കൊച്ചി/ ന്യൂഡല്‍ഹി: സ്മാര്‍ട്ട് ഗ്ലാസുകളിലൂടെ യു പി ഐ പണമിടപാടുകള്‍ നടത്താനും തത്സമയ ക്രിക്കറ്റ് കമന്ററി കേള്‍ക്കാനും വിവിധ ഇന്ത്യന്‍ ഭാഷകളിലുള്ള സംഭാഷണങ്ങള്‍ തര്‍ജമ ചെയ്യാനും കഴിയുന്ന എ ഐ അധിഷ്ഠിത വെയറബിള്‍ ഉപകരണങ്ങള്‍ അവതരിപ്പിച്ച് ജിയോ. ന്യൂഡല്‍ഹിയില്‍ നടക്കുന്ന ഇന്ത്യ മൊബൈല്‍ കോണ്‍ഗ്രസ് 2026-ലാണ് ജിയോയുടെ പുതിയ എ ഐ ഗ്ലാസുകള്‍ ഉള്‍പ്പെടെയുള്ള വ്യക്തിഗത എ ഐ ഉപകരണങ്ങള്‍ അവതരിപ്പിച്ചത്.
ക്യാമറ ഗ്ലാസുകള്‍, ഓഡിയോ ഗ്ലാസുകള്‍, ഇയര്‍ഫോണുകള്‍ എന്നിവ ഉള്‍പ്പെടുന്ന ഉപകരണങ്ങളിലൂടെ ദൈനംദിന ജീവിതത്തില്‍ എ ഐ സാങ്കേതികവിദ്യയുടെ ഉപയോഗം കൂടുതല്‍ ലളിതമാക്കുകയാണ് ജിയോയുടെ ലക്ഷ്യം. ശബ്ദനിര്‍ദേശങ്ങളിലൂടെ പ്രവര്‍ത്തിക്കുന്ന എ ഐ അസിസ്റ്റന്റ്, ക്യു ആര്‍ കോഡ് സ്‌കാന്‍ ചെയ്ത് പണമടയ്ക്കാനുള്ള സൗകര്യം, തത്സമയ ഭാഷാ വിവര്‍ത്തനം, മീറ്റിങ്ങുകളിലെ പ്രധാന വിവരങ്ങള്‍ രേഖപ്പെടുത്താനുള്ള സംവിധാനം, ക്രിക്കറ്റ് കമന്ററി തുടങ്ങിയവയാണ് പ്രധാന സവിശേഷതകള്‍.
ക്യു ആര്‍ കോഡിലേക്ക് നോക്കിയാല്‍ പണമടയ്ക്കാം.
ജിയോ എ ഐ ഗ്ലാസുകളിലെ ശ്രദ്ധേയമായ സവിശേഷതയാണ് ‘സ്‌കാന്‍ ആന്‍ഡ് പേ’. ഇതിനായി ഉപയോക്താവ് ഫോണെടുക്കുകയോ പേയ്‌മെന്റ് ആപ്പ് തുറക്കുകയോ ചെയ്യേണ്ടതില്ല. ഗ്ലാസിലെ ക്യാമറ ഉപയോഗിച്ച് യു പി ഐ ക്യു ആര്‍ കോഡ് സ്‌കാന്‍ ചെയ്തശേഷം ശബ്ദനിര്‍ദേശം നല്‍കുന്നതിലൂടെ പണമിടപാട് ആരംഭിക്കാം. ആവശ്യമായ സ്ഥിരീകരണം നല്‍കിയാല്‍ ഇടപാട് പൂര്‍ത്തിയാക്കാം.
യു പി ഐ സര്‍ക്കിള്‍ സംവിധാനത്തിലൂടെ ഒരു ഇടപാടില്‍ പരമാവധി 5,000 രൂപ വരെ പണമടയ്ക്കാനാകും. പ്രതിമാസ ഇടപാട് പരിധി 15,000 രൂപയാണ്. ഈ പരിധികള്‍ ജിയോ നിശ്ചയിക്കുന്നതല്ലെന്നും യു പി ഐ സര്‍ക്കിളിന്റെ ചട്ടങ്ങള്‍ക്കനുസൃതമാണെന്നും കമ്പനി വ്യക്തമാക്കുന്നു.
ഫോണ്‍ അണ്‍ലോക്ക് ചെയ്യുക, പേയ്‌മെന്റ് ആപ്പ് തുറക്കുക, ക്യു ആര്‍ കോഡ് സ്‌കാന്‍ ചെയ്യുക തുടങ്ങിയ പതിവ് നടപടികള്‍ ഒഴിവാക്കി പണമിടപാടുകള്‍ കൂടുതല്‍ സൗകര്യപ്രദമാക്കുകയാണ് ഈ സംവിധാനത്തിന്റെ ലക്ഷ്യം.
