ദോഹ: റമദാനില് ഖത്തറില് ഭക്ഷ്യ സുരക്ഷ ഉറപ്പാക്കുന്നതിനായി പൊതുജനാരോഗ്യ മന്ത്രാലയം സംയോജിത നിരീക്ഷണ പദ്ധതി തയ്യാറാക്കി.
ഭക്ഷ്യവസ്തുക്കളുടെ ആവശ്യം വര്ധിച്ചുവരുന്നതിനാല് വിശുദ്ധ മാസത്തില് ഭക്ഷ്യ ആരോഗ്യവും സുരക്ഷയും നിലനിര്ത്തുന്നതിനും പൊതുജനാരോഗ്യം പ്രോത്സാഹിപ്പിക്കുന്നതിനും ഉപഭോക്താക്കളെ സംരക്ഷിക്കുന്നതിനുമുള്ള നിരന്തരമായ ശ്രമങ്ങളുടെ ഭാഗമാണിത്.
ഇറക്കുമതി ചെയ്തതും പ്രാദേശികവുമായ ഭക്ഷണത്തിന്റെ നിയന്ത്രണം, ഭക്ഷ്യ സുരക്ഷാ ലബോറട്ടറി സേവനങ്ങള് നല്കല്, ഉപഭോക്താക്കളില് ആരോഗ്യ അവബോധം പ്രോത്സാഹിപ്പിക്കല് എന്നിവയുള്പ്പെടെ നിരവധി ഘടകങ്ങളെ അടിസ്ഥാനമാക്കിയാണ് പദ്ധതി തയ്യാറാക്കിയിരിക്കുന്നത്.
ഉപഭോഗ രീതികള് മാറുകയും ചില ഭക്ഷ്യവസ്തുക്കളുടെ ആവശ്യം വര്ധിക്കുകയും ചെയ്യുന്ന നോമ്പ് മാസത്തിന്റെ സവിശേഷതകള് കണക്കിലെടുത്താണ് പദ്ധതി ഒരുക്കിയിരിക്കുന്നത്.
ഉപഭോക്താക്കളും ഭക്ഷ്യ സ്ഥാപനങ്ങളും ഉള്പ്പെടെ ഭക്ഷ്യ ശൃംഖലയിലെ എല്ലാ കക്ഷികളിലും ഭക്ഷ്യ സുരക്ഷാ സംസ്കാരം പ്രോത്സാഹിപ്പിക്കുന്നതിന് മന്ത്രാലയം ബോധവത്ക്കരണ കാംപെയ്നും ആരംഭിച്ചിട്ടുണ്ട്. ഭക്ഷ്യ സുരക്ഷാ നിയമങ്ങളെക്കുറിച്ചുള്ള ധാരണ വര്ധിപ്പിക്കുന്നതിനും ഭക്ഷ്യജന്യ രോഗങ്ങള് തടയുന്നതിനുമായി സോഷ്യല് മീഡിയ വഴി പങ്കിട്ട ബോധവത്ക്കരണ സന്ദേശങ്ങള് ഉള്പ്പെടുന്നതാണ് കാംപെയ്ന്.
ഫെബ്രുവരി മാസത്തില് 89,14,053 ടണ് ഭക്ഷ്യവസ്തുക്കള് ഇറക്കുമതി ചെയ്തതായി പൊതുജനാരോഗ്യ മന്ത്രാലയം റിപ്പോര്ട്ട് ചെയ്തു. ഇതില് 69,69,738 ടണ് ആവശ്യകതകള് പാലിക്കുന്നതാണെന്ന് സ്ഥിരീകരിച്ചതിന് ശേഷം വിട്ടുകൊടുത്തു. എങ്കിലും 52,550 ടണ് നിരസിക്കപ്പെട്ടു. 8,739 ടണ് സാങ്കേതിക നിയന്ത്രണങ്ങളുടെയും മാനദണ്ഡങ്ങളുടെയും ലംഘനത്തെ തുടര്ന്ന നശിപ്പിച്ചു.
പരിശോധനാ ഷെഡ്യൂളിന്റെ ഫലപ്രാപ്തി വര്ധിപ്പിക്കുന്നതിന് കര, കടല്, വ്യോമ തുറമുഖങ്ങളിലെ ഭക്ഷ്യ ഇന്സ്പെക്ടര്മാരുടെ എണ്ണത്തില് വര്ധനവ് വരുത്തിയിട്ടുണ്ട്. സുഗമവും കാര്യക്ഷമവുമായ നിരീക്ഷണ പ്രക്രിയ ഉറപ്പാക്കുന്നതിനും വിപണി ആവശ്യങ്ങള് നിറവേറ്റുന്നതിനായി സാധനങ്ങളുടെ ഒഴുക്ക് സുഗമമാക്കുന്നതിനും തുറമുഖങ്ങളിലെ യൂണിറ്റുകള് 24 മണിക്കൂറും പ്രവര്ത്തിക്കുന്നു.
പ്രാദേശിക നിയന്ത്രണത്തിന്റെ ഭാഗമായി ഉപഭോക്തൃ അസോസിയേഷനുകള്, ഹൈപ്പര്മാര്ക്കറ്റുകള്, ജനപ്രിയ അടുക്കളകള് തുടങ്ങി ഉപഭോക്താക്കള് ഏറ്റവും കൂടുതല് സന്ദര്ശിക്കുന്ന സ്ഥാപനങ്ങളില് ഭക്ഷ്യ സുരക്ഷാ നിരീക്ഷണം ശക്തമാക്കിയിട്ടുണ്ട്. ഫെബ്രുവരിയില് 1,915 പരിശോധനാ സന്ദര്ശനങ്ങള് നടത്തി. പരിശോധനയ്ക്കായി 1,352 ഭക്ഷണ സാമ്പിളുകള് പിന്വലിച്ചു.
ഈ മാസം ഇഫ്താര് ടേബിളുകളും റമദാന് ടെന്റുകളും നല്കുന്നവയില് ശ്രദ്ധ കേന്ദ്രീകരിച്ച് 80-ലധികം ജനപ്രിയ അടുക്കളകള് സന്ദര്ശിച്ചു. ഈ അടുക്കളകളില് നിന്നുള്ള 150 ഉദ്യോഗസ്ഥര് പങ്കെടുത്ത ബോധവല്ക്കരണ വര്ക്ക്ഷോപ്പ് പൊതുജനാരോഗ്യ മന്ത്രാലയം സംഘടിപ്പിച്ചു.
