കണ്ണൂര്: പാര്ട്ടി പ്രവര്ത്തകരും സ്നേഹിതന്മാരും നിര്ബന്ധിച്ചിട്ടും റിപ്പോര്ട്ടര് ചാനലിനെതിരെ നിയമ നടപടികള്ക്ക് മുതിരാതിരുന്നത് എം.വി രാഘവനെന്ന ഉറ്റ സുഹൃത്തായ രാഷ്ട്രീയ നേതാവിനെ ഓര്ത്തിട്ടാണെന്നും സഭ്യത ലംഘിച്ച് നടത്തുന്ന മാധ്യമ പ്രവര്ത്തനം എന്നെ മാത്രമല്ല, നാടിനെ മുഴുവനും ബാധിക്കുമെന്ന തിരിച്ചറിവിന്റെ പേരില് റിപ്പോര്ട്ടര് ചാനലിനെതിരെ ഒരു കോടി രൂപ നഷ്ടപരിഹാരം ആവശ്യപ്പെട്ടുകൊണ്ട് നോട്ടീസയച്ചുവെന്നും കെ.പി.സി.സി പ്രസിഡന്റ് കെ. സുധാകരന്. അപകീര്ത്തികരമായ വാര്ത്തയുടെ പേരില് ചാനലിന്റെ സംപ്രേക്ഷണം അവസാനിപ്പിക്കാന് ഇന്ഫര്മേഷന് ആന്റ് ബ്രോഡ്കാസ്റ്റിംഗ് മന്ത്രാലയത്തിന് പരാതി നല്കിയിട്ടുമുണ്ടെന്നും അദ്ദേഹം അറിയിച്ചു. സ്വന്തം ജീവനോളം വിശ്വാസമായിരുന്നു സി.എം.പി നേതാവായിരുന്ന എം.വി രാഘവനും താനും തമ്മിലെന്നും കാല് കുത്തിക്കില്ലെന്ന് പിണറായി വിജയനടക്കമുള്ളവര് വീമ്പടിച്ചു പ്രസംഗിച്ച കണ്ണൂരിന്റെ മണ്ണില്, പതിറ്റാണ്ടുകളോളം ഒരു പോറല് പോലുമേല്ക്കാതെ എം വി ആറിനെ കാത്തത് കണ്ണൂരിലെ കോണ്ഗ്രസ് പാര്ട്ടിയാണെന്നും അദ്ദേഹം ഫേസ്ബുക്ക് കുറിപ്പിലെഴുതി. യാതൊരു അടിസ്ഥാനവുമില്ലാതെ എന്നെയും മറ്റു കോണ്ഗ്രസ് നേതാക്കളെയും ചാനല് വ്യക്തിഹത്യ ചെയ്യുന്നത് പലകുറി കണ്ടിട്ടും കാണാത്തത് പോലെ മുന്നോട്ട് പോയത് ഞങ്ങള്ക്ക് പ്രിയപ്പെട്ട എം വി ആറിന്റെ മകനോടുള്ള സ്നേഹം കൊണ്ടു തന്നെയാണ്.
