ചെന്നൈ: തെന്നിന്ത്യന് ആക്ഷന് ഹീറോ വിശാലിനെ നായകനാക്കി നവാഗതനായ തു.പാ.ശരവണന് രചനയും സവിധാനവും നിര്വഹിച്ച ‘വീരമേ വാകൈ സൂടും’ എന്ന തമിഴ്- തെലുങ്ക് ദ്വിഭാഷാ ചിത്രത്തിന്റെ ടീസര് പുറത്തിറങ്ങി മണിക്കൂറുകള്ക്കകം വൈറലായി ചരിത്രം സൃഷ്ടിച്ച് മുന്നേറ്റം തുടരുകയാണ്. ക്രിസ്തുമസ് ദിനത്തില് ‘Raise of a common Man’ എന്ന ടാഗ് ലൈനോടെ പുറത്തിറങ്ങിയ ടീസര് അഞ്ചു മണിക്കൂര് കൊണ്ട് ഒരു മില്യനില് പരം കാഴ്ചക്കാരെ നേടിയാണ് മുന്നേറ്റം നടത്തിയത്.
വന് വരവേല്പ്പാണ് ആരാധകരില് നിന്നും ടീസറിന് ലഭിച്ചിരിക്കുന്നത്. തീ പാറുന്ന സംഘട്ടന രംഗങ്ങള് കോര്ത്തിണക്കിയ ഹൈ വോള്ട്ടേജ് ടീസറാണ് അണിയറക്കാര് ആരാധകര്ക്ക് എത്തിച്ചത്. എല്ലാ വിഭാഗം സിനിമാ പ്രേക്ഷകരെയും ആകര്ഷിക്കും വിധത്തിലുള്ള ആക്ഷന് എന്റര്ടൈനറാണ് ‘വീരമേ വാകൈ സൂടും’ എന്നാണു ടീസര് നല്കുന്ന സൂചന.
ഭരണ കൂടത്തിനും ഭരണ സ്വാധീനം ഉള്ള വ്യക്തികള്ക്കും നേരെ ഒരു സാധാരണ ചെറുപ്പക്കാരന് നടത്തുന്ന സാഹസികമായ ഒറ്റയാള് പോരാട്ടമാണ് ചിത്രത്തിന്റെ പ്രമേയം. ബാബുരാജ് വിശാലിന്റെ വില്ലനാവുന്ന ചിത്രം കൂടിയാണ് ഇത് എന്നതാണ് മറ്റൊരു സവിശേഷത. ഡിംപിള് ഹയാതിയാണ് നായിക. രവീണാ രവി, തുളസി, കവിതാ ഭാരതി, യോഗി ബാബു, ജോര്ജ് മരിയ, ബാബുരാജ്, ബ്ലാക്ക്ഷീപ്പ് ദീപ്തി, മഹാ ഗാന്ധി എന്നിവരാണ് ചിത്രത്തിലെ മറ്റു പ്രധാന അഭിനേതാക്കള്. യുവന് ഷങ്കര് രാജയാണ് സംഗീത സംവിധായകന്. അനല് അരസു, രവി വര്മ്മ, ദിനേശ് കാശി എന്നിവരാണ് സാഹസികമായ സംഘട്ടന രംഗങ്ങള് ഒരുക്കിയിരിക്കുന്നത്. വിശാല് തന്നെയാണ് തന്റെ വിശാല് ഫിലിം ഫാക്ടറിയുടെ ബാനറില് ‘വീരമേ വാകൈ സൂടും’ നിര്മ്മിച്ചിരിക്കുന്നത്.
