കോട്ടയം: ചിന്തകനും എഴുത്തുകാരനും സാമൂഹ്യ പ്രവര്ത്തകനുമായ കെ കെ കൊച്ച് അന്തരിച്ചു. 76 വയസായിരുന്നു. വാര്ധക്യസഹജമായ അസുഖത്തെ തുടര്ന്ന് കോട്ടയം മെഡിക്കല് കോളജില് ചികിത്സയിലായിരുന്നു. കോട്ടയം കല്ലറ സ്വദേശിയാണ്.
കേരളത്തിലെ ദലിത് രാഷ്ട്രീയത്തിന്റെ മുഖമായിരുന്നു അദ്ദേഹം. ‘ദലിതന്’ എന്ന ആത്മകഥ ഏറെ ശ്രദ്ധിക്കപ്പെട്ട കൃതിയാണ്. ബുദ്ധനിലേക്കുള്ള ദൂരം, ദേശീയതക്കൊരു ചരിത്രപാഠം, കേരളചരിത്രവും സാമൂഹിക രൂപീകരണവും, ഇടതുപക്ഷമില്ലാത്ത കാലം, ദലിത് പാഠം, കലാപവും സംസ്കാരവും തുടങ്ങിയവയാണ് മറ്റു കൃതികള്. 2021ല് കേരള സാഹിത്യ അക്കാദമിയുടെ സമഗ്ര സംഭാവന പുരസ്കാരം ലഭിച്ചിട്ടുണ്ട്.
