കളമശ്ശേരി: ടൊവിനോ തോമസ് നായകനായ ചിത്രം തല്ലുമാല ചിത്രീകരണത്തിന്റെ രണ്ടാം ഷെഡ്യൂള് സെറ്റില് സംഘര്ഷം. മാലിന്യം ഇടുന്നത് ചോദ്യം ചെയ്ത നാട്ടുകാരനെ ഷൈന് ടോം ചാക്കോ തല്ലിയെന്ന ആരോപണമുയര്ന്നതിനെ തുടര്ന്നാണ് സംഘര്ഷമുണ്ടായത്. എച്ച് എം ഡി മാപ്പിളാസ് ഗോഡൗണില് സിനിമയുടെ ചിത്രീകരണം നടക്കവേയാണ് വാക്കേറ്റവും ഉന്തും തള്ളും ഉണ്ടായത്.
മാലിന്യം ഇടുന്നതിനേയും പൊതുനിരത്തില് വണ്ടി പാര്ക്ക് ചെയ്തതിനേയും നാട്ടുകാര് ചോദ്യം ചെയ്തു. ഇവരുമായി ചിത്രത്തിന്റെ അണിയറ പ്രവര്ത്തകും ഷൈനും ചേര്ന്ന് വാക്കേറ്റം നടത്തിയെന്നും ആരോപിക്കുന്നു.
തര്ക്കത്തിനിടയിക്ക് ടൊവിനോയും ഇടപെട്ടു. ഇതോടെ സ്ഥലത്ത് സംഘര്ഷാവസ്ഥ ഉണ്ടാവുകയായിരുന്നു. പൊലീസ് സ്ഥലത്ത് എത്തി ഇരുകൂട്ടരുമായി സംസാരിച്ച് സ്ഥിതിഗതികള് ശാന്തമാക്കുകയായിരുന്നു.
നേരത്തെ തലശ്ശേരിയിലായിരുന്നു തല്ലുമാലയുടെ ആദ്യ ഷെഡ്യൂള് ചിത്രീകരിച്ചത്. തലശ്ശേരിയിലെ നിറപ്പകിട്ടാര്ന്ന ലൊക്കേഷന് നേരത്തെ തന്നെ വാര്ത്തകളില് ഇടം പിടിച്ചിരുന്നു.
ഖാലിദ് റഹ്മാനാണ് ചിത്രത്തിന്റെ സംവിധായകന്. മുഹ്സിന് പരാരിയും അഷ്റഫ് ഹംസയും ചേര്ന്ന് കഥയൊരുക്കുന്ന ചിത്രം ആഷിക് ഉസ്മാന് ആണ് നിര്മിക്കുന്നത്. കല്യാണി പ്രിയദര്ശന് ആണ് ചിത്രത്തിലെ നായിക. ഷൈന് ടോം ചാക്കോ, ലുക്മാന്, ചെമ്പന് വിനോദ് ജോസ് തുടങ്ങിയവരാണ് ചിത്രത്തിലെ മറ്റ് കഥാപാത്രങ്ങളെ അവതരിപ്പിക്കുന്നത്. ഛായാഗ്രഹണം ജിംഷി ഖാലിദ്, സംഗീതം വിഷ്ണു വിജയ്, ഗാനരചന മുഹ്സിന് പരാരി, എഡിറ്റിംഗ് നിഷാദ് യൂസഫ്.
