കൊച്ചി: റിലീസിനായൊരുങ്ങുന്ന ബിഗ് ബഡ്ജറ്റ് ചിത്രം ‘ഹരിവരാസന’ത്തിനായി കൈകോര്‍ത്ത് അജിത് വിനായക ഫിലിംസും പനോരമ സ്റ്റുഡിയോസും. മലയാളി പ്രേക്ഷകര്‍ക്ക് മികവുറ്റ സിനിമകള്‍ സമ്മാനിച്ച അജിത് വിനായക ഫിലിംസും ഇന്ത്യയില്‍ തന്നെ വിവിധ ഭാഷകളില്‍ ബ്ലോക്ക്ബസ്റ്റര്‍ ചിത്രങ്ങള്‍ സമ്മാനിച്ച പനോരമ സ്റ്റുഡിയോസും ഹരിവരാസനം ചിത്രത്തിന്റെ നിര്‍മ്മാണത്തിലാണ് കൈകോര്‍ക്കുന്നത്. വിശ്വാസവും ഉദ്വേഗവും അതിരുകള്‍ക്കപ്പുറത്തേക്ക് നീളുന്ന മനുഷ്യബന്ധങ്ങളും സമന്വയിപ്പിക്കുന്ന ചിത്രം ‘ഹരിവരാസനം’ തിയേറ്ററില്‍ പ്രേക്ഷകര്‍ക്ക് വേറിട്ടൊരു സിനിമാനുഭവം സമ്മാനിക്കുമെന്നുറപ്പാണ്.
അജിത് വിനായക ഫിലിംസിന്റെ ബാനറില്‍ വിനായക അജിത്തും പനോരമ സ്റ്റുഡിയോസിന്റെ ബാനറില്‍ കുമാര്‍ മംഗത് പഥക്കും അഭിഷേക് പഥക്കും ചേര്‍ന്നാണ് ഹരിവരാസനം ചിത്രം നിര്‍മിക്കുന്നത്. രാജേഷ് നായര്‍ സംവിധാനം ചെയ്യുന്ന ചിത്രത്തിന്റെ രചന ഡോ. കെ അമ്പാടി നിര്‍വഹിക്കുന്നു.
വിശ്വാസവും യുക്തിചിന്തയും തമ്മിലുള്ള സങ്കീര്‍ണമായ ബന്ധങ്ങളിലൂടെയാണ് ‘ഹരിവരാസനം’ ചിത്രത്തിന്റെ കഥ പ്രേക്ഷകരിലേക്കെത്തുന്നത്. വൈകാരികമായ മുഹൂര്‍ത്തങ്ങള്‍ക്കൊപ്പം ആകാംക്ഷയും നിഗൂഢതയും നിറഞ്ഞ കഥാസന്ദര്‍ഭങ്ങളിലൂടെ മുന്നേറുന്ന ചിത്രം, പ്രമേയത്തിലെ വ്യത്യസ്തതകൊണ്ടും ശ്രദ്ധേയമാകുന്നു.
സൈജു കുറുപ്പാണ് ചിത്രത്തില്‍ നായകനായെത്തുന്നത്. യോഗി ബാബു, ബേബി ഇവ, സിതാര വിജയന്‍, സമ്പത്ത് രാജ് എന്നിവര്‍ക്കൊപ്പം ജോയ് മാത്യു, മണിയന്‍പിള്ള രാജു, ശ്യാമപ്രസാദ്, മധുപാല്‍, ടി ജി രവി, അഭിരാം എന്നിവരും ഹരിവരസനത്തിലെ പ്രധാന കഥാപാത്രങ്ങളെ അവതരിപ്പിക്കുന്നു.
രഞ്ജിന്‍ രാജാണ് ചിത്രത്തിന്റെ സംഗീതസംവിധാനം നിര്‍വഹിക്കുന്നത്. ഭക്തിയും വിശ്വാസവും ഉദ്വേഗജനകമായ കഥപറച്ചിലും ഒത്തുചേരുന്ന ‘ഹരിവരാസനം’ ചിത്രം മലയാള സിനിമയില്‍ ശ്രദ്ധേയമായൊരു സാന്നിധ്യമാകുമെന്നുറപ്പാണ്.
ഹരിവരാസനം ചിത്രത്തിലെ മറ്റു അണിയറപ്രവര്‍ത്തകര്‍ ഇവരാണ്: പ്രോജക്റ്റ് ഡിസൈനര്‍: മംഗളം ജയചന്ദ്രന്‍, ഡി ഒ പി: സജാദ് കാക്കു, എഡിറ്റര്‍: അജീഷ് ഇടമണ്‍, പ്രൊഡക്ഷന്‍ കണ്‍ട്രോളര്‍: ശശി പൊതുവാള്‍, പ്രൊഡക്ഷന്‍ ഡിസൈനര്‍: രാഖില്‍, വസ്ത്രാലങ്കാരം: സ്റ്റെഫി സേവ്യര്‍, ചീഫ് അസോസിയേറ്റ് ഡയറക്ടര്‍: പാര്‍ഥന്‍. സി, മേക്കപ്പ്: ഹസ്സന്‍ വണ്ടൂര്‍, അസോസിയേറ്റ് ഡയറക്റ്റര്‍: നിധീഷ്, സ്റ്റില്‍സ്: ജെഫിന്‍ ബിജോയ്, ഡിസൈന്‍: ഇല്ലുമിനാര്‍ട്ടിസ്റ്റ്, പി ആര്‍ ഒ: പ്രതീഷ് ശേഖര്‍.
