ദോഹ: ഇന്ത്യന്‍ സ്‌കൂള്‍ വിദ്യാര്‍ഥികള്‍ക്കായി ഇന്ത്യന്‍ കമ്മ്യൂണിറ്റി ബിനെവൊലന്റ് ഫോറം (ഐ സി ബി എഫ്) സംഘടിപ്പിച്ച 11-ാമത് ഹാജിക്ക മെമ്മോറിയല്‍ ഉപന്യാസ രചനാ മത്സരത്തിന്റെ സമ്മാന വിതരണ ചടങ്ങ് ഐ സി ബി എഫ് കഞ്ജാണി ഹാളില്‍ സംഘടിപ്പിച്ചു.
2015 മുതല്‍ സാമൂഹിക പ്രാധാന്യമുള്ള വിഷയങ്ങളെ ആസ്പദമാക്കി ഐ സി ബി എഫ് വര്‍ഷംതോറും നടത്തിവരുന്ന ഈ മത്സരം ഈ വര്‍ഷവും വലിയ ആവേശത്തോടെയാണ് നടന്നത്. 13 ഇന്ത്യന്‍ സ്‌കൂളുകളില്‍ നിന്നുള്ള 245 വിദ്യാര്‍ഥികള്‍ മത്സരത്തില്‍ പങ്കെടുത്തു. നവംബര്‍ 21-ന് ഭവന്‍സ് പബ്ലിക് സ്‌കൂളിലാണ് മത്സരം സംഘടിപ്പിച്ചത്. മാനേജിംഗ് കമ്മിറ്റി അംഗം ഇര്‍ഫാന്‍ അന്‍സാരി നടത്തിയ സ്വാഗത പ്രസംഗത്തോടെയാണ് പരിപാടി ആരംഭിച്ചത്. തുടര്‍ന്ന് ജനറല്‍ സെക്രട്ടറി ദീപക് ഷെട്ടി മത്സരത്തെക്കുറിച്ചുള്ള വിശദീകരണം നടത്തി.
ഐ സി ബി എഫ് പ്രസിഡന്റ് ഷാനവാസ് ബാവ അധ്യക്ഷ പ്രസംഗം നടത്തി. സേവനത്തിന്റെയും സാമൂഹിക ഉത്തരവാദിത്തത്തിന്റെയും മൂല്യങ്ങള്‍ യുവമനസ്സുകളില്‍ വളര്‍ത്തേണ്ടതിന്റെ പ്രാധാന്യം അദ്ദേഹം തന്റെ പ്രസംഗത്തില്‍ ഊന്നിപ്പറഞ്ഞു.
ഇന്ത്യന്‍ എംബസിയിലെ ഫസ്റ്റ് സെക്രട്ടറിയും ഐ സി ബി എഫ് കോ-ഓര്‍ഡിനേറ്റിങ് ഓഫീസറുമായ ഐശ് സിങാള്‍ ചടങ്ങിന്റെ മുഖ്യാതിഥിയായി പങ്കെടുത്തു. ഭവന്‍സ് പബ്ലിക് സ്‌കൂള്‍ വൈസ് പ്രിന്‍സിപ്പല്‍ ധര്‍മ്മരാജ് കുമാര്‍ വിശിഷ്ട അതിഥിനായി സന്നിഹിതനായിരുന്നു.
മത്സരത്തിന്റെ മൂല്യനിര്‍ണയം നടത്തിയ പദ്മജ ഒറുഗണ്ടി, ജയശ്രീ ശ്രീധര്‍ എന്നിവര്‍ ഉപന്യാസങ്ങളുടെ നിലവാരം, വിഷയത്തിന്റെ പ്രസക്തി, ഹാജിക്കയുടെ ഉന്നത ആശയങ്ങളും പൈതൃകവും പ്രചരിപ്പിക്കുന്നതിലുള്ള ഐ സി ബി എഫിന്റെ തുടര്‍ച്ചയായ ശ്രമങ്ങള്‍ എന്നിവയെ പ്രശംസിച്ച് അഭിപ്രായങ്ങള്‍ പങ്കുവച്ചു.
പരേതനായ ഹാജിക്കയുടെ കുടുംബാംഗങ്ങള്‍, ഐ സി ബി എഫ് അഡൈ്വസറി കൗണ്‍സില്‍ ചെയര്‍മാന്‍ പ്രസാദ് ഗാര്‍, പ്രോഗ്രാം കമ്മിറ്റി ചെയര്‍മാന്‍ കെ വി ബോബന്‍, ഐ സി ബി എഫ് മുന്‍ പ്രസിഡന്റ് ഡേവിസ് എടക്കളത്തൂര്‍, അനുബന്ധ സംഘടനകളുടെ ഭാരവാഹികള്‍, സമൂഹ നേതാക്കള്‍, അധ്യാപകര്‍, വിദ്യാര്‍ഥികള്‍, രക്ഷിതാക്കള്‍ എന്നിവര്‍ ചടങ്ങില്‍ പങ്കെടുത്തു.
ഐ സി ബി എഫ് മാനേജ്‌മെന്റ് കമ്മിറ്റി സമൂഹ നേതാക്കളുടെയും സാന്നിധ്യത്തില്‍, മുഖ്യാതിഥി വിജയികള്‍ക്കും പങ്കെടുത്ത വിദ്യാര്‍ഥികള്‍ക്കും പരീക്ഷാ മേല്‍നോട്ടം വഹിച്ചവര്‍ക്കും ട്രോഫികളും സര്‍ട്ടിഫിക്കറ്റുകളും വിതരണം ചെയ്തു.
പരിപാടിയുടെ ഏകോപനം വൈസ് പ്രസിഡന്റ് റഷീദ് അഹമ്മദ് നേതൃത്വം നല്‍കി. മാനേജിംഗ് കമ്മിറ്റി അംഗങ്ങളായ മണി ഭാരതി, ശങ്കര്‍ ഗൗഡ്, നീലാംബരി, മിനി സിബി, അമര്‍വീര്‍ സിംഗ്, അഡൈ്വസറി കൗണ്‍സില്‍ അംഗം സതീഷ് വി. എന്നിവര്‍ പങ്കാളികളായി. സെക്രട്ടറി ജാഫര്‍ തയില്‍ നന്ദിപ്രസംഗം നടത്തി പരിപാടി സമാപിച്ചു.
