ദോഹ: ആറ് മാസം നീണ്ടുനില്‍ക്കുന്ന 2023-24 ശൈത്യകാല ക്യാമ്പിംഗ് സീസണിലേക്കുള്ള ബുക്കിംഗ് സ്പേസുകള്‍ക്കുള്ള രജിസ്ട്രേഷന് ഒക്ടോബര്‍ 22ന് ആരംഭിക്കും. ഒക്ടോബര്‍ 31 വരെയാണ് ക്യാമ്പിംഗ് റജിസ്‌ട്രേഷന്‍ അനുവദിക്കുക.
പരിസ്ഥിതി- കാലാവസ്ഥാ വ്യതിയാന മന്ത്രാലയത്തിന്റെ വെബ്‌സൈറ്റ് വഴി ഓണ്‍ലൈനായാണ് രജിസ്ട്രേഷന് നടത്തേണ്ടത്. സീസണ്‍ 2023 നവംബര്‍ ഒന്നിന് ആരംഭിച്ച് 2024 ഏപ്രില്‍ 30ന് അവസാനിക്കും.
ക്യാമ്പ് ചെയ്യുന്നതിനുള്ള സ്ഥലങ്ങള്‍ ബുക്കുചെയ്യുന്നതിനുള്ള രജിസ്ട്രേഷന് മൂന്ന് വ്യത്യസ്ത ഘട്ടങ്ങളിലായി നടത്തുമെന്ന് നാച്ചുറല്‍ റിസര്‍വ് ഡിപ്പാര്‍ട്ട്മെന്റ് ഡയറക്ടര്‍ സാലം ഹുസൈന്‍ അല്‍ സഫ്രാന്‍ പറഞ്ഞു.
സെന്‍ട്രല്‍ റീജിയണുകള്‍ക്കുള്ള രജിസ്ട്രേഷന് ഒക്ടോബര്‍ 22 മുതല്‍ 24 വരെയും തെക്കന്‍ മേഖലകളിലേക്കുള്ള രജിസ്ട്രേഷന് ഒക്ടോബര്‍ 25 മുതല്‍ 27 വരെയും നടക്കും. വടക്കന്‍ മേഖലകളില്‍ ഒക്ടോബര്‍ 28 മുതല്‍ 31 വരെ രജിസ്ട്രേഷന് നടക്കും.
2023 ഒക്ടോബര്‍ 22 മുതല്‍ 31 വരെ രാജ്യത്തുടനീളമുള്ള ക്യാമ്പിംഗ് ഏരിയകളിലെ കമ്മിറ്റി ഓഫീസുകളില്‍ ഓണ്‍ലൈന്‍ രജിസ്ട്രേഷനോട് അനുബന്ധിച്ച് വ്യക്തിഗത രജിസ്ട്രേഷനും മന്ത്രാലയം അനുവദിക്കും.
റിസര്‍വ് ചെയ്യാത്ത സ്ലോട്ടുകളുണ്ടെങ്കില്‍ ലഭ്യമായ ഇടങ്ങള്‍ക്ക് വിധേയമായി നേരിട്ട് ഹാജരാകുന്നതിനുള്ള രജിസ്ട്രേഷന് പ്രക്രിയ 2023 നവംബര്‍ 1 മുതല്‍ 10 വരെ നടത്താനാവും. അപേക്ഷയ്ക്ക് അംഗീകാരം സ്ഥിരീകരിക്കുന്ന ടെക്സ്റ്റ് സന്ദേശം ലഭിച്ച് ആറ് മണിക്കൂറിനുള്ളില്‍ പെര്‍മിറ്റ് ഉടമ പെര്‍മിറ്റ് ഫീസും ഇന്‍ഷുറന്‍സ് ഫീസും അടയ്ക്കണം. അല്ലെങ്കില്‍, അപേക്ഷ അസാധുവായി കണക്കാക്കുകയും വീണ്ടും രജിസ്ട്രേഷന് ആവശ്യമായി വരികയും ചെയ്യും. ക്യാമ്പിംഗിനായുള്ള വ്യവസ്ഥകളും ആവശ്യകതകളും മന്ത്രാലയം അപ്‌ഡേറ്റ് ചെയ്തിട്ടുണ്ട്.
