തിരുവനന്തപുരം:അമ്മയറിയാതെ കുഞ്ഞിനെ ദത്ത് നല്കിയെന്ന പരാതിയില് അനുപമയുടെ കുഞ്ഞിനെ നാട്ടിലെത്തിച്ചു. ഡിവൈ.എസ്.പിയുടെ നേതൃത്വത്തില് രണ്ടു പൊലീസ് ഉദ്യോഗസ്ഥരും ചൈല്ഡ് വെല്ഫയര് കൗണ്സിലിന്റെ സോഷ്യല് വര്ക്കറുമടങ്ങുന്ന സംഘമാണ് ആന്ധ്രാപ്രദേശിലെത്തി ദമ്പതികളില് നിന്ന് കുഞ്ഞിനെ ഏറ്റുവാങ്ങി അവിടെ നടപടികള് പൂര്ത്തീകരിച്ച് ഇവിടേക്ക് കൊണ്ടു വന്നത്.
കഴിഞ്ഞ ദിവസം 8.30ന് ഹൈദരാബാദ് – തിരുവനന്തപുരം ഇന്ഡിഗോ വിമാനത്തിലാണ് കുഞ്ഞുമായി പ്രത്യേക സംഘം എത്തിയത്. കുട്ടിയെ കൈമാറണമെന്ന ശിശുക്ഷേമ സമിതിയുടെ നിര്ദേശം ദത്തെടുത്ത അദ്ധ്യാപക ദമ്പതികളെ നേരത്തേ തന്നെ അറിയിച്ചിരുന്നു. ഉദ്യോഗസ്ഥ സംഘം പുറപ്പെടുന്ന കാര്യവും ഔദ്യോഗികമായി അറിയിച്ചു. പുതിയ വസ്ത്രങ്ങളടക്കം നല്കിയാണ് ദമ്പതികള് കുഞ്ഞിനെ യാത്രയാക്കിയത്. കുട്ടിയെ ദത്തെടുത്തശേഷം സ്വന്തം സ്ഥലത്തുനിന്നുമാറി മറ്റൊരു സ്ഥലത്താണ് ദമ്പതികള് താമസിച്ചിരുന്നത്. കുട്ടിയെ ശിശുക്ഷേമ സമിതിയുടെ മേല്നോട്ടത്തില് പാളയത്തെ നിര്മല ശിശുഭവനില് പ്രവേശിപ്പിച്ചു. കുട്ടിയുടെ ഡിഎന്എ സാംപിള് ശേഖരിച്ചു. കോടതി വിധി ഉണ്ടാകുന്നതുവരെ കുഞ്ഞ് നിര്മല ശിശുഭവനില് തുടരും.
