കൊച്ചി: മലയാളത്തില് കലാമേന്മയുള്ളതും മികവുറ്റതുമായ ചിത്രങ്ങള് സമ്മാനിച്ച മമ്മൂട്ടി കമ്പനിയുടെ ബിഗ് ബഡ്ജറ്റഡ് ചിത്രം കണ്ണൂര് സ്ക്വാഡിന്റെ ട്രയ്ലര് മമ്മൂട്ടിയുടെ പിറന്നാള് ദിനത്തില് റിലീസായി. മമ്മൂട്ടി കമ്പനി നിര്മ്മിക്കുന്ന നാലാമത്തെ ചിത്രമാണ് കണ്ണൂര് സ്ക്വാഡ്.
‘നമ്മള് മനുഷ്യന്മാര് മാത്രമല്ലലോ പോലീസുകാര് കൂടിയല്ലേ’ മെഗാ സ്റ്റാര് മമ്മൂട്ടി നായകനാകുന്ന ചിത്രത്തിന്റെ ട്രയ്ലര് സമൂഹത്തില് നടന്ന പല കുറ്റകൃത്യങ്ങളും കുറ്റവാളികളെ കണ്ടെത്തിയ പരിശ്രമങ്ങളെയും ആസ്പദമാക്കി ഒരുങ്ങുന്ന റിയലിസ്റ്റിക് ഇന്വെസ്റ്റിഗേറ്റിങ് ത്രില്ലര് ആണെന്ന് സൂചിപ്പിക്കുന്നു.
നന്പകല് നേരത്തു മയക്കം, റോഷാക്ക്, കാതല് എന്നീ ചിത്രങ്ങള്ക്ക് ശേഷം മമ്മൂട്ടി കമ്പനി നിര്മ്മിക്കുന്ന ചിത്രം സംവിധാനം ചെയ്യുന്നത് റോബി വര്ഗീസ് രാജ് ആണ്. ചിത്രത്തിന്റെ കഥ എഴുതിയിരിക്കുന്നത് ഷാഫിയാണ്. തിരക്കഥ ഒരുക്കിയിരിക്കുന്നതു ഷാഫിയോടോപ്പം റോണി ഡേവിഡും ചേര്ന്നാണ്. എസ് ജോര്ജ് ആണ് ചിത്രത്തിന്റെ എക്സിക്യൂട്ടീവ് പ്രൊഡ്യൂസര്. ദുല്ഖര് സല്മാന്റെ ഉടമസ്ഥതയിലുള്ള വേഫെറര് ഫിലിംസ് ആണ് ചിത്രം കേരളത്തില് വിതരണം ചെയ്യുന്നത്.
മമ്മൂട്ടിയോടൊപ്പം കിഷോര്കുമാര്, വിജയരാഘവന്, അസീസ് നെടുമങ്ങാട്, ശബരീഷ്, റോണി ഡേവിഡ്, മനോജ്. കെ. യു, അര്ജുന് രാധാകൃഷ്ണന്, ദീപക് പറമ്പോല്, ധ്രുവന്, ഷെബിന് ബെന്സണ്, ശ്രീകുമാര് തുടങ്ങി നിരവധി താരങ്ങള് അണിനിരക്കുന്ന ചിത്രം തിയേറ്ററുകളിലേക്ക് ഉടനെത്തും.
കണ്ണൂര്, കാസര്ഗോഡ്, വയനാട്, എറണാകുളം, തിരുവനന്തപുരം, പാലാ, പൂനെ, മുംബൈ, ഉത്തര്പ്രദേശ്, മംഗളൂരു, ബെല്ഗാം, കോയമ്പത്തൂര് എന്നിവിടങ്ങളിലാണ് സിനിമയുടെ ചിത്രീകരണം നടന്നത്. മുഹമ്മദ് റാഹില് ഛായാഗ്രഹണം നിര്വഹിച്ച ചിത്രത്തിലെ ഗാനങ്ങള്ക്ക് സംഗീതം പകര്ന്നത് സുഷിന് ശ്യാമാണ്. എഡിറ്റിംഗ് കൈകാര്യം ചെയ്തത് പ്രവീണ് പ്രഭാകര്.
ഓവര്സീസ് വിതരണം: ട്രൂത്ത് ഗ്ലോബല് ഫിലിംസ്, ഡിസൈന്: ആന്റണി സ്റ്റീഫന്,ഡിജിറ്റല് മാര്ക്കറ്റിംഗ്: വിഷ്ണു സുഗതന്, പി ആര് ഒ: പ്രതീഷ് ശേഖര്.
