കൊച്ചി: ഭയത്തിന്റെ മൂടുപടവുമായെത്തി പ്രേക്ഷകരില് ആകാംക്ഷയും അത്ഭുതവും ഉളവാക്കി മമ്മൂട്ടി ചിത്രം റോഷാക്കിന്റെ മേക്കിങ്ങ് വീഡിയോ പുറത്തിറങ്ങി. ഏറെ ദുരൂഹതകള് നിറച്ചാണ് മേക്കിങ്ങ് വീഡിയോയും എത്തിയിരിക്കുന്നത്. സെപ്തംബര് ഏഴിന് ചിത്രത്തിന്റെ ഒഫീഷ്യല് ട്രെയ്ലര് പുറത്തിറങ്ങും. തന്റെ ആദ്യചിത്രമായ കെട്ട്യോളാണ് എന്റെ മാലാഖ വമ്പന് വിജയമാക്കി തീര്ത്ത നിസാം ബഷീര് ഒരുക്കുന്ന മമ്മൂട്ടിയുടെ ത്രില്ലര് ചിത്രം റോഷാക്കിന്റെ നിര്മാണം നിര്വഹിച്ചിരിക്കുന്നത് മമ്മൂട്ടി കമ്പനി തന്നെയാണ്. മമ്മൂക്കയെ നായകനാക്കി ലിജോ ജോസ് പെല്ലിശ്ശേരി ഒരുക്കുന്ന നന്പകല് നേരത്ത് മയക്കം എന്ന ചിത്രവും നിര്മ്മിക്കുന്നത് മമ്മൂട്ടി കമ്പനി തന്നെയാണ്. വേഫെറര് ഫിലിംസാണ് ചിത്രം തിയറ്ററുകളില് എത്തിക്കുന്നത്.
കൊച്ചിയിലും ദുബായിലുമായാണ് ചിത്രത്തിന്റെ ഷൂട്ടിംഗ് പൂര്ത്തീകരിച്ചത്. മമ്മൂട്ടിയെ കൂടാതെ ഷറഫുദ്ധീന്, ജഗദീഷ്, ഗ്രേസ് ആന്റണി, ബിന്ദു പണിക്കര്, സഞ്ജു ശിവറാം, കോട്ടയം നസീര്, ബാബു അന്നൂര്, മണി ഷൊര്ണ്ണൂര് തുടങ്ങിയവരും ചിത്രത്തില് അഭിനയിക്കുന്നുണ്ട്. അഡ്വേഞ്ചേഴ്സ് ഓഫ് ഓമനക്കുട്ടന്, ഇബ്ലീസ് എന്നീ ചിത്രങ്ങള്ക്ക് തിരക്കഥ ഒരുക്കിയ സമീര് അബ്ദുളാണ് തിരക്കഥ ഒരുക്കിയിരിക്കുന്നത്.
പ്രൊജക്റ്റ് ഡിസൈനര്- ബാദുഷ, ചിത്രസംയോജനം- കിരണ് ദാസ്, സംഗീതം- മിഥുന് മുകുന്ദന്, കലാസംവിധാനം- ഷാജി നടുവില്, പ്രൊഡക്ഷന് കണ്ട്രോളര്- പ്രശാന്ത് നാരായണന്, ചമയം- റോണക്സ് സേവ്യര് ആന്റ് എസ് ജോര്ജ്, വസ്ത്രാലങ്കാരം- സമീറ സനീഷ്, ഡിജിറ്റല് മാര്ക്കറ്റിംഗ്- അനൂപ് സുന്ദരന്, വിഷ്ണു സുഗതന്, പി ആര് ഒ- പ്രതീഷ് ശേഖര്.
