അറ്റ്ലാന്റ: അവസാന നിമിഷങ്ങളിലെ നാടകീയ തിരിച്ചുവരവിലൂടെ ഇംഗ്ലണ്ടിനെ 2-1ന് കീഴടക്കിയ അര്ജന്റീന തുടര്ച്ചയായ രണ്ടാം ഫിഫ ലോകകപ്പ് ഫൈനലിലേക്ക്. ജൂലൈ 19ന് ന്യൂജഴ്സിയിലെ മെറ്റ്ലൈഫ് സ്റ്റേഡിയത്തില് നടക്കുന്ന ഫൈനലില് സ്പെയിനാണ് അര്ജന്റീനയുടെ എതിരാളി.
ഫ്രാന്സിനെ 2-0ന് തോല്പ്പിച്ച് സെമിയില് മുന്നേറിയ സ്പെയിനിനെതിരെയാണ് കിരീടപ്പോരാട്ടം. തുടര്ച്ചയായ രണ്ടാം ലോകകപ്പ് കിരീടമാണ് ലയണല് മെസിയും സംഘവും ലക്ഷ്യമിടുന്നത്.
മത്സരത്തിന്റെ തുടക്കത്തില് ആന്റണി ഗോര്ഡന്റെ ഗോളില് ഇംഗ്ലണ്ട് ലീഡ് നേടിയിരുന്നു. ഏറെ നേരം പിന്നിലായിരുന്ന അര്ജന്റീനയ്ക്ക് ആക്രമണങ്ങള് ഫലമാകാതെ പോയെങ്കിലും പരിശീലകന് ലയണല് സ്കലോണിയുടെ നിര്ണായക മാറ്റങ്ങള് മത്സരത്തിന്റെ ഗതി മാറ്റി.
രണ്ടാം പകുതിയുടെ അവസാന ഘട്ടത്തില് എന്സോ ഫെര്ണാണ്ടസ് സമനില ഗോള് നേടി അര്ജന്റീനയ്ക്ക് പ്രതീക്ഷ തിരികെ നല്കി. ഈ ലോകകപ്പില് ഈജിപ്തിനെതിരായ വിജയഗോളിനുശേഷം ഫെര്ണാണ്ടസിന്റെ മറ്റൊരു നിര്ണായക ഗോളായിരുന്നു ഇത്.
ഇഞ്ചുറി ടൈമില് അര്ജന്റീന വിജയഗോളും നേടി. പകരക്കാരനായി ഇറങ്ങിയ ലൗട്ടാരോ മാര്ട്ടിനസ് ആദ്യ അവസരങ്ങളിലൊന്നില് തന്നെ ഇംഗ്ലണ്ടിന്റെ വല കുലുക്കുകയായിരുന്നു. അലക്സിസ് മാക് അലിസ്റ്ററുടെ ഷോട്ട് പോസ്റ്റില് തട്ടി മടങ്ങിയ പന്ത് മെസി വീണ്ടെടുത്ത് വലതുവിങ്ങിലൂടെ മുന്നേറി നല്കിയ കൃത്യമായ ക്രോസാണ് മാര്ട്ടിനസ് ഹെഡറിലൂടെ ഗോളാക്കിയത്.
വിജയഗോളോടെ സ്റ്റേഡിയത്തിലുണ്ടായിരുന്ന അര്ജന്റീന ആരാധകര് ആഘോഷത്തില് മുങ്ങി. മറുവശത്ത് ഇംഗ്ലണ്ട് ആരാധകര് ഞെട്ടലോടെയാണ് മത്സരം അവസാനിക്കുന്നത് കണ്ടത്.
അവസാന വിസില് മുഴങ്ങിയതോടെ 2-1ന്റെ തകര്പ്പന് വിജയവുമായി അര്ജന്റീന ലോകകപ്പ് ഫൈനലിലേക്ക് യോഗ്യത ഉറപ്പിച്ചു.
