മുംബൈ: ബോളിവുഡ് താരം ഷാരൂഖ് ഖാന്റെ മകന് ആര്യന് ഖാനെതിരായ മയക്കുമരുന്ന് കേസില് പുതിയ ആരോപണം. കേസിലെ സാക്ഷി കെ പി ഗോസാവിയും സാം ഡിസൂസ എന്നയാളുമായി 18 കോടിയുടെ ‘ഡീല്’ ചര്ച്ച നടന്നു എന്നാണ് ആരോപണം. എട്ട് കോടി എന് സി ബി ഉദ്യോഗസ്ഥന് സമീര് വാങ്കഡെയ്ക്ക് നല്കാനും ധാരണയായെന്ന് പ്രഭാകര് സെയില് എന്നയാള് ആരോപിച്ചു. കെ പി ഗോസാവിയുടെ അംഗരക്ഷകനാണ് പ്രഭാകര് സെയില്.
ആരോപണം സമീര് വാങ്കഡെ നിഷേധിച്ചു. ‘നിങ്ങള് 25 കോടിയുടെ ബോംബിട്ടു. നമുക്കിത് 18 കോടിയില് ഒതുക്കിത്തീര്ക്കാം. 8 കോടി സമീര് വാങ്കഡെയ്ക്ക് നല്കാം’- ഒക്ടോബര് മൂന്നിന് സാം ഡിസൂസ എന്നയാളും കേസിലെ സാക്ഷിയായ ഗോസാവിയും തമ്മില് കണ്ടെന്നും ഇക്കാര്യമാണ് അവര് സംസാരിച്ചതെന്നും പ്രഭാകര് സെയില് നല്കിയ സത്യവാങ്മൂലത്തില് പറയുന്നു. സാം ഡിസൂസ ആരാണെന്ന് ഇപ്പോള് വ്യക്തമല്ല. ഇരുവരും ഗൂഢാലോചന നടത്തി ഷാരൂഖില് നിന്നും പണം തട്ടാനാണോ പദ്ധതിയിട്ടതെന്നും വ്യക്തമായിട്ടില്ല.
ആര്യന് ഖാനെ എന് സി ബി ഓഫീസിലെത്തിച്ചപ്പോള് കെ പി ഗോസാവിയെടുത്ത സെല്ഫി സോഷ്യല് മീഡിയയില് വൈറലായിരുന്നു. എന്നാല് ആരോപണം അടിസ്ഥാനരഹിതമാണെന്ന് സമീര് വാങ്കഡെ പ്രതികരിച്ചു. അങ്ങനെ പണം വാങ്ങിയിട്ടുണ്ടെങ്കില് ഈ കേസില് ആരെങ്കിലും ജയിലില് അടയ്ക്കപ്പെടുമായിരുന്നോ എന്നാണ് വാങ്കഡെയുടെ ചോദ്യം.
എന്സിബിയുടെ പ്രതിച്ഛായയെ അപകീര്ത്തിപ്പെടുത്താന് വേണ്ടി മാത്രമാണ് ഈ ആരോപണങ്ങള്. ഓഫീസില് സി സി ടി വി ക്യാമറകളുണ്ട്. ആരോപിക്കുന്നതുപോലെ ഒന്നും സംഭവിച്ചിട്ടില്ലെന്നും വാങ്കഡെ പറഞ്ഞു. തന്നെക്കൊണ്ട് എന് സി ബി ഉദ്യോഗസ്ഥര് 10 വെള്ള പേപ്പറില് ഒപ്പിടുവിച്ചെന്നും പ്രഭാകര് സെയില് ആരോപിച്ചു. ഈ ആരോപണവും എന് സി ബി ഉദ്യോഗസ്ഥര് നിഷേധിച്ചു. ഒക്ടോബര് രണ്ടിന് മുമ്പ് പ്രഭാകര് സെയിലിനെ കുറിച്ച് തങ്ങള് കേട്ടിട്ടില്ലെന്നും അയാള് ആരാണെന്ന് അറിയില്ലെന്നും എന്സിബി ഉദ്യോഗസ്ഥര് പറയുന്നു.
