കോഴിക്കോട്: തീവ്രഹിന്ദുത്വനിലപാടുകളുടെ വിളനിലവും ന്യൂനപക്ഷങ്ങളുടെ രക്തം വീണ് കുതിര്ന്നതുമായ ഗുജറാത്ത് മാതൃക പകര്ത്തി കേരളത്തില് നടപ്പാക്കാനുള്ള നീക്കത്തിന്റെ ഭാഗമാണോ സി പി എം നിയന്ത്രിക്കുന്ന കേരള സര്ക്കാര് ഉദ്യോഗസ്ഥ സംഘത്തെ അയക്കുന്നതിന് പിന്നിലെന്ന് കെ പി സി സി പ്രസിഡന്റ് കെ സുധാകരന് എം പി പറഞ്ഞു.
കോര്പ്പറേറ്റുകളുടെ സമ്പത്തില് വന് വര്ധനവുണ്ടാവുകയും സാധാരണക്കാരുടെ ജീവിതനിലവാരം വളരെ താഴോട്ട് പോവുകയും ചെയ്യുന്നതാണ് ‘ഗുജറാത്ത് മോഡല് വികസനം’.
ബൃന്ദാകരാട്ട് ഉള്പ്പെടെയുള്ള സി പി എമ്മിന്റെ ദേശീയ നേതൃത്വം തുടര്ച്ചയായി വിമര്ശിക്കുന്ന ഗുജറാത്ത് മോഡല് വികസനം പഠിക്കാനാണ് മുഖ്യമന്ത്രി തന്റെ ഉദ്യോഗസ്ഥരെ അയക്കുന്നത്. ജനങ്ങളുടെ പ്രശ്നങ്ങളും ദുരിതങ്ങളും തിരിച്ചറിയാതെ ഒരുവിഭാഗത്തിന്റെ മാത്രം താല്പര്യം സംരക്ഷിച്ച് ഏകപക്ഷീയ തീരുമാനം അടിച്ചേല്പ്പിക്കുന്ന സമീപനമാണ് ഗുജറാത്ത് സര്ക്കാരിന്റേത്.
കെ റെയില് പദ്ധതിയുമായി മുന്നോട്ട് പോകുന്ന കേരള സര്ക്കാരിനും ഗുജറാത്ത് സര്ക്കാരിനും ഇക്കാര്യത്തില് സമാനതകള് ഏറെയാണ്. എല്ലാ മേഖലയിലും നമ്പര് വണ്ണെന്ന