അക്ഷരമുറ്റത്തായെത്തുന്നു കുരുന്നുകള്‍
ജ്ഞാനത്തിന്‍ ചിറകിലേറുവാനുള്ളവര്‍
കുഞ്ഞിളം ബാല്യങ്ങള്‍ നിഷ്‌കളങ്ക രൂപമാം
വിദ്യയെന്നക്ഷര വാടിയിലായവര്‍
ഗുരുനാവില്‍നിന്നെത്തുന്ന വാക്കിലെ മര്‍മരം
കുഞ്ഞിളം കിളികളെ തഴുകി തലോടവെ
മധുനുകരുമാം പറവയെപോലെയാണെങ്കിലും
അക്ഷരസ്‌നേഹിയായ് മാറുന്നു ബാല്യങ്ങള്‍
ഗുരു ചൊല്ലുന്നത് വേദവാക്യങ്ങളായ്
ആദ്യാക്ഷരമേറ്റ് പറഞ്ഞു തുടങ്ങുന്നു
വിദ്യയെന്നുള്ള സുകൃതത്തിലാറാടവെ
അക്ഷരജ്യോതിയില്‍ വെളിച്ചമാകുവാന്‍
ഉല്‍സുകരായി നില്‍ക്കുന്നു ബാല്യങ്ങള്‍
നന്മയും തിന്മയും വേര്‍തിരിച്ചീടുവാന്‍
വിദ്യയാല്‍ അകതാരില്‍ പ്രഭയാകവെ
ഇരുട്ടിനെ മറച്ചു പകല്‍ വരും പോലെ
വെളിച്ചമായ് നിറയുന്നു അറിവിന്‍ കൂമ്പാരങ്ങള്‍
അറിവിന്‍ സാഗരത്തിലാറാടുവാന്‍
ഗുരുവിനിഷ്ടത്തിന്‍ തൃപ്തിയും നേടണം.
