മനാമ: കഴിഞ്ഞ മൂന്ന് വര്‍ഷത്തെ ഭരണ നേട്ടങ്ങളുമായാണ് ഇന്ത്യന്‍ സ്‌കൂള്‍ ഭരണ സമിതി ആസന്നമായ തെരഞ്ഞെടുപ്പിനെ നേരിടുന്നതെന്ന് ഇന്ത്യന്‍ സ്‌കൂള്‍ അധികൃതര്‍ നടത്തിയ വാര്‍ത്താസമ്മേളനത്തില്‍ അറിയിച്ചു.
ഇന്ത്യന്‍ സ്‌കൂള്‍ ചെയര്‍മാന്‍ അഡ്വ. ബിനു മണ്ണില്‍ വറുഗീസ്, സെക്രട്ടറി വി രാജപാണ്ട്യന്‍, അസിസ്റ്റന്റ് സെക്രട്ടറിയും അക്കാദമിക അംഗവുമായ രഞ്ജിനി മോഹന്‍, ഫിനാന്‍സ് ആന്റ് ഐ ടി അംഗം ബോണി ജോസഫ്, പ്രോജക്ട് ആന്‍ഡ് മെയിന്റനന്‍സ് അംഗം മിഥുന്‍ മോഹന്‍, അംഗം ബിജു ജോര്‍ജ്, ട്രാന്‍സ്പോര്‍ട് അംഗം മുഹമ്മദ് നയാസ് ഉല്ല, പ്രിന്‍സിപ്പല്‍ ശാന്ത കുമാര്‍ ദസരി എന്നിവര്‍ പത്ര സമ്മേളനത്തില്‍ പങ്കെടുത്തു.
സ്‌കൂള്‍ ഭരണസമിതി കൈവരിച്ച നേട്ടങ്ങളും നാഴികക്കല്ലുകളും അഡ്വ. ബിനു മണ്ണില്‍ വറുഗീസ് വിശദീകരിച്ചു. നിലവിലെ ഭരണസമിതി അതിന്റെ കാലാവധി പൂര്‍ത്തിയാകുമ്പോള്‍ വരുന്ന വാര്‍ഷിക പൊതുയോഗത്തിനും പുതിയ ഭരണസമിതിയുടെ തെരഞ്ഞെടുപ്പിനും തയ്യാറെടുക്കുകയാണ്. വാര്‍ഷിക പൊതുയോഗവും തെരഞ്ഞെടുപ്പും ഡിസംബര്‍ 11നു നടത്താനുള്ള അനുമതിക്കായി ബന്ധപ്പെട്ട മന്ത്രാലയത്തെ സമീപിച്ചിട്ടുണ്ടെന്ന് സ്‌കൂള്‍ അധികൃതര്‍ പറഞ്ഞു.
ഒരു വര്‍ഷം നീണ്ട പ്ലാറ്റിനം ജൂബിലി ആഘോഷങ്ങള്‍ ഈ കാലഘട്ടത്തിലെ ഏറ്റവും അവിസ്മരണീയമായ നാഴികക്കല്ലുകളില്‍ ഒന്നാണ്. 2025 ജനുവരി 23ന് വിദ്യാഭ്യാസ മന്ത്രാലയം, ഇന്ത്യന്‍ എംബസി, പൗരപ്രമുഖര്‍ എന്നിവരുടെ സാന്നിധ്യത്തില്‍ ഔപചാരികമായി ഉദ്ഘാടനം ചെയ്യപ്പെട്ട ആഘോഷങ്ങള്‍ സ്ഥാപനത്തിന്റെ സമ്പന്നമായ പൈതൃകം, വിദ്യാഭ്യാസ മികവിനോടുള്ള പ്രതിബദ്ധത എന്നിവ പ്രദര്‍ശിപ്പിച്ചു.
