ന്യൂയോര്‍ക്ക്: ഫിഫ ലോകകപ്പ് 2022ന് ഖത്തര്‍ ആതിഥേയത്വം വഹിക്കുന്നതിനെ യു എന്‍ ജനറല്‍ അസംബ്ലി സ്വാഗതം ചെയ്തു. മിഡില്‍ ഈസ്റ്റിലെ ആദ്യ ഫിഫ ലോകകപ്പിന്റെ അതുല്യമായ നീക്കത്തെ പ്രമേയം സ്വാഗതം ചെയ്തു. ഖത്തറില്‍ ഫിഫ സംഘടിപ്പിക്കുന്ന 2022 ലോകകപ്പ് എന്ന തലക്കെട്ടിലാണ് ജനറല്‍ അസംബ്ലി പ്രമേയം അംഗീകരിച്ചത്.
സമാധാനത്തിനും വികസനത്തിനും കായികം എന്ന തലക്കെട്ടില്‍ 106 രാജ്യങ്ങള്‍ സ്‌പോണ്‍സര്‍ ചെയ്ത പ്രമേയം ഖത്തര്‍ അവതരിപ്പിച്ചു. സ്‌പോര്‍ട്‌സ്, ഒളിംപിക്‌സ് എന്നിവയിലൂടെ സമാധാനപരവും മികച്ചതുമായ ലോകം കെട്ടിപ്പടുക്കാന്‍ പ്രമേയം ആഹ്വാനം ചെയ്തു.
കായിക മേഖലയ്ക്ക് പ്രത്യേകിച്ച് ഫുട്ബാളിന് അതിന്റെ സാര്‍വത്രിക ജനപ്രീതി കണക്കിലെടുക്കുമ്പോള്‍ സമാധാനവും വികസനവും മനുഷ്യാവകാശങ്ങളോടുള്ള ബഹുമാനം, ലിംഗസമത്വം, ശാക്തീകരണം എന്നിവയില്‍ പ്രധാന പങ്ക് വഹിക്കാനുണ്ടെന്ന് 193 അംഗ സംഘടനകളും ഊന്നിപ്പറഞ്ഞു.
2022 ലോകകപ്പിനെ വഴികാട്ടിയാക്കാന്‍ ലക്ഷ്യമിട്ടുള്ള ഫിഫയും ലോകാരോഗ്യ സംഘടനയും ഖത്തറും തമ്മില്‍ ഒന്നിലധികം വര്‍ഷത്തെ സഹകരണത്തോടെ ആരോഗ്യകരമായ 2022 ലോകകപ്പ് കായികത്തിനും ആരോഗ്യത്തിനും പൈതൃകം സൃഷ്ടിക്കുന്നു പദ്ധതിക്ക് അസംബ്ലി പിന്തുണ പ്രഖ്യാപിച്ചു. ആരോഗ്യകരമായ ജീവിതം, ശാരീരികവും മാനസികവുമായ ആരോഗ്യം, മാനസിക സാമൂഹിക ക്ഷേമം എന്നിവ ഇതിലൂടെ പ്രോത്സാഹിപ്പിക്കപ്പെടും.
2022 ടൂര്‍ണമെന്റ് മേഖലയിലെ സമാധാനത്തിനും വികസനത്തിനും ശാശ്വതമായ പാരമ്പര്യം നല്കുന്നുവെന്ന് ഉറപ്പാക്കാന്‍ എല്ലാ ശ്രമങ്ങളും നടത്താന്‍ ബന്ധപ്പെട്ട അധികാരികളെ ജനറല്‍ അസംബ്ലി പ്രോത്സാഹിപ്പിച്ചു.
ഖത്തറില്‍ അറബ് ലോകത്തെ അസാധാരണമായ ലോകകപ്പ് അവതരിപ്പിക്കുമെന്ന് ലോകം കാണുന്ന നിമിഷം വരെ അഭിമാനവും സന്തോഷവും തോന്നുന്നുവെന്നും ഇത്തരം കായിക മത്സരങ്ങളുടെ സ്വാധീനം വിനോദത്തില്‍ മാത്രം ഒതുങ്ങുന്നില്ലെന്നും അതിനുമപ്പുറം ലോകജനതകള്‍ തമ്മിലുള്ള അടുപ്പത്തിലേക്കും പരസ്പര പരിചയത്തിലേക്കും നയിക്കുന്ന ഉന്നതവും ഉയര്‍ന്നതുമായ ഘട്ടത്തിലേക്ക് പോകുന്നുവെന്നുമുള്ള അമീര്‍ ശൈഖ് തമീം ബിന്‍ ഹമദ് അല്‍താനിയുടെ വാചകങ്ങള്‍ ഉദ്ധരിച്ചുകൊണ്ടാണ് ഐക്യരാഷ്ട്രസഭയിലെ ഖത്തറിന്റെ സ്ഥിരം പ്രതിനിധി ശൈഖ ആലിയ അഹമ്മദ് ബിന്‍ സൈഫ് അല്‍താനി തന്റെ പ്രമേയ അവതരണ പ്രസംഗം ആരംഭിച്ചത്. രണ്ടു വര്‍ഷത്തിലേറെയായി ലോകം അനുഭവിച്ച മഹാമാരിക്ക് ശേഷം ലോകത്തെ ഒന്നിപ്പിക്കുന്ന ആദ്യത്തെ പ്രധാന സംഭവമായിരിക്കും ലോകകപ്പെന്നും ശൈഖ ആലിയ കൂട്ടിച്ചേര്‍ത്തു.
2022ലെ ഫിഫ ലോകകപ്പ് ഖത്തറിലേക്ക് ലോകമെമ്പാടുമുള്ള വിശിഷ്ടാതിഥികളെ സ്വാഗതം ചെയ്യാന്‍ ഖത്തര്‍ ആകാംക്ഷയോടെയും ഉത്സാഹത്തോടെയും കാത്തിരിക്കുകയാണെന്ന അടിവരയിട്ട ഖത്തറിന്റെ ഐക്യരാഷ്ട്ര സഭയിലെ സ്ഥിരം പ്രതിനിധി അറബ് സംസ്‌ക്കാരത്തിന്റേയും ആതിഥ്യ മര്യാദയുടേയും എല്ലാ സവിശേഷതകളും ഉള്‍ക്കൊള്ളുന്ന അനുഭവമായി ഓര്‍മയില്‍ പതിഞ്ഞു കിടക്കുമെന്നും വിശദമാക്കി.
