തിരുവനന്തപുരം: മുന് എം എല് എയും കോളജ് അധ്യാപികയുമായിരുന്ന പ്രൊഫ. എ നബീസ ഉമ്മാള് (91) അന്തരിച്ചു. വാര്ധക്യ സഹജമായ അസുഖങ്ങളെ തുടര്ന്ന് തിരുവനന്തപുരം നെടുമങ്ങാട്ടുള്ള വസതിയിലായിരുന്നു അന്ത്യം.
1987ല് നടന്ന നിയമസഭ തെരഞ്ഞെടുപ്പില് സി പി എം സ്വതന്ത്ര സ്ഥാനാര്ഥിയായി കഴക്കൂട്ടം മണ്ഡലത്തില് നിന്ന് മത്സരിച്ച് വിജയിച്ചു. 1991ലെ തെരഞ്ഞെടുപ്പില് കഴക്കൂട്ടത്തുനിന്നും എം വി രാഘവനോട് 689 വോട്ടുകള്ക്ക് പരാജയപ്പെട്ടു. 1995ല് നെടുമങ്ങാട് നഗരസഭ ചെയര്പേഴ്സണായിരുന്നു.
എ ആര് രാജരാജവര്മക്കുശേഷം യൂണിവേഴ്സിറ്റി കോളജില് വകുപ്പ് അധ്യക്ഷയും പ്രിന്സിപ്പലുമാകുന്ന ആദ്യ മലയാള പണ്ഡിതയായിരുന്നു നബീസ ഉമ്മാള്. 33 വര്ഷത്തെ അധ്യാപനത്തിനിടയില് കേരളത്തിലെ പത്തിലേറെ പ്രമുഖ കലാലയങ്ങളില് അധ്യാപികയായിരുന്നു നബീസ ഉമ്മാള്. 1986ല് തിരുവനന്തപുരം യൂനിവേഴ്സിറ്റി കോളജില് പ്രിന്സിപ്പലായിരിക്കെയാണ് സര്വിസില്നിന്നും വിരമിച്ചത്.