ബഹ്റൈന്‍ വിദ്യാഭ്യാസ, പരിശീലന ഗുണനിലവാര അതോറിറ്റിയുടെ ‘ഗുഡ്’ റേറ്റിംഗ് കൈവരിച്ചതാണ് ഒരു പ്രധാന നേട്ടം. അക്കാദമിക നിലവാരം ശക്തിപ്പെടുത്തുന്നതിനും അധ്യാപന, പഠന രീതികള്‍ മെച്ചപ്പെടുത്തുന്നതിനും സ്‌കൂള്‍ പ്രവര്‍ത്തനങ്ങളുടെ എല്ലാ മേഖലകളിലും ഗുണനിലവാരം നിലനിര്‍ത്തുന്നതിനുമുള്ള സ്‌കൂളിന്റെ പ്രതിബദ്ധതയെ ഈ അംഗീകാരം അടിവരയിടുന്നു.
സ്മാര്‍ട്ട് ക്ലാസ് റൂം പ്രോജക്ട് ആരംഭിച്ചതോടെ സാങ്കേതികവിദ്യാധിഷ്ഠിത വിദ്യാഭ്യാസത്തിന് വലിയ ഉത്തേജനം ലഭിച്ചു. സെയ്ന്‍ ബഹ്റൈനുമായി സഹകരിച്ച് ഏകദേശം 400,000 ദിനാര്‍ ചെലവില്‍ 350 നൂതന ഇന്ററാക്ടീവ് ഡിജിറ്റല്‍ പാനലുകള്‍ ഉപയോഗിച്ച് സ്‌കൂള്‍ ക്ലാസ് മുറികള്‍ സജ്ജീകരിച്ചു. ഡി സി പാരന്റ് ആപ്പ് വഴി സ്‌കൂള്‍ ഒരു പുതിയ തത്സമയ സ്‌കൂള്‍ ബസ് ട്രാക്കിംഗ് സൗകര്യം സൗജന്യമായി അവതരിപ്പിച്ചു. 2026 ഒക്ടോബര്‍ 1 മുതല്‍ റിഫ കാമ്പസില്‍ ആദ്യമായി അവതരിപ്പിച്ച പുതിയ സൗകര്യം, പിന്നീട് ഇസ ടൗണ്‍ കാമ്പസിലേക്കും വ്യാപിപ്പിക്കും.
പ്രൈമറി തലത്തില്‍ ജിജ്ഞാസ, ശാസ്ത്രബോധം, പഠനത്തോടുള്ള ഇഷ്ടം എന്നിവ വളര്‍ത്തിയെടുക്കുക എന്ന ലക്ഷ്യത്തോടെ റിഫ കാമ്പസില്‍ സയന്‍സ് എക്‌സ്‌പ്ലോര്‍ മുറികള്‍ സ്ഥാപിച്ചു. പരിസ്ഥിതി സുസ്ഥിരതയിലേക്കുള്ള മറ്റൊരു പ്രധാന ചുവടുവയ്പില്‍ കാനൂ ക്ലീന്‍മാക്‌സ് റിന്യൂവബിള്‍സ് അസറ്റ്‌കോ കമ്പനിയുമായി സഹകരിച്ച് ഇസ ടൗണ്‍, റിഫ കാമ്പസുകളില്‍ ഒരു സൗരോര്‍ജ്ജ പദ്ധതി വിജയകരമായി നടപ്പിലാക്കി. സ്‌കൂള്‍ കണക്ട് സംരംഭത്തിന് കീഴില്‍ ഇന്ത്യന്‍ ഇന്‍സ്റ്റിറ്റ്യൂട്ട് ഓഫ് ടെക്‌നോളജി (ഐ ഐ ടി മദ്രാസ്)യുമായുള്ള സഹകരണത്തിലൂടെ സ്‌കൂളിന്റെ അക്കാദമിക വ്യാപനം കൂടുതല്‍ ശക്തിപ്പെടുത്തി.
