തിരുവനന്തപുരം:നോര്ക്ക പ്രവാസി ഭദ്രത സംരംഭകത്വ സഹായ പദ്ധതികളുടെ ഉദ്ഘാടനം ഇന്നു നടക്കും. കൊവിഡ്19 മഹാമാരിയുടെ പശ്ചാത്തലത്തില് തൊഴില്രഹിതരായി തിരിച്ചെത്തിയവരും നാട്ടില് എത്തിയശേഷം മടങ്ങിപ്പോകാന് കഴിയാത്തവരുമായ മലയാളികള്ക്കായി നോര്ക്ക ആവിഷ്കരിച്ചതാണ് പദ്ധതി.
ഇന്ന് വൈകുന്നേരം 5.30ന് മാസ്കറ്റ് ഹോട്ടലില് മുഖ്യമന്ത്രി പിണറായി വിജയനാണ് ഉദ്ഘാടനം നിര്വഹിക്കുന്നത്. രണ്ടു ലക്ഷം വരെയുള്ള സൂക്ഷ്മ സംരംഭങ്ങള്ക്കു വേണ്ടി കുടുംബശ്രീ സഹകരണത്തോടെ നടപ്പാക്കുന്ന പ്രവാസി ഭദ്രതപേള്, രണ്ടുകോടി വരെയുള്ള സംരംഭങ്ങള്ക്കായി കെ.എസ്.ഐ.ഡി.സിയുമായി ചേര്ന്ന് നടപ്പാക്കുന്ന പ്രവാസിഭദ്രത മെഗാ എന്നീ പദ്ധതികളാണ് യാഥാര്ഥ്യമാവുന്നത്. കുടുംബശ്രീ ജില്ലാ മിഷനുകള് വഴിയാണ് സൂക്ഷ്മ സംരംഭങ്ങള്ക്കുള്ള പേള് പലിശരഹിത സംരംഭകത്വ വായ്പയും പിന്തുണസഹായങ്ങളും നല്കുന്നത്.
കെ.എസ്.ഐ.ഡി.സി മുഖേനെ നടപ്പാക്കുന്ന പ്രവാസി ഭദ്രത മെഗാ പദ്ധതിയില് ഒരു സംരംഭത്തിന് 25 ലക്ഷം മുതല് രണ്ടു കോടി രൂപവരെയാണ് വായ്പ. ആദ്യത്തെ നാലുവര്ഷം അഞ്ചു ശതമാനം മാത്രം പലിശ നിരക്കിലാണ് വായ്പ നല്കുന്നത്. ബാക്കി പലിശ നോര്ക്ക സബ്സിഡി അനുവദിക്കും. ഉദ്ഘാടന ചടങ്ങില് വ്യവസായ മന്ത്രി പി.രാജീവ് അധ്യക്ഷത വഹിക്കും. തദ്ദേശസ്വയംഭരണ മന്ത്രി എം.വി.ഗോവിന്ദന് മുഖ്യപ്രഭാഷണം നടത്തും.
