കോഴിക്കോട്: വിവാഹവീട്ടിലെ ഭക്ഷണം കഴിച്ച് അവശനിലയിലായ കുട്ടികളില് ഒരാള് മരിച്ചു. നരിക്കുനി വീരമ്പ്രം ചങ്ങളംകണ്ടി അക്ബറിന്റെ മകന് രണ്ടര വയസുകാരന് മുഹമ്മദ് യമിനാണ് മരിച്ചത്.
ഭക്ഷണം കഴിച്ച് അവശനിലയിലായ ആറ് കുട്ടികള് നിലവില് ചികിത്സയിലാണ്. വിവാഹവീട്ടില് നിന്നും പാര്സലായി കൊണ്ടു വന്ന ഭക്ഷണം കഴിച്ച സമീപ വീടുകളിലേയും ബന്ധുവീടുകളിലേയും കുട്ടികളിലാണ് ആരോഗ്യ പ്രശ്നങ്ങളുണ്ടായത്.
വെള്ളിയാഴ്ച്ചയാണ് ഒരു വിവാഹവീട്ടില് നിന്നും നരിക്കുനി പഞ്ചായത്തിലെ വീരമ്പ്രം സ്വദേശി അക്ബറിന്റെ വീട്ടിലേക്ക് ഭക്ഷണം പാര്സലായി കൊണ്ടുവന്നത്. ഈ ഭക്ഷണം കഴിച്ചാണ് അക്ബറിന്റെ മകന് മുഹമ്മദ് യമിന് ആരോഗ്യപ്രശ്നങ്ങളുണ്ടായതും ആശുപത്രിയില് പ്രവേശിപ്പിച്ചതും. യമിനെ കൂടാതെ മറ്റു വീടുകളിലുള്ള ആറ് കുട്ടികള്ക്കും കാര്യമായ ആരോഗ്യപ്രശ്നങ്ങളുണ്ട്. ഇവരെല്ലാം കോഴിക്കോട് മെഡിക്കല് കോളെജ് ആശുപത്രിയില് ചികിത്സയിലാണ്.
താമരശ്ശേരി പ്രാഥമിക ആരോഗ്യകേന്ദ്രത്തില് നിന്നാണ് ഇവരെ കോഴിക്കോട് മെഡിക്കല് കോളെജിലേക്ക് റഫര് ചെയ്തത്.
ആകെ 11 കുട്ടികളെയാണ് വെള്ളിയാഴ്ച്ച വൈകിട്ടോടെ ആശുപത്രിയില് പ്രവേശിപ്പിച്ചത്. ഇതില് നാല് പേര് ഇന്നലെ ഡിസ്ചാര്ജ് ചെയ്തിരുന്നു. കുട്ടികളെ മാത്രമാണ് ഇതുവരെ ആശുപത്രിയില് പ്രവേശിപ്പിച്ചിട്ടുള്ളത്. ചിക്കന് കൊണ്ടുള്ള വിഭവം കഴിച്ച കുട്ടികളിലാണ് ആരോഗ്യപ്രശ്നം റിപ്പോര്ട്ട് ചെയ്തത്. സംഭവത്തില് പൊലീസും ആരോഗ്യവകുപ്പ് അധികൃതരും അന്വേഷണം ആരംഭിച്ചിട്ടുണ്ട്.