സ്‌കൂള്‍ സേവനങ്ങളുടെ ആധുനികവത്ക്കരണത്തിനും എക്‌സിക്യൂട്ടീവ് കമ്മിറ്റി മുന്‍ഗണന നല്‍കി. ക്രെഡിറ്റ് കാര്‍ഡ്/ ഡെബിറ്റ് കാര്‍ഡ്/ ബെനിഫിറ്റ് സൗകര്യം ഉപയോഗിച്ചുള്ള എ എഫ് എസ് പി ഒ എസ് മെഷീനുകളും എ എഫ് എസ് ഓണ്‍ലൈന്‍ പേയ്മെന്റുകളും ഉള്‍പ്പെടെയുള്ള ഓണ്‍ലൈന്‍ ഫീസ് പേയ്മെന്റ് സൗകര്യങ്ങള്‍ അവതരിപ്പിച്ചത് ഇടപാടുകള്‍ കൂടുതല്‍ സൗകര്യപ്രദമാക്കി.
അക്കാദമിക് മികവ് സ്ഥാപനത്തിന്റെ മുന്‍ഗണനകളില്‍ പ്രധാനമായിരുന്നു. ഈ വര്‍ഷത്തെ സി ബി എസ് ഇ പരീക്ഷാ ഫലങ്ങള്‍ മികച്ചതായിരുന്നു. പത്താം ക്ലാസ് 99.99 ശതമാനം വിജയശതമാനം രേഖപ്പെടുത്തി. ഹര്‍ഷ് ബാബര്‍വാള്‍ 500ല്‍ 498 മാര്‍ക്കുമായി സ്‌കൂള്‍ ടോപ്പറായി ഉയര്‍ന്നു.
പന്ത്രണ്ടാം ക്ലാസില്‍, സ്‌കൂള്‍ ശ്രദ്ധേയമായ 98.09 ശതമാനം വിജയശതമാനം നേടി. ജിസെല്‍ ഷാരോണ്‍ ഫെര്‍ണാണ്ടസ് 488 മാര്‍ക്കുമായി സ്‌കൂള്‍ ടോപ്പറായി. ഇരുപത്തിയൊന്ന് വിദ്യാര്‍ഥികള്‍ എല്ലാ വിഷയങ്ങളിലും എ1 ഗ്രേഡുകള്‍ നേടി, 52 വിദ്യാര്‍ഥികള്‍ 90 ശതമാനത്തിന് മുകളില്‍ നേടി.
നേരത്തെ അക്കാദമിക് മികവിനുള്ള 11 സി ബി എസ് ഇ ഗള്‍ഫ് സഹോദയ അവാര്‍ഡുകളില്‍ 7 എണ്ണവും ഇന്ത്യന്‍ സ്‌കൂള്‍ നേടിയിരുന്നു. ആറ് സ്‌കൗട്ടുകളും 13 ഗൈഡുകളും അടങ്ങുന്ന 19 വിദ്യാര്‍ഥികള്‍ ഭാരത് സ്‌കൗട്ട്‌സ് ആന്‍ഡ് ഗൈഡ്സ് പ്രസ്ഥാനത്തിലൂടെ അഭിമാനകരമായ രാജ്യ പുരസ്‌കാര്‍ അവാര്‍ഡ് നേടി. 2016ല്‍ സ്‌കൂള്‍ സ്‌കൗട്ട്‌സ് ആന്‍ഡ് ഗൈഡ്സ് ആരംഭിച്ചതിനുശേഷം ഈ വിശിഷ്ട അംഗീകാരത്തിന് യോഗ്യത നേടുന്ന ബഹ്റൈനില്‍ നിന്നുള്ള ആദ്യ ബാച്ചാണിത്. ഇന്റര്‍-സ്‌കൂള്‍, മത്സര കായിക ഇനങ്ങളിലും ഐ എസ് ബി വിദ്യാര്‍ഥികള്‍ മികവ് പുലര്‍ത്തി. അവരുടെ ദൃഢനിശ്ചയം, അച്ചടക്കം, ടീം സ്പിരിറ്റ് എന്നിവയിലൂടെ സ്‌കൂളിന് പുരസ്‌കാരങ്ങള്‍ നേടിക്കൊടുത്തു.
