തിരുവനന്തപുരം: ഒരു വിഭാഗത്തിനെതിരെ വിദ്വേഷ പ്രസംഗം നടത്തിയ പി സി ജോര്ജിന്റെ നടപടി അങ്ങേയറ്റം പ്രതിഷേധാര്ഹമാണെന്ന് സി പി എം. കേരളത്തില് വര്ഗീയ ധ്രുവീകരണം സൃഷ്ടിക്കുന്നതിനുള്ള എല്ലാവിധ പരിശ്രമങ്ങളെയും ജനങ്ങള് ഒറ്റക്കെട്ടായി നിന്ന് നേരിടണമെന്നും സി പി എം സംസ്ഥാന സെക്രട്ടേറിയറ്റിന്റെ പ്രസ്താവനയില് പറഞ്ഞു.
തിരുവനന്തപുരത്ത് നടന്ന അനന്തപുരി ഹിന്ദു മഹാ സംഗമമെന്ന പരിപാടിയിലാണ് പി സി ജോര്ജ് ഒരു മതവിഭാഗത്തിനെതിരെ തെറ്റായ പ്രചരണവുമായി രംഗത്ത് വന്നിട്ടുള്ളത്. കേരളത്തില് വര്ഗീയ ധ്രുവീകരണം നടത്തുന്നതിന് എല്ലാ വര്ഗീയ വാദികളും ബോധപൂര്വ്വമായ പദ്ധതികള് നടപ്പിലാക്കുന്ന ഘട്ടത്തിലാണ് ഇത്തരമൊരു പ്രസംഗം പുറത്തു വന്നിട്ടുള്ളത്.
ഇദ്ദേഹത്തിന്റെ സാധാരണ വിടുവായിത്തങ്ങളായി ഇതിനെ തള്ളിക്കളയാനാകില്ല. പ്രസ്താവന പിന്വലിച്ച് അദ്ദേഹം കേരളീയ സമൂഹത്തോട് മാപ്പ് പറയാന് തയ്യാറാവണമെന്നും സി പി എം പ്രസ്താവനയില് കൂട്ടിച്ചേര്ത്തു.
ഹിന്ദു മഹാപരിഷത്ത് തിരുവനന്തപുരത്ത് നടത്തിയ അനന്തപുരി ഹിന്ദു മഹാസമ്മേളനം ഉദ്ഘാടനം ചെയ്യുമ്പോഴാണ് പി സി ജോര്ജ് വിവാദ പ്രസംഗം നടത്തിയത്.
പി സി ജോര്ജ്ജിന്റെ പ്രസംഗത്തിനെതിരെ യൂത്ത് ലീഗ് സംസ്ഥാന ജനറല് സെക്രട്ടറി പി കെ ഫിറോസ് ഡി ജി പിക്കും മുഖ്യമന്ത്രിക്കും പരാതി നല്കിയിട്ടുണ്ട്.
