ദോഹ: അല്-ജുമൈലിയയിലെ അല്-റഫീഖ് പ്രദേശത്തെ ചരിത്രപ്രസിദ്ധമായ പള്ളി എന്ഡോവ്മെന്റ് (ഔഖാഫ്) മന്ത്രാലയം അറ്റകുറ്റപ്പണികള് പൂര്ത്തിയാക്കി ഉദ്ഘാടനം ചെയ്തു. നഗരവളര്ച്ച, ജനസംഖ്യാ വര്ധന, ഖത്തര് ദേശീയ ദര്ശനം 2030 എന്നിവയ്ക്ക് അനുസൃതമായി രാജ്യത്തിന്റെ എല്ലാ മേഖലകളിലുമുള്ള പള്ളികള് വികസിപ്പിക്കാനുള്ള മന്ത്രാലയത്തിന്റെ പദ്ധതിയുടെ ഭാഗമാണിത്.
ചരിത്രപ്രധാനമായ പള്ളിയില് 36 ആരാധകരെ ഉള്ക്കൊള്ളാന് കഴിയുന്ന ഒരു പ്രധാന പ്രാര്ഥനാ ഹാളും വെള്ളിയാഴ്ച പ്രാര്ത്ഥനകള് നടക്കുന്ന അതേ എണ്ണം ആളുകളെ ഉള്ക്കൊള്ളാന് കഴിയുന്ന പള്ളിയുടെ ലിവാനും ഉണ്ട്.
120 ചതുരശ്ര മീറ്റര് വിസ്തീര്ണ്ണമുള്ള മുറ്റവും പള്ളിയില് ഉള്പ്പെടുന്നു, അതിന്റെ തെക്കുകിഴക്കന് മൂലയില് പരമ്പരാഗത വാസ്തുവിദ്യാ ശൈലി പ്രതിഫലിപ്പിക്കുന്ന ഒരു മിനാരമുണ്ട്, അതേസമയം വുദു പ്രദേശം വടക്കുകിഴക്കന് ഭാഗത്താണ് സ്ഥിതി ചെയ്യുന്നത്.
പള്ളിയുടെ പൈതൃക സ്വഭാവം സംരക്ഷിക്കുന്നതിനായി പുറം, ഉള് ഭിത്തികളില് അറ്റകുറ്റപ്പണികള് നടത്തിയതായും ചരിത്രപരമായ പള്ളികളുടെ പരമ്പരാഗത വാസ്തുവിദ്യാ മനോഭാവത്തിന് അനുസൃതമായി പുതിയ മേല്ക്കൂരയുടെ നിര്മ്മാണം ഉള്പ്പെടെ നടത്തിയതായും മന്ത്രാലയം വിശദീകരിച്ചു.
പള്ളിയുടെ പൈതൃക സത്ത സംരക്ഷിക്കേണ്ടതിന്റെ പ്രാധാന്യം ഊന്നിപ്പറഞ്ഞ മന്ത്രാലയം, പുതിയ വൈദ്യുത ശൃംഖല, എയര് കണ്ടീഷനിംഗ്, ലൈറ്റിംഗ്, ശബ്ദ സംവിധാനങ്ങള്, സുരക്ഷാ ഉപകരണങ്ങള് എന്നിവ സൗകര്യത്തില് സജ്ജീകരിച്ചിട്ടുണ്ടെന്നും കൂട്ടിച്ചേര്ത്തു.
