സീതയില്‍ നിന്ന് ഐ പി എസ് ഓഫീസറിലേക്ക്; മമ്മൂട്ടിക്കും ധനുഷിനുമൊപ്പം സായ് പല്ലവിയുടെ പുതിയ മുഖം: ‘ഒ എം’ ഈ വെള്ളിയാഴ്ച്ച പ്രദര്‍ശനത്തിന്

Web Desk
3 Min Read

കൊച്ചി: സ്വാഭാവിക അഭിനയത്തിലൂടെ തെന്നിന്ത്യന്‍ സിനിമയില്‍ തന്റേതായ ഇടം നേടിയ സായ് പല്ലവി വീണ്ടും പ്രേക്ഷകരെ വിസ്മയിപ്പിക്കാന്‍ ഒരുങ്ങുന്നു. ആഗോള ബോക്‌സ് ഓഫീസില്‍ 1400 കോടി കടന്ന രാമായണത്തിലെ സീതയായി ശ്രദ്ധ നേടിയ താരം ഇനി വെള്ളിത്തിരയില്‍ എത്തുന്നത് കരുത്തുറ്റ പൊലീസ് ഉദ്യോഗസ്ഥയുടെ വേഷത്തില്‍. മമ്മൂട്ടിയും ധനുഷും പ്രധാന കഥാപാത്രങ്ങളാകുന്ന രാജ്കുമാര്‍ പെരിയസാമി ചിത്രം ‘ഒ എം’ ആണ് സായ് പല്ലവിയുടെ ഈ പുതിയ കഥാപാത്രത്തിന് വേദിയാകുന്നത്. നവംബര്‍ 20ന് ആഗോളതലത്തില്‍ ചിത്രം തിയേറ്ററുകളിലെത്തും.

city exchange

ചിത്രത്തില്‍ നിത്യ റെഡ്ഡി ഐ പി എസ് എന്ന കഥാപാത്രത്തെയാണ് സായ് പല്ലവി അവതരിപ്പിക്കുന്നത്. അഭിനയജീവിതത്തില്‍ ആദ്യമായാണ് താരം പൊലീസ് ഉദ്യോഗസ്ഥയുടെ വേഷത്തിലെത്തുന്നത്. ചുവന്ന ചന്ദനക്കടത്ത് മാഫിയക്കെതിരെ നിര്‍ണായക ദൗത്യത്തിന് നേതൃത്വം നല്‍കുന്ന അന്വേഷണ ഉദ്യോഗസ്ഥയാണ് നിത്യ റെഡ്ഡി. കഥാപാത്രത്തിന്റെ രൂപഭാവത്തിനായി യഥാര്‍ഥ ഐ പി എസ് ഉദ്യോഗസ്ഥ മെറിന്‍ ജോസഫിന്റെ വ്യക്തിത്വത്തില്‍നിന്ന് പ്രചോദനം ഉള്‍ക്കൊണ്ടിട്ടുണ്ട്. കഥാപാത്രത്തിന്റെ പൂര്‍ണതയ്ക്കായി സായ് പല്ലവി മുടി മുറിച്ചുമാറ്റിയതും ശ്രദ്ധ നേടിയിരുന്നു. ഇതിനെക്കുറിച്ച് സംസാരിക്കവേ, മുടി മുറിച്ച വിവരം അറിഞ്ഞപ്പോള്‍ അമ്മയ്ക്ക് ആദ്യം വലിയ ഞെട്ടലായിരുന്നുവെന്നും താരം വെളിപ്പെടുത്തി.

‘പ്രേമം’ സിനിമയിലെ മലര്‍ മിസ് എന്ന കഥാപാത്രത്തിലൂടെ മലയാളികളുടെ ഹൃദയം കീഴടക്കിയ സായ് പല്ലവി പിന്നീട് ഓരോ ചിത്രത്തിലും വ്യത്യസ്തമായ അഭിനയമികവാണ് പുറത്തെടുത്തത്. ‘കലി’, ‘ഫിദ’, ‘മാരി 2’, ‘ലവ് സ്റ്റോറി’, ‘ശ്യാം സിംഗ റോയ്’, ‘ഗാര്‍ഗി’, ‘അമരന്‍’ തുടങ്ങിയ ചിത്രങ്ങളിലെ പ്രകടനങ്ങള്‍ താരത്തിന്റെ അഭിനയവൈവിധ്യത്തിന് ഉദാഹരണങ്ങളാണ്.

