കൊച്ചി: മാധ്യമങ്ങള് ജനങ്ങളുടെ ശബ്ദമാണെന്നും യഥാര്ഥ വാര്ത്തകള് ജനങ്ങളിലെത്തിക്കുന്നതില് മാധ്യമ പ്രവര്ത്തകരുടെ സംഭാവനകള് എക്കാലത്തും വിലമതിക്കാനാവാത്തതെന്നും ശ്രേഷ്ഠ കാതോലിക്കായും മലങ്കര മെത്രാപ്പോലീത്തായുമായ ആബൂന് മോര് ബസ്സേലിയോസ് ജോസഫ് ബാവ പറഞ്ഞു.
കടവന്ത്ര രാജീവ് ഗാന്ധി ഇന്ഡോര് സ്റ്റേഡിയത്തില് നടന്ന എറണാകുളം പ്രസ് ക്ലബ് ഓണോത്സവം ഉദ്ഘാടനം ചെയ്തു സംസാരിക്കുകയായിരുന്നു ശ്രേഷ്ഠ ബാവ.
ശരിയായ വാര്ത്തകളിലൂടെ സമൂഹത്തില് സുതാര്യതയും അവബോധവും വളര്ത്താന് മാധ്യമ പ്രവര്ത്തകര്ക്കു സാധിക്കുമെന്നും ബാവ കൂട്ടിച്ചേര്ത്തു. മതമോ ജാതിയോ രാഷ്ട്രീയമോ നോക്കാതെ മനുഷ്യര്ക്ക് പ്രാധാന്യം നല്കുന്ന ഒത്തുചേരലുകള് നമ്മുടെ സമൂഹത്തില് അനിവാര്യമാണ്. ഓണം നല്കുന്ന ഏറ്റവും വലിയ സന്ദേശവും ഇതാണ്. ഒരു ഐതിഹ്യത്തിനപ്പുറം മനുഷ്യരെല്ലാം ഒന്നുപോലെ എന്ന ചിന്തയിലേക്ക് നമ്മളെ നയിക്കാന് ഓണത്തിന് സാധിക്കുന്നു. സമൃദ്ധിയും സന്തോഷവും നിറഞ്ഞ ഒരു കാലം എല്ലാവര്ക്കും ഉണ്ടാകട്ടെ എന്നും ശ്രേഷ്ഠ ബാവ ആശംസിച്ചു.
മാന്യമായി ജീവിക്കാന് ഈ നാട്ടിലെ ഓരോ വ്യക്തിക്കും അവകാശമുണ്ട്. ഈ അവകാശം നിഷേധിക്കപ്പെടുമ്പോള് അത് മനുഷ്യ സംസ്കാരത്തിന് ഏല്ക്കുന്ന ആഘാതമാണ്. മതമോ വിശ്വാസമോ രാഷ്ട്രീയമോ ഇതിന് തടസ്സമാകരുത്. എല്ലാവര്ക്കും അടിസ്ഥാന ആവശ്യങ്ങള് ലഭ്യമാക്കണം. അത് എവിടെ നിഷേധിക്കപ്പെടുന്നുവോ അവിടെയെല്ലാം അതിന് ഉത്തരവാദി നമ്മളെല്ലാവരുമാണ്. ഈ ഉത്തരവാദിത്തബോധത്തോടെ നമ്മുടെ കേരളത്തെ ഒന്നായി കാണാന് നമുക്ക് സാധിക്കണം. ഈ ഓണക്കാലത്ത് നമുക്ക് അതിനായി പ്രതിജ്ഞയെടുക്കാമെന്ന് ബാവ ആഹ്വാനം ചെയ്തു.
