ബാങ്കോക്ക്: മധ്യപൂര്‍വേഷ്യയിലെ സംഘര്‍ഷങ്ങള്‍, ഊര്‍ജവിലയിലെ വര്‍ധന, എല്‍നിനോ പ്രതിഭാസത്തിന്റെ കടുത്ത കാലാവസ്ഥാ പ്രത്യാഘാതങ്ങള്‍, ഉയര്‍ന്ന പലിശനിരക്ക് എന്നിവ മൂലം ദശലക്ഷക്കണക്കിന് ആളുകള്‍ ദാരിദ്ര്യത്തിലേക്ക് തള്ളപ്പെടാന്‍ സാധ്യതയുണ്ടെന്ന് ഐക്യരാഷ്ട്രസഭയുടെ വികസന പരിപാടി (യു എന്‍ ഡി പി) അഡ്മിനിസ്‌ട്രേറ്റര്‍ അലക്‌സാണ്ടര്‍ ഡി ക്രൂ മുന്നറിയിപ്പ് നല്‍കി.
ഊര്‍ജവിലയിലുണ്ടായ വര്‍ധനയുടെ ആഘാതം നേരിടുന്നതിനായി പല വികസ്വര രാജ്യങ്ങളും തുടക്കത്തില്‍ വിപുലമായ സാമ്പത്തിക സഹായ പദ്ധതികള്‍ നടപ്പാക്കിയിരുന്നു. എന്നാല്‍ തുടര്‍ച്ചയായ പ്രതിസന്ധികള്‍ ഈ രാജ്യങ്ങളുടെ സാമ്പത്തിക വിഭവങ്ങള്‍ ചോര്‍ത്തുകയും ജനങ്ങള്‍ക്ക് ആശ്വാസം നല്‍കുന്നതിനുള്ള നടപടികള്‍ തുടരാനുള്ള ശേഷി പരിമിതപ്പെടുത്തുകയും ചെയ്തതായി അദ്ദേഹം പറഞ്ഞു.
മുന്‍കാല സാമ്പത്തിക ആഘാതങ്ങളില്‍നിന്ന് കരകയറുന്നതിനോ ധനകാര്യ കരുതല്‍ ശേഖരം പുനര്‍നിര്‍മിക്കുന്നതിനോ ആവശ്യമായ സമയം ലഭിക്കുന്നതിന് മുമ്പുതന്നെ വികസ്വര രാജ്യങ്ങള്‍ക്ക് പുതിയ പ്രതിസന്ധികളെ നേരിടേണ്ടിവരുന്നതായും അദ്ദേഹം ചൂണ്ടിക്കാട്ടി.
ദക്ഷിണ- കിഴക്കന്‍ ഏഷ്യന്‍ രാജ്യങ്ങളും ഉപസഹാറന്‍ ആഫ്രിക്കന്‍ മേഖലയുമാണ് ഇത്തരം സാമ്പത്തിക ആഘാതങ്ങള്‍ക്ക് ഏറ്റവും കൂടുതല്‍ ഇരയാകാന്‍ സാധ്യതയുള്ള പ്രദേശങ്ങളെന്ന് ഡി ക്രൂ വ്യക്തമാക്കി. തുടര്‍ച്ചയായ പ്രതിസന്ധികള്‍ നേരിടുന്ന ഈ രാജ്യങ്ങള്‍ക്ക് ആശ്വാസം നേടുന്നതിനും പ്രതിസന്ധികളെ ഫലപ്രദമായി നേരിടുന്നതിനും അടിയന്തരമായി സമയം, പ്രവര്‍ത്തനസ്വാതന്ത്ര്യം, ആവശ്യമായ ധനസഹായം എന്നിവ ലഭ്യമാക്കേണ്ടതുണ്ടെന്നും അദ്ദേഹം പറഞ്ഞു.
പ്രതിസന്ധികള്‍ വര്‍ധിക്കുന്നതോടെ വികസ്വര രാജ്യങ്ങള്‍ക്ക് ആവശ്യമായ മൂലധനം ലഭ്യമാക്കുന്നത് കൂടുതല്‍ ദുഷ്‌കരമാകുകയാണെന്നും ഉയര്‍ന്ന പലിശനിരക്ക് കടബാധ്യതകളുടെ തിരിച്ചടവ് ഭാരം വര്‍ധിപ്പിക്കുകയാണെന്നും ഡി ക്രൂ മുന്നറിയിപ്പ് നല്‍കി.
