ദോഹ: ഇന്ത്യന് കമ്മ്യൂണിറ്റി ബെനവലന്റ് ഫോറം (ഐ സി ബി എഫ്) വീനസ് ഡെന്റല് ക്ലിനിക്കുമായി സഹകരിച്ച് ആദ്യത്തെ സൗജന്യ ദന്തചികിത്സാ ക്യാമ്പ് വിജയകരമായി സംഘടിപ്പിച്ചു. സാമ്പത്തിക ബുദ്ധിമുട്ടുകള് കാരണം ദന്തചികിത്സകള് ഒഴിവാക്കുന്ന സാധാരണക്കാരായ ഇന്ത്യന് തൊഴിലാളികള്ക്ക് ഈ സൗകര്യം പ്രയോജനപ്പെടുത്തുക എന്ന ലക്ഷ്യത്തോടെയാണ് ഈ പദ്ധതി സംഘടിപ്പിച്ചത്. ഇത്തരം പരിപാടികളുടെ ആവശ്യകതയെ ക്യാമ്പ് എടുത്തുകാട്ടി.
വിവിധ ഇന്ത്യന് സംസ്ഥാനങ്ങളില് നിന്നുള്ള തൊണ്ണൂറിലധികം രോഗികള് ദന്തല് ക്ലീനിംഗ് ഉള്പ്പെടെയുള്ള ചികിത്സകള് പ്രയോജനപ്പെടുത്തി. ഐ സി ബി എഫിന്റെ സേവന മനോഭാവവും മാനുഷിക പ്രതിബദ്ധതയും തെളിയിക്കുന്നതായിരുന്നു ഈ ക്യാമ്പ്.
ഔദ്യോഗിക ചടങ്ങില് ഐ സി ബി എഫ് ജനറല് സെക്രട്ടറി ദീപക് ഷെട്ടി ഉദ്ഘാടനം ചെയ്തു. അഡൈ്വസറി കൗണ്സില് ചെയര്മാന് പ്രസാദ് ഗാരു മുഖ്യാതിഥിയായി പങ്കെടുത്തു. ഡോ. വര്ഗീസ് യുജിന്, മെഡിക്കല് ക്യാമ്പ് വിഭാഗം മേധാവി മിനി സിബി എന്നിവര് പ്രസംഗിച്ചു.
മാനേജിംഗ് കമ്മിറ്റി അംഗങ്ങളായ മണി ഭാരതി, നീലാംബരി സുശാന്ത്, അമര് വീര് സിംഗ്, ഖാജ നിസാമുദ്ദീന്, ശങ്കര് ഗൗഡ്, ഇര്ഫാന് അന്സാരി എന്നിവര് ക്യാമ്പിന്റെ വിജയകരമായ നടത്തിപ്പിനായി സജീവമായി നേതൃത്വം നല്കി.
