കോഴിക്കോട്:
എന്ഫോഴ്സ്മെന്റ് ഡയറക്ടറേറ്റ് (ഇ.ഡി) കേരളത്തില് റെയ്ഡുകള് നടത്തി പോപുലര് ഫ്രണ്ട് ഓഫ് ഇന്ത്യയുമായി ബന്ധമുള്ള മൂന്നുപേര്ക്കെതിരെ മൊഴി നല്കിയത് പകപോക്കല് രാഷ്ട്രീയത്തിന്റെ ഭാഗമാണെന്ന് പോപുലര് ഫ്രണ്ട് ഓഫ് ഇന്ത്യ ജനറല് സെക്രട്ടറി അനീസ് അഹമ്മദ് വാര്ത്താക്കുറിപ്പില് അറിയിച്ചു. ഇ.ഡി നടത്തിയ റെയ്ഡുകളും പിന്നീട് പുറത്തിറക്കിയ വാര്ത്താക്കുറിപ്പിലെ അവകാശവാദങ്ങളും അടിസ്ഥാനരഹിതവും അധാര്മ്മികവും ദുരുദ്ദേശപരവുമാണ്. വന്കിട ബിസിനസ് തട്ടിപ്പുകളെയെല്ലാം തഴച്ചുവളരാന് അനുവദിക്കുമ്പോള് തന്നെ ചെറുതും വലുതുമായ സത്യസന്ധരായ മുസ്ലിം ബിസിനസുകാരെ വേട്ടയാടാന് ഇ.ഡിയെ വിന്യസിക്കുന്നത് സംഘപരിവാറിന്റെ വര്ഗീയ അജണ്ടയാണ്. കേരളത്തിലെ ബി.ജെ.പി നേതാക്കളുടെ 400 കോടിയുടെ കള്ളപ്പണ ഇടപാടുകള് അന്വേഷിക്കാന് താല്പ്പര്യമില്ലാത്ത ഇ.ഡിയാണ് ഇപ്പോള് നിയമാനുസൃതമായി പ്രവര്ത്തിക്കുന്ന മുസ്ലിം ബിസിനസുകള്ക്ക് പിന്നാലെ പോകുന്നതെന്നും അനീസ് അഹമദ് കുറ്റപ്പെടുത്തി.
