തിരുവനന്തപുരം: ക്രിസ്ത്യന് മതത്തില് പെട്ട പെണ്കുട്ടികളെയും യുവാക്കളെയും ലവ് ജിഹാദിലൂടെയും നാര്ക്കോട്ടിക് ജിഹാദിലൂടെയും വഴിതെറ്റിക്കുകയാണെന്ന പാലാ ബിഷപ്പ് മാര് ജോസഫ് കല്ലറങ്ങാട്ടിന്റെ പ്രസ്താവനക്കെതിരെ പ്രതിപക്ഷ നേതാവ് വി ഡി സതീശന്.
പാലാ ബിഷപ്പ് മാര് ജോസഫ് കല്ലറങ്ങാട്ടിന്റെ പ്രസ്താവന അതിരുകടന്നതായിപ്പോയെന്നും മതമേലധ്യക്ഷന്മാര് സംയമനവും ആത്മനിയന്ത്രണവും പാലിക്കണമെന്നും വി ഡി സതീശന് ആവശ്യപ്പെട്ടു.
കേരളത്തിലെ സമാധാന അന്തരീക്ഷവും മനുഷ്യര് തമ്മിലുള്ള പരസ്പര വിശ്വാസവും തകര്ക്കുന്ന ഒരു നീക്കവും പ്രസ്താവനകളും ഉണ്ടാകരുതെന്ന് സമുദായ, ആത്മീയ നേതാക്കളോട് വിനീതമായി അഭ്യര്ഥിക്കുകയാണെന്നു പറഞ്ഞ വി ഡി സതീശന് കുറ്റകൃത്യങ്ങള്ക്ക് ജാതിയോ മതമോ ജെന്ഡറോ ഇല്ലെന്നും ചൂണ്ടിക്കാട്ടി.
കൊലപാതകങ്ങള്, തീവ്ര നിലപാടുകള്, ലഹരി വസ്തുക്കളുടെ ഉപയോഗം തുടങ്ങി സാമൂഹിക മാധ്യമങ്ങളുടെ ദുരുപയോഗവും സത്രീകളെയും കുഞ്ഞുങ്ങളെയും ആക്രമിക്കുന്നതും വരെ എന്തെല്ലാം നീചവും ഭീകരവുമായ സംഭവ പരമ്പരകളാണ് ദിവസേന അരങ്ങേറുന്നത്.
ജാതി തിരിച്ചും മതം നോക്കിയും ഇവയുടെ കണക്കെടുക്കുന്നതും ഏതെങ്കിലും സമുദായത്തിനു മേല് കുറ്റം ചാര്ത്തുന്നതും ശരിയല്ല. അത് അക്ഷന്തവ്യമായ തെറ്റാണു താനും. കടുത്ത മാനസിക വൈകല്യങ്ങള്ക്ക് ജാതിയും മതവും നിശ്ചയിക്കുന്നത് വര്ണവിവേചനത്തിന് തുല്യമാണ്.
അനാവശ്യമായ അഭിപ്രായ പ്രകടനങ്ങള് സമൂഹത്തില് സ്പര്ധ വളര്ത്തും. വെല്ലുവിളികളെ നമുക്ക് ഒരുമിച്ച് നേരിടാം. അതിന് ആത്മീയ നേതൃത്വം വെളിച്ചം പകരണം, അല്ലാതെ കൂരിരുട്ട് പടര്ത്തുകയല്ല ചെയ്യേണ്ടത്.
ഈ വിവാദങ്ങള് ഇവിടെ അവസാനിപ്പിക്കുന്നതാണ് ഉചിതം. താഴേത്തട്ടിലേക്ക് കൊണ്ടുപോയി, പരസ്പരം ചെളിവാരിയെറിഞ്ഞ് കേരളത്തിന്റെ സാമൂഹിക അന്തരീക്ഷം കലുഷിതമാക്കരുതെന്നും വി ഡി സതീശന് പറഞ്ഞു.
