ന്യൂഡല്ഹി: കാര്ഷിക നിയമങ്ങള് റദ്ദാക്കാനുള്ള ബില്ലിന് കേന്ദ്ര മന്ത്രിസഭ അംഗീകാരം നല്കിയതായി ദേശീയ മാധ്യമങ്ങള് റിപ്പോര്ട്ട് ചെയ്തു. മൂന്ന് കേന്ദ്ര കാര്ഷിക നിയമങ്ങളും റദ്ദാക്കുമെന്ന പ്രധാനമന്ത്രി നരേന്ദ്ര മോദിയുടെ പ്രഖ്യാപനത്തിന് പിന്നാലെയാണ് 2021ലെ ഫാം ലോസ് റിപ്പീല് ബില്ലിന് അംഗീകാരം ലഭിച്ചത്.
നവംബര് 29ന് ആരംഭിക്കുന്ന പാര്ലമെന്റിന്റെ ശീതകാല സമ്മേളനത്തില് പാസാക്കുന്നതിനായി പുതിയ ബില് ഇനി ലോക്സഭയില് അവതരിപ്പിക്കും.
കേന്ദ്രസര്ക്കാരിന്റെ മൂന്ന് കാര്ഷിക നിയമങ്ങളും പിന്വലിക്കണമെന്നാവശ്യപ്പെട്ട് ഒരു വര്ഷത്തിലേറെയായി കര്ഷകര് സമരം തുടരുന്നതിനിടെയാണ് നിയമം പിന്വലിക്കുന്നതായി ഗുരുനാനാക്ക് ജയന്തി ദിനത്തില് പ്രധാനമന്ത്രി പ്രഖ്യാപനം നടത്തിയത്.
നിയമങ്ങള് റദ്ദാക്കാനുള്ള ബില് അടുത്ത പാര്ലമെന്റ് ശൈത്യകാല സമ്മേളനത്തില് കൊണ്ടുവരുമെന്നും മോദി അറിയിച്ചിരുന്നു. പഞ്ചാബ്, ഉത്തര്പ്രദേശ് തുടങ്ങിയ സംസ്ഥാനങ്ങളില് നിയമസഭാ തെരഞ്ഞെടുപ്പ് അടുത്തിരിക്കുന്ന സാഹചര്യത്തില് പരാജയ ഭയത്തെ തുടര്ന്നായിരുന്നു കേന്ദ്ര സര്ക്കാറിന്റെ നീക്കം.