വ്യത്യസ്ത ഇന്ത്യന്‍ ഭാഷകള്‍ സംസാരിക്കുന്നവര്‍ക്ക് പരസ്പരം ആശയവിനിമയം നടത്താന്‍ സഹായിക്കുന്ന തത്സമയ വിവര്‍ത്തന സംവിധാനവും എ ഐ ഗ്ലാസുകളിലുണ്ട്. ഒരാള്‍ സ്വന്തം ഭാഷയില്‍ സംസാരിക്കുമ്പോള്‍ മറുവശത്തുള്ളയാളുടെ ഭാഷയിലേക്ക് സംഭാഷണം തര്‍ജമ ചെയ്ത് ആശയവിനിമയം എളുപ്പമാക്കാന്‍ എ ഐ സാങ്കേതികവിദ്യ സഹായിക്കും.
ഇന്ത്യന്‍ ഭാഷകള്‍ക്ക് കൂടുതല്‍ പ്രാധാന്യം നല്‍കുന്ന ഈ സംവിധാനം, ഭാഷാ വ്യത്യാസങ്ങള്‍ മൂലമുള്ള ആശയവിനിമയ തടസ്സങ്ങള്‍ കുറയ്ക്കാന്‍ സഹായിക്കുമെന്നാണ് പ്രതീക്ഷ.
മീറ്റിങ്ങുകളിലും ചര്‍ച്ചകളിലും പ്രധാനപ്പെട്ട വിവരങ്ങള്‍ രേഖപ്പെടുത്താന്‍ സഹായിക്കുന്ന എ ഐ നോട്ട്-ടേക്കിങ് സംവിധാനവും പുതിയ ഉപകരണങ്ങളിലുണ്ട്. യാത്രയിലായിരിക്കുമ്പോഴും മറ്റ് ജോലികളില്‍ ഏര്‍പ്പെട്ടിരിക്കുമ്പോഴും ക്രിക്കറ്റ് മത്സരങ്ങളുടെ തത്സമയ കമന്ററി അറിയാനുള്ള സൗകര്യവും അവതരിപ്പിച്ചിട്ടുണ്ട്.
ശബ്ദനിര്‍ദേശങ്ങളിലൂടെ എ ഐ സേവനങ്ങള്‍ ഉപയോഗിക്കാനാകുന്നതിലൂടെ ഫോണിന്റെ സ്‌ക്രീനില്‍ നിരന്തരം നോക്കേണ്ട സാഹചര്യം കുറയ്ക്കാനാകുമെന്നാണ് ജിയോയുടെ വിലയിരുത്തല്‍.
സ്‌ക്രീനുകള്‍ക്കപ്പുറത്തേക്ക് എഐ
ഉല്‍പ്പാദനക്ഷമത വര്‍ധിപ്പിക്കുക, വിവരങ്ങളിലേക്കുള്ള പ്രവേശനം മെച്ചപ്പെടുത്തുക, ദൈനംദിന ജോലികള്‍ ലളിതമാക്കുക എന്നിവയാണ് പുതിയ എ ഐ വെയറബിള്‍ ഉപകരണങ്ങളിലൂടെ ലക്ഷ്യമിടുന്നതെന്ന് ജിയോ വ്യക്തമാക്കി.
സ്മാര്‍ട്ട് ഗ്ലാസുകള്‍ പുതിയ ആശയമല്ലെങ്കിലും യു പി ഐ പണമിടപാടുകള്‍, ഇന്ത്യന്‍ ഭാഷാ പിന്തുണ, തത്സമയ വിവര്‍ത്തനം, എ ഐ കുറിപ്പുകള്‍, ക്രിക്കറ്റ് കമന്ററി തുടങ്ങിയ സവിശേഷതകള്‍ ഉള്‍പ്പെടുത്തുന്നതിലൂടെ ഈ സാങ്കേതികവിദ്യയെ സാധാരണ ഉപയോക്താക്കളുടെ ദൈനംദിന ആവശ്യങ്ങളുമായി കൂടുതല്‍ അടുപ്പിക്കാനാണ് ജിയോ ശ്രമിക്കുന്നത്.
ഉപയോക്താക്കള്‍ക്ക് തങ്ങളുടെ ഇഷ്ടഭാഷയില്‍ ശബ്ദത്തിലൂടെ ഡിജിറ്റല്‍ സേവനങ്ങളുമായി ഇടപഴകാന്‍ കഴിയുന്ന ഭാവിയിലേക്കുള്ള ചുവടുവയ്പായാണ് ഇന്ത്യ മൊബൈല്‍ കോണ്‍ഗ്രസ് 2026-ലെ ജിയോയുടെ ഈ അവതരണം വിലയിരുത്തപ്പെടുന്നത്.
