തിരുവനന്തപുരം: കോവിഡ് രണ്ടാം തരംഗത്തെ അതിജീവിച്ച് 1824 വരെ കുറഞ്ഞ രോഗബാധ കേരളത്തില് ഇരുപത്തിരണ്ടായിരത്തിലേറെയായി വര്ധിച്ചതിനാല് അതീവ ജാഗ്രത പാലിക്കണമെന്ന് ആരോഗ്യമന്ത്രി വീണാ ജോര്ജ്ജ് ആവശ്യപ്പെട്ടു.
ജനുവരി ഏഴിന് അയ്യായിരം കേസുകളുണ്ടായിരുന്ന സ്ഥാനത്ത് പത്തു ദിവസം കൊണ്ട് നാലിരട്ടി വര്ധനവാണ് രേഖപ്പെടുത്തിയിരിക്കുന്നതെന്നും ഫേസ്ബുക്ക് കുറിപ്പില് ആരോഗ്യമന്ത്രി വിശദീകരിച്ചു. ഇനിയും രോഗബാധ ഉയരാതിരിക്കാന് ജാഗ്രത പാലിക്കണമെന്ന് മന്ത്രി ആവശ്യപ്പെട്ടു. പൊതുസ്ഥലങ്ങളില് ഇറങ്ങുന്നവര് എന്95 മാസ്കോ ഇരട്ട മാസ്കോ ധരിക്കണമെന്നും മന്ത്രി ആവശ്യപ്പെട്ടു.
ആരോഗ്യമന്ത്രിയുടെ ഫേസ്ബുക്ക് കുറിപ്പിന്റെ പൂര്ണരൂപം:
സംസ്ഥാനത്തെ പ്രതിദിന കോവിഡ് കേസുകള് 22,000 കഴിഞ്ഞിരിക്കുന്നതിനാല് എല്ലാവരും അതീവ ജാഗ്രത പാലിക്കണം. കോവിഡ് രണ്ടാം തരംഗത്തെ അതിജീവിച്ച് സംസ്ഥാനത്തെ കോവിഡ് കേസുകള് ഡിസംബര് 26ന് 1824 വരെ കുറഞ്ഞതാണ്. എന്നാല് ക്രിസ്തുമസ്, ന്യൂ ഇയര് കഴിഞ്ഞതോടെ വളരെ പെട്ടെന്ന് കോവിഡ് കേസുകള് വര്ധിച്ചു. ജനുവരി ഏഴിന് കേവിഡ് കേസുകള് 5,000ന് മുകളിലായിരുന്നു. അത് കേവലം 10 ദിവസം കൊണ്ട് നാലിരട്ടിയിലധികമായി വര്ധിച്ചു. ജനുവരി 12ന് 12,000ന് മുകളിലും ജനുവരി 17ന് 22,000ന് മുകളിലും എത്തിയിട്ടുണ്ട്. ഇനിയും കോവിഡ് കേസുകള് കുത്തനെ ഉയരാതിരിക്കാന് എല്ലാവരും അതീവ ജാഗ്രത പാലിക്കണം. ആരില് നിന്നും കോവിഡ് പകരുന്ന അവസ്ഥയാണുള്ളത്. സ്വയം സുരക്ഷയാണ് ഏറ്റവും പ്രധാനം. പൊതുസ്ഥലങ്ങളില് ഇറങ്ങുന്നവര് ശരിയായവിധം എന് 95 മാസ്കോ, ഡബിള് മാസ്കോ ധരിക്കേണ്ടതാണ്.
കഴിഞ്ഞ ആഴ്ചയുമായി താരതമ്യം ചെയ്യുമ്പോള് റിപ്പോര്ട്ട് ചെയ്യപ്പെടുന്ന പുതിയ കോവിഡ് കേസുകളില് ഏകദേശം 60,161 വര്ധനവാണ് ഉണ്ടായിരിക്കുന്നത്. പുതിയ കേസുകളുടെ വളര്ച്ചാ നിരക്കില് 182 ശതമാനം വര്ധനവാണ് ഉണ്ടായിട്ടുള്ളത്. നിലവില് രോഗം സ്ഥിരീകരിച്ച് ചികിത്സയിലുള്ള രോഗികള് 160 ശതമാനവും ആശുപത്രികളിലെ രോഗികള് 41 ശതമാനവും ഫീല്ഡ് ആശുപത്രികളിലെ രോഗികള് 90 ശതമാനവും ഐ സി യുവിലെ രോഗികള് 21 ശതമാനവും വെന്റിലേറ്ററിലെ രോഗികള് 6 ശതമാനവും ഓക്സിജന് കിടക്കകളിലെ രോഗികള് 30 ശതമാനവും വര്ധിച്ചിട്ടുണ്ട്. പ്രായമായവര്ക്കും മറ്റനുബന്ധ രോഗമുള്ളവര്ക്കും കോവിഡ് ബാധിച്ചാല് പെട്ടന്ന് ഗുരുതരമാകാന് സാധ്യതയുണ്ട്. രോഗികളുടെ എണ്ണം കുത്തനെ ഉയര്ന്നാല് ആശുപത്രികളിലെത്തുന്ന രോഗികളുടെ എണ്ണവും ഗുരുതാവസ്ഥയിലെത്തുന്ന രോഗികളുടെ എണ്ണവും മരണങ്ങളും അധികമായുണ്ടായേക്കാം. ഇത് ആശുപത്രി സംവിധാനങ്ങളെ സമ്മര്ദത്തിലാക്കും. അതിനാല് എല്ലാവരും കൂടുതല് ശ്രദ്ധിക്കേണ്ടതാണ്.
പൊതു ചടങ്ങുകള് മാര്ഗനിര്ദേശ പ്രകാരം മാത്രം നടത്തേണ്ടതാണ്. എല്ലായിടത്തും ആളുകളെ പരമാവധി കുറയ്ക്കണം. പനിയും രോഗലക്ഷണങ്ങളുള്ളവരും മറച്ചുവച്ച് പൊതുയിടങ്ങളില് ഇറങ്ങരുത്. രോഗലക്ഷണങ്ങളുള്ളവര് ആരോഗ്യ പ്രവര്ത്തകരുടെ നിര്ദേശമനുസരിച്ച് കോവിഡ് പരിശോധന നടത്തണം. ഓഫീസുകളിലും സ്ഥാപനങ്ങളിലും എല്ലാവരും ശരിയായ വിധം മാസ്ക് ധരിക്കണം. ഒരുമിച്ചിരുന്ന് ഭക്ഷണം കഴിക്കാതിരിക്കാന് ശ്രദ്ധിക്കണം. കൈ കഴുകുന്ന സ്ഥലങ്ങളിലും തിരക്ക് കൂട്ടരുത്. അടച്ചിട്ട സ്ഥലങ്ങള് കോവിഡ് വ്യാപനത്തിന് കാരണമായതിനാല് ജനാലുകളും വാതിലുകളും തുറന്നിടണം. കടകളിലും ഷോപ്പിംഗ് മാളുകളിലും പോകുന്നവര് ഒരിക്കലും മാസ്ക് താഴ്ത്തരുത്. എല്ലാവരും കോവിഡ് മാര്ഗനിര്ദേശങ്ങള് പാലിക്കണം.
