ്റിംഗ്: ഹെയിന്സ്.
