ദോഹ: കേരള സര്‍ക്കാരിന്റെ പ്രവാസി ക്ഷേമ ബോര്‍ഡ് ഡയറക്ടറായി ചുമതലയേറ്റ സംസ്‌കൃതി മുന്‍ ജനറല്‍ സെക്രട്ടറിയും ലോകകേരളസഭ അംഗവും ഖത്തറിലെ കലാ- സാംസ്‌കാരിക- സാമൂഹ്യ പ്രവര്‍ത്തകനുമായ ഇ എം സുധീറിന് സംസ്‌കൃതിയുടെയും ലോക കേരള സഭ അംഗങ്ങളുടെയും സംയുക്ത ആഭിമുഖ്യത്തില്‍ ഖത്തറിലെ പ്രവാസി സമൂഹം സ്വീകരണം നല്‍കുന്നു.
ജൂലൈ 14 വെള്ളിയാഴ്ച വൈകുന്നേരം ആറരയ്ക്ക് അബുഹമൂറിലെ ഐ സി സി അശോകാ ഹാളില്‍ നടക്കുന്ന പരിപാടി പ്രവാസി ക്ഷേമ ബോര്‍ഡ് ചെയര്‍മാനും
മുന്‍ എം എല്‍ എയുമായ കെ വി അബ്ദുല്‍ ഖാദര്‍ ഉദ്ഘാടനം ചെയ്യും.
ഖത്തറിലെ വിവിധ സംഘടനാ നേതാക്കളും സാമൂഹ്യ- സാംസ്‌കാരിക പ്രവര്‍ത്തകരും പങ്കെടുക്കുമെന്ന് സംഘാടകര്‍ വാര്‍ത്താ സമ്മേളനത്തില്‍ അറിയിച്ചു.
പ്രവാസി ക്ഷേമനിധിയുടെ വിവിധ പ്രവര്‍ത്തനങ്ങളെ അടുത്തറിയാനും ആശംസകള്‍ അറിയിക്കാനും അവസരം ഉപയോഗപ്പെടുത്തണമെന്ന് പ്രവാസി സുഹൃത്തുക്കളോട് സംഘാടക സമിതി അഭ്യര്‍ഥിച്ചു.
കേരള പ്രവാസി കേരളീയ ക്ഷേമ ബോര്‍ഡ് ചെയര്‍മാന്‍ കെ വി അബ്ദുല്‍ ഖാദര്‍, ക്ഷേമ ബോര്‍ഡ് ഡയരക്ടര്‍ ഇ എം സുധീര്‍, സംസ്‌കൃതി പ്രസിഡന്റ് അഹമ്മദ്കുട്ടി, സംസ്‌കൃതി ജനറല്‍ സെക്രട്ടറി എ കെ ജലീല്‍, സംഘാടക സമിതി കണ്‍വീനര്‍ എ സുനില്‍കുമാര്‍ എന്നിവര്‍ വാര്‍ത്താ സമ്മേളനത്തില്‍ പങ്കെടുത്തു.