കാലം മാറുമ്പോള് നമ്മുടെ സംസ്കാരത്തിലും വസ്ത്രധാരണത്തിലും ഭക്ഷണരീതികളിലുമെല്ലാം മാറ്റങ്ങള് സംഭവിക്കുന്നു. ‘നാടോടുമ്പോള് നടുവേ ഓടുക’ എന്ന പ്രവണതയില് നമ്മള് പലതും മറന്നുപോകുന്നു. ഈ ഓണക്കാലം നമ്മുടെ പഴമയിലേക്ക് ഒരു മടങ്ങിപ്പോക്ക് കൂടിയാണ്. വേഷവും കലയും ഭക്ഷണവും രുചികളും നിറങ്ങളും മണവുമെല്ലാം ഓര്ത്തെടുക്കാനുള്ള സമയമാണിത്. ‘എല്ലാവരും നല്ലവരായിരിക്കണം’ എന്ന സന്ദേശം ഉള്ക്കൊണ്ട് ഈ ഓണത്തിന്റെ സന്തോഷം എല്ലാവരിലേക്കും ആഴത്തില് പടരട്ടെ എന്ന് ശ്രേഷ്ഠ ബാവ പറഞ്ഞു.
ശ്രേഷ്ഠ ബാവായോടൊപ്പം മീഡിയ സെല് ചെയര്മാന് ഡോ. കുര്യാക്കോസ് മോര് തെയോഫിലോസ് മെത്രാപ്പോലീത്ത, സഭാ മാനേജിംഗ് കമ്മിറ്റിയംഗങ്ങളായ എല്ദോസ് മോനോത്തുമാലില്, ഗ്ലീസന് ബേബി, സ്ലീബാ കാട്ടുമങ്ങാട്ട് കോര് എപ്പിസ്കോപ്പ, മുന് സഭാ സെക്രട്ടറി ജോര്ജ് മാത്യു തെക്കേത്തലയ്ക്കല്, ജെ എസ് സി ന്യൂസ് എഡിറ്റര് ജൂഡിന് ജോയി എന്നിവരും സംബന്ധിച്ചു. പരിശുദ്ധ സഭയുടെ പ്രതിസന്ധി ഘട്ടങ്ങളില് മാധ്യമ പ്രവര്ത്തകര് നല്കിയ സഹകരണത്തിനും പിന്തുണയ്ക്കും മെത്രാപ്പോലീത്ത നന്ദി പറഞ്ഞു.
ചാവറ കള്ച്ചറല് സെന്റര് ഡയറക്ടര് ഫാ. അനില് ഫിലിപ്പ്, മുന് കേന്ദ്ര മന്ത്രി പ്രൊഫ. കെ വി തോമസ്, എം പിമാരായ ബെന്നി ബഹനാന്, ഹൈബി ഈഡന്, ഹംദുള്ള സെയ്ദ്, എം എല് എമാരായ കെ ബാബു, ടി ജെ വിനോദ്, അന്വര് സാദത്ത്, സി പി എം ജില്ലാ സെക്രട്ടറി എസ് സതീഷ് കുമാര്, സി പി ഐ ജില്ലാ സെക്രട്ടറി എന് അരുണ്, ഡി സി സി പ്രസിഡന്റ് മുഹമ്മദ് ഷിയാസ്, ബി ജെ പി സിറ്റി ജില്ലാ പ്രസിഡന്റ് കെ എസ് ഷൈജു, സി ജി രാജഗോപാല്, സി പി എം ജില്ലാ സെക്രട്ടേറിയറ്റ് അംഗം കെ എസ് അരുണ്കുമാര്, എ ഐ വൈ എഫ് ജില്ലാ സെക്രട്ടറി കെ ആര് റെനീഷ്, ജില്ലാ കമ്മിറ്റിയംഗം ടി സി സഞ്ജിത്, റീജിയണല് സ്പോര്ട്സ് സെന്റര് സെക്രട്ടറി എസ് എ എസ് നവാസ്, കൗണ്ലിസര്മാര് തുടങ്ങിയവര് പങ്കെടുത്തു.
പൂക്കള മത്സരത്തില് വനിത ടീം ഒന്നാം സ്ഥാനവും രണ്ടാം സ്ഥാനം 24 ന്യൂസും കരസ്ഥമാക്കി. മാതൃഭൂമി മൂന്നാം സ്ഥാനം നേടി. കാഞ്ഞൂര് നാട്ടു പൊലിമയുടെ നാടന് പാട്ടും അരങ്ങേറി.