മുഖഭാവങ്ങളിലൂടെയും സ്വാഭാവികമായ ശരീരഭാഷയിലൂടെയും കഥാപാത്രത്തിന്റെ വികാരങ്ങള്‍ പ്രേക്ഷകരിലേക്ക് എത്തിക്കാനുള്ള കഴിവാണ് സായ് പല്ലവിയെ വ്യത്യസ്തയാക്കുന്നത്. ‘ഗാര്‍ഗി’യിലെ പോരാട്ടവീര്യമുള്ള കഥാപാത്രവും ‘അമരനി’ലെ ഇന്ദു റെബേക്ക വര്‍ഗീസും ഇതിന് ഉദാഹരണങ്ങളാണ്. ഇപ്പോള്‍ ആദ്യമായി പോലീസ് യൂണിഫോമണിയുമ്പോള്‍ അഭിനയത്തിന്റെ മറ്റൊരു തലമാണ് താരം പരീക്ഷിക്കുന്നത്.

- Advertisement -
Ad image

‘അമരന്‍’ എന്ന ചിത്രത്തിനുശേഷം സംവിധായകന്‍ രാജ്കുമാര്‍ പെരിയസാമിയുമായി വീണ്ടും ഒന്നിക്കുന്ന ചിത്രമാണ് ‘ഒ എം’. സംവിധായകന്‍ തന്റെ പൊലീസ് വേഷത്തില്‍ തന്നേക്കാള്‍ കൂടുതല്‍ വിശ്വാസമര്‍പ്പിച്ചിരുന്നുവെന്നാണ് സായ് പല്ലവി ചിത്രത്തിന്റെ പ്രീ റിലീസ് ഇവന്റില്‍ പറഞ്ഞത്. രാജ്കുമാര്‍ പെരിയസാമി സ്ത്രീകഥാപാത്രങ്ങളെ എഴുതുന്ന രീതി ഏതൊരു അഭിനേത്രിയുടെയും സ്വപ്‌നമാണെന്നും താരം അഭിപ്രായപ്പെട്ടിരുന്നു. നിത്യ റെഡ്ഡി എന്ന കഥാപാത്രത്തിന് നിരവധി തലങ്ങളുണ്ടെന്നും ആക്ഷന്‍ രംഗങ്ങളില്‍ അഭിനയിച്ചത് മികച്ച അനുഭവമായിരുന്നുവെന്നും സായ് പല്ലവി പറഞ്ഞു.

അതുപോലെ മമ്മൂട്ടിക്കൊപ്പം അഭിനയിക്കണമെന്നത് സായ് പല്ലവിയുടെ ഏറെക്കാലത്തെ ആഗ്രഹമായിരുന്നു. ‘അമരന്‍’ സിനിമയുടെ ചിത്രീകരണത്തിനിടെ മമ്മൂട്ടിയുടെ പേര് നിരന്തരം കേട്ടിരുന്നുവെന്നും ഇപ്പോള്‍ അദ്ദേഹത്തോടൊപ്പം അഭിനയിക്കാന്‍ കഴിഞ്ഞതില്‍ സന്തോഷമുണ്ടെന്നും താരം പങ്കുവെച്ചു.

ധനുഷിനൊപ്പം വീണ്ടും ഒന്നിക്കുന്ന ചിത്രം കൂടിയാണ് ‘ഒ എം’. നേരത്തെ ‘മാരി 2’വിലെ ‘റൗഡി ബേബി’ എന്ന ഗാനത്തിലൂടെ ഇരുവരും വലിയ ജനപ്രീതി നേടിയിരുന്നു. ഇത്തവണ ആക്ഷന്‍ പശ്ചാത്തലത്തിലുള്ള വ്യത്യസ്ത കഥാപാത്രങ്ങളിലാണ് ഇരുവരും എത്തുന്നത്.

