മലപ്പുറം: ഹരിത നേതാക്കളെ അധിക്ഷേപിച്ച സംഭവത്തില് എം എസ് എഫ് നേതാക്കള്ക്കെതിരെ നടപടിയില്ലെന്നും ആരോപണ വിധേയര് പരസ്യമായി ഖേദം പ്രകടിപ്പിക്കുമെന്നും ലീഗ് നേതൃത്വം അറിയിച്ചു.
എം എസ് എഫ് സംസ്ഥാന പ്രസിഡന്റ് പി കെ നവാസ്, മലപ്പുറം ജില്ലാ പ്രസിഡന്റ് കബീര് മുതുപറമ്പ്, ജനറല് സെക്രട്ടറി വി എ വഹാബ് എന്നിവര് സ്ത്രീ വിരുദ്ധ പരാമര്ശം നടത്തിയെന്നും അധിക്ഷേപിച്ചെന്നും ഹരിത നേതാക്കള് പറഞ്ഞിരുന്നു.
എം എസ് എഫ് നേതാക്കള് ഖേദം പ്രകടിപ്പിച്ച സാഹചര്യത്തില് ഹരിത വനിതാകമ്മീഷന് നല്കിയ പരാതി പിന്വലിക്കുമെന്നാണ് ലീഗിന്റെ പ്രസ്താവനയില് പറയുന്നത്. എം എസ് എഫ് നേതാക്കള്ക്കും നല്കിയ കാരണംകാണിക്കല് നോട്ടീസില് തുടര് നടപടികള് ഉണ്ടാകില്ലെന്നും ഹരിതയുടെ പ്രവര്ത്തനം താല്ക്കാലികമായി മരവിപ്പിച്ച നടപടി പിന്വലിക്കുമെന്നും ലീഗ് സംസ്ഥാന ജനറല് സെക്രട്ടറി പി എം എ. സലാം പറഞ്ഞു.
ഹരിതയും എം എസ് എഫും ഒരു മേഖലയില് പ്രവര്ത്തിക്കുന്ന സംഘടനകളായത് കൊണ്ട് യോജിച്ച് പോകുന്നതിന് ആവശ്യമായ ചര്ച്ചകളും പരിഹാര സംവിധാനങ്ങളും ആവശ്യമാണെന്ന വിലയിരുത്തലില് പാര്ട്ടി നേതാക്കളുടെ നിയന്ത്രണത്തില് ഇരു സംഘടനകളുടെയും പ്രാതിനിധ്യത്തോടെ ഒരു പ്രത്യേക സെല് രൂപീകരിക്കുമെന്നും ലീഗ് അറിയിച്ചു.
എം.എസ്.എഫിന്റെ ജില്ലാ സംസ്ഥാന കമ്മിറ്റികളില് വനിതാ പ്രാതിനിധ്യം പാര്ട്ടി ഉറപ്പുവരുത്തുമെന്നും ഇതിനനുസൃതമായി എം എസ് എഫ്, ഹരിത ഭരണഘടനകളില് കാലോചിതമായ മാറ്റങ്ങളുണ്ടാക്കുമെന്നും മലപ്പുറം ജില്ലാ ഹരിത കമ്മിറ്റിയില് ആവശ്യമായ കൂട്ടിച്ചേര്ക്കലുകള് വരുത്തുമെന്നും ജനറല് സെക്രട്ടറി പി എം എ. സലാം പറഞ്ഞു.
നേതാക്കളെ അധിക്ഷേപിച്ച സംഭവത്തില് എം എസ് എഫ് നേതൃത്വം ഖേദം പ്രകടിപ്പിച്ചാലും പരാതി പിന്വലിക്കില്ലെന്ന് ഹരിത. അധിക്ഷേപം നടത്തിയ ആരോപണ വിധേയരായ നേതാക്കളെ ഒരു മാസത്തേക്ക് സസ്പെന്ഡ് ചെയ്യുകയും അവര് പരസ്യമായി മാപ്പു പറയുകയും വേണമെന്നായിരുന്നു ഹരിതയുടെ ആവശ്യം.
എം എസ് എഫ് നേതാക്കളെ സസ്പെന്റ് ചെയ്യുമെന്ന് നേരത്തെ സൂചനകളുണ്ടായിരുന്നെങ്കിലും ഖേദ പ്രകടനത്തില് ഒതുക്കാനാണ് ലീഗ് ഉദ്ദേശിക്കുന്നത്.
എം എസ് എഫ് നേതാക്കള് ഖേദം പ്രകടിപ്പിച്ച സാഹചര്യത്തില് ഹരിത വനിതാകമ്മീഷന് നല്കിയ പരാതി പിന്വലിക്കുമെന്നാണ് ലീഗിന്റെ പ്രസ്താവനയില് പറഞ്ഞിരുന്നത്. എന്നാല് ഹരിത ഇതിന് തയ്യാറല്ലെന്നാണ് പുതിയ റിപ്പോര്ട്ടുകള് സൂചിപ്പിക്കുന്നത്. എം എസ് എഫ് സംസ്ഥാന പ്രസിഡന്റ് പി കെ നവാസ്, മലപ്പുറം ജില്ലാ പ്രസിഡന്റ് കബീര് മുതുപറമ്പ്, ജനറല് സെക്രട്ടറി വി എ വഹാബ് എന്നിവര് സ്ത്രീവിരുദ്ധ പരാമര്ശം നടത്തിയെന്നും അധിക്ഷേപിച്ചെന്നും ഹരിത നേതാക്കള് പറഞ്ഞിരുന്നു.
മാപ്പു പറയുന്നതില് തുടക്കത്തില് എതിര്പ്പ് പ്രകടിപ്പിച്ചെങ്കിലും നേതൃത്വം മുന്നോട്ടുവെക്കുന്ന ആവശ്യം അംഗീകരിക്കുമെന്ന് പി കെ നവാസ് പിന്നീട് വ്യക്തമാക്കുകയായിരുന്നു.
