തിരുവനന്തപുരം: മുഖ്യമന്ത്രിയുടെ മുന് പ്രിന്സിപ്പല് സെക്രട്ടറി സസ്പെന്ഷനിലായ എം ശിവശങ്കറിനെ തിരിച്ചെടുക്കാന് ശുപാര്ശ. സസ്പെന്ഷന് കാലാവധി തീര്ന്നതോടെയാണ് തീരുമാനം. ചീഫ് സെക്രട്ടറി അധ്യക്ഷനായ സമിതിയുടേതാണ് തീരുമാനം. ശുപാര്ശയിന്മേല് മുഖ്യമന്ത്രിയാണ് തീരുമാനമെടുക്കുക.
സ്വര്ണക്കടത്തുകേസിലെ പ്രതികളുമായുള്ള അടുപ്പവും സ്വപ്ന സുരേഷിനെ സര്ക്കാര് ഓഫീസില് നിയമിച്ചത് ശിവശങ്കറിന്റെ അറിവോടെയായിരുന്നു എന്ന വെളിപ്പെടുത്തലിന്റെയും അടിസ്ഥാനത്തിലായിരുന്നു ശിവശങ്കറിനെ സസ്പെന്റ് ചെയ്തത്. ചീഫ് സെക്രട്ടറി, ധനകാര്യ അഡീഷനല് ചീഫ് സെക്രട്ടറി എന്നിവരടങ്ങിയ സമിതിയുടെ റിപ്പോര്ട്ടിന്റെ അടിസ്ഥാനത്തിലായിരുന്നു 2020 ജൂലൈ 16ന് ശിവശങ്കറിനെ സസ്പെന്ഡ് ചെയ്തത്. 2023 ജനുവരി വരെ ശിവശങ്കറിനു സര്വീസ് ശേഷിക്കുന്നുണ്ട്. സ്വര്ണക്കടത്തുമായി ബന്ധപ്പെട്ട് എന്ഫോഴ്സ്മെന്റ് ഡയറക്ടറേറ്റും കസ്റ്റംസും രജിസ്റ്റര് ചെയ്ത കേസുകളില് പ്രതിയാണ് ശിവശങ്കര്.
സ്വര്ണ്ണക്കടത്തുമായി ബന്ധപ്പെട്ട് കള്ളപ്പണം വെളുപ്പിച്ചുവെന്ന കേസില് ഒക്ടോബര് 28നായിരുന്നു എം ശിവശങ്കറിനെ എന്ഫോഴ്സ്മെന്റ് ഡയറക്ടറേറ്റ് അറസ്റ്റ് ചെയ്തത്.
