കൊച്ചി- പ്രശസ്ത ചലച്ചിത്ര- മിമിക്രി താരം കലാഭവന്‍ മുഹമ്മദ് ഹനീഫ് (61) അന്തരിച്ചു. ശ്വാസതടസ്സം മൂലം ഒരാഴ്ചയായി കൊച്ചിയിലെ സ്വകാര്യാശുപത്രിയില്‍ ചികിത്സയിലായിരുന്നു.
കലാഭവന്‍ ട്രൂപ്പിലെ പ്രധാന മിമിക്രി താരമായിരുന്നു. നിരവധി സിനിമകളിലും ഹാസ്യ പരിപാടികളിലും വേഷമിട്ടിട്ടുണ്ട്. ഈ പറക്കും തളിക സിനിമയിലെ മണവാളന്‍ വേഷം ഹനീഫിന്റെ കരിയറിലെ ഏറ്റവും ശ്രദ്ധേയമായിരുന്നു. .
ചെപ്പ് കിലുക്കണ ചങ്ങാതി എന്ന ചിത്രത്തിലൂടെയാണ് സിനിമിയില്‍ എത്തുന്നത്. കഴിഞ്ഞ ആഴ്ച റിലീസായ ഗരുഡനിലാണ് അവസാനമായി വേഷമിട്ടത്.
മട്ടാഞ്ചേരിയില്‍ ഹംസയുടെയും സുബൈദയുടെയും മകനാണ്. വിദ്യാഭ്യാസത്തിന് ശേഷം സെയില്‍സ്മാനായി അദ്ദേഹം ജോലി ചെയ്തിരുന്നതിനോടൊപ്പം നാടക വേദികളിലും സജീവമായി. നാടകത്തിലൂടെ തുടങ്ങിയ കലാജീവിതം ഹനീഫിനെ കലാഭവനില്‍ കൊണ്ടെത്തിച്ചു. പിന്നീട് കലാഭവന്‍ ട്രൂപ്പിലെ പ്രധാന മിമിക്രി ആര്‍ട്ടിസ്റ്റായി അദ്ദേഹം മാറി.
ഭാര്യ: വാഹിദ, മക്കള്‍: ഷാരൂഖ്, സിത്താര, മരുമക്കള്‍: ഇസ്മായില്‍, ഷിഫ.
