തിരുവനന്തപുരം: രാഹുല് ഗാന്ധി എം പിയുടെ കല്പ്പറ്റയിലെ ഓഫീസിന് നേരെ നടത്തിയ സമരവും അക്രമവും അംഗീകരിക്കാനാവില്ലെന്ന് എസ് എഫ് ഐ സംസ്ഥാന പ്രസിഡന്റ് കെ അനുശ്രീയും സംസ്ഥാന സെക്രട്ടറി പി എം ആര്ഷോയും സംയുക്ത പ്രസ്താവനയില് പറഞ്ഞു.
സംരക്ഷിത വനമേഖലയുടെ ബഫര് സോണിനെ സംബന്ധിച്ചുള്ള സുപ്രിം കോടതിയുടെ ഉത്തരവുമായി ബന്ധപ്പെട്ട് ഉയര്ന്നുവന്ന വിഷയം ഏറ്റെടുത്ത് സമരം സംഘടിപ്പിക്കാന് എസ് എഫ് ഐയുടെ സംസ്ഥാന കമ്മിറ്റി തീരുമാനിച്ചിട്ടില്ല. രാഹുല് ഗാന്ധിയുടെ ഓഫീസിലേക്ക് എസ് എഫ് ഐ വയനാട് ജില്ലാ കമ്മിറ്റിയുടെ നേതൃത്വത്തില് സംഘടിപ്പിച്ച മാര്ച്ചിന് എസ് എഫ് ഐ സംസ്ഥാന നേതൃത്വത്തിന്റെ അറിവോ സമ്മതമോ ഉണ്ടായിരുന്നില്ല. ഇതുമായി ബന്ധപ്പെട്ട് എന്താണ് സംഭവിച്ചത് എന്ന് സംഘടനാപരമായി പരിശോധിച്ച് സമരത്തിന് നേതൃത്വം നല്കിയ പ്രവര്ത്തകര്ക്ക് നേരെ ശക്തവും മാതൃകാപരവുമായ സംഘടനാ നടപടി സ്വീകരിക്കുമെന്നും എസ് എഫ് ഐ അറിയിച്ചു.
ഒറ്റപ്പെട്ട ഈ സംഭവം ഉയര്ത്തിപ്പിടിച്ച് എസ് എഫ് ഐയെ മോശമായി ചിത്രീകരിക്കാനുള്ള വലതുപക്ഷത്തിന്റെ രാഷ്ട്രീയ അജണ്ട പൊതുസമൂഹവും വിദ്യാര്ഥികളും തിരിച്ചറിയണം. അവസരം മുതലെടുത്ത് എസ് എഫ് ഐയെ ആക്രമിക്കാനുള്ള വലതുപക്ഷ നീക്കത്തെ വിദ്യാര്ഥികളെ അണിനിരത്തി ചെറുത്തു തോല്പ്പിക്കുകയും ചെയ്യുമെന്നും അറിയിച്ചു.