മമ്മൂട്ടി, ധനുഷ്, സായ് പല്ലവി എന്നിവരുടെ സാന്നിധ്യം കേരളത്തിലും ചിത്രത്തിന് വലിയ പ്രതീക്ഷ നല്‍കുന്നുണ്ട്. ചിത്രത്തിന്റെ കേരളത്തിലെ വിതരണാവകാശം സ്വന്തമാക്കിയിരിക്കുന്നത് ബിനു ജോര്‍ജ് അലക്‌സാണ്ടര്‍ പ്രൊഡക്ഷന്‍സാണ്. കമ്പനിക്കുവേണ്ടി ഡ്രീം ബിഗ് ഫിലിംസാണ് കേരളത്തിലെ തിയേറ്റര്‍ വിതരണം നിര്‍വഹിക്കുന്നത്. വിതരണരംഗത്തേക്കുള്ള ബിനു ജോര്‍ജ് അലക്‌സാണ്ടര്‍ പ്രൊഡക്ഷന്‍സിന്റെ ശ്രദ്ധേയമായ ചുവടുവയ്പ്പുകൂടിയാണ് ‘ഒ എം’.

നിര്‍മ്മാണരംഗത്തും കമ്പനി സജീവമാണ്. അനൂപ് സത്യന്‍ സംവിധാനം ചെയ്യുന്ന മോഹന്‍ലാല്‍ ചിത്രത്തിന്റെ നിര്‍മ്മാണവുമായി ബന്ധപ്പെട്ടും ബിനു ജോര്‍ജ് അലക്‌സാണ്ടര്‍ പ്രൊഡക്ഷന്‍സ് ശ്രദ്ധ നേടിയിട്ടുണ്ട്.

ചുവന്ന ചന്ദനക്കടത്തിന്റെ പശ്ചാത്തലത്തില്‍ ഒരുങ്ങുന്ന ചിത്രത്തില്‍ ധനുഷ് രഹസ്യ ദൗത്യത്തിന്റെ ഭാഗമായി കടത്തുസംഘത്തിലേക്ക് നുഴഞ്ഞുകയറുന്ന പൊലീസ് ഉദ്യോഗസ്ഥനായാണ് എത്തുന്നത് എന്നാണ് ട്രെയ്ലര്‍ നല്‍കുന്ന സൂചന. മമ്മൂട്ടി ബര്‍മ കാര്‍ത്തികേയന്‍ എന്ന ശക്തമായ കഥാപാത്രത്തെയും അവതരിപ്പിക്കുന്നു. ശ്രീലീല, നസ്രുദീന്‍ ഷാ, ഇന്ദ്രന്‍സ്, രേണു ദേശായി, കലൈറാണി, സഞ്ജയ് സ്വരൂപ് എന്നിവരാണ് ചിത്രത്തിലെ മറ്റ് പ്രമുഖ താരങ്ങള്‍. ചിത്രത്തിന്റെ ഗാനങ്ങളും ട്രെയ്ലറും കൂടാതെ പ്രീ റീലിസ് പരിപാടികളും സമൂഹ മാധ്യമങ്ങളിലൂടെ പ്രേക്ഷകരില്‍ വലിയ ഹൈപ്പ് സൃഷ്ടിച്ചിട്ടുണ്ട്.

ധനുഷ്, ശ്രദ്ധ അഗര്‍വാള്‍, അസ്മത് ജഗ്മഗ് എന്നിവര്‍ ചേര്‍ന്നാണ് ചിത്രം നിര്‍മ്മിക്കുന്നത്. സംഗീതം സായ് അഭയങ്കറും ഛായാഗ്രഹണം എഴില്‍ അരസനും നിര്‍വഹിക്കുന്നു. സീതയായി പ്രേക്ഷകരുടെ മനസ്സില്‍ ഇടം നേടിയ സായ് പല്ലവി ഇനി നിത്യ റെഡ്ഡി ഐ പി എസായി എത്രത്തോളം തിളങ്ങുമെന്നതാണ് ആരാധകര്‍ ഉറ്റുനോക്കുന്നത്. മമ്മൂട്ടിയുടെയും ധനുഷിന്റെയും കരുത്തുറ്റ കഥാപാത്രങ്ങള്‍ക്കൊപ്പം സായ് പല്ലവിയുടെ ആദ്യ പൊലീസ് വേഷവും ചേരുമ്പോള്‍ ‘ഒ എം’ നവംബറിലെ ശ്രദ്ധേയമായ സിനിമാ റിലീസുകളിലൊന്നായി മാറുകയാണ്.

Share This Article
Leave a Comment
error: Content is protected !!