നിര്‍ദ്ദിഷ്ട പ്ലാറ്റിനം ജൂബിലി കെട്ടിടത്തിനായി പൊതുയോഗത്തിന്റെ അംഗീകാരം അനുസരിച്ച്, ലെറ്റര്‍ ഓഫ് ഇന്റന്റ് നല്‍കാനും പൗലൈഡ്‌സ് കണ്‍സ്ട്രക്ഷന്‍ കമ്പനിയുമായി ഒരു നിര്‍മ്മാണ കരാറില്‍ ഏര്‍പ്പെടാനും ഭരണ സമിതി തീരുമാനിച്ചു. 48 വര്‍ഷത്തിലേറെ പഴക്കമുള്ള ടാഗോര്‍ കെട്ടിടത്തിന് പകരമായിരിക്കും പുതിയ പ്ലാറ്റിനം ജൂബിലി കെട്ടിടം ഉയരുക. കൊമേഴ്സ്യല്‍ രജിസ്‌ട്രേഷന്‍ നേടുന്നതിനുള്ള മന്ത്രാലയത്തിന്റെ നിര്‍ദ്ദേശങ്ങള്‍ക്കനുസൃതമായി സ്‌കൂള്‍ ഒരു സുപ്രധാന മാറ്റത്തിനു തയ്യാറെടുക്കുകയാണ്. ഒരു സി ആര്‍ നേടാനും സ്‌കൂളിന്റെ നിലവിലെ രക്ഷിതാക്കള്‍ അതിന്റെ ഉടമസ്ഥരാകുന്ന ഒരു ഭരണ ചട്ടക്കൂടിലേക്ക് നീങ്ങാനും ഇത് നിര്‍ദ്ദേശിക്കുന്നു.
പുതിയ ഭരണഘടന അനുസരിച്ചാണ് തെരഞ്ഞെടുപ്പ് നടക്കുക. ഭരണസമിതിയില്‍ തെരഞ്ഞെടുക്കപ്പെട്ട ഏഴ് അംഗങ്ങള്‍ ഉള്‍പ്പെടും. രണ്ട് കാമ്പസുകളിലെയും പ്രിന്‍സിപ്പല്‍മാരും സ്റ്റാഫ് പ്രതിനിധികളും എക്‌സ്-ഒഫീഷ്യോ അംഗങ്ങളായിരിക്കും. ഭരണസമിതിയിലേക്കുള്ള തെരഞ്ഞെടുപ്പ് പതിവുപോലെ മൂന്ന് വര്‍ഷത്തിലൊരിക്കല്‍ നടക്കും. ആവശ്യമായ സര്‍ക്കാര്‍ അംഗീകാരങ്ങള്‍ക്കും നിയന്ത്രണ ആവശ്യകതകള്‍ക്കും വിധേയമായി ക്രമീകരണങ്ങള്‍ നടപ്പിലാക്കും.
വിദ്യാഭ്യാസ മന്ത്രാലയം, ഇന്ത്യന്‍ എംബസി, സ്‌കൂള്‍ ഭരണകൂടം, അധ്യാപകര്‍, രക്ഷിതാക്കള്‍, വിദ്യാര്‍ഥികള്‍, പൂര്‍വ്വ വിദ്യാര്‍ഥികള്‍, വിശാലമായ ഇന്ത്യന്‍ സമൂഹം എന്നിവരോട് അവരുടെ തുടര്‍ച്ചയായ സഹകരണത്തിനും പിന്തുണക്കും ഭരണ സമിതി നന്ദി അറിയിച്ചു.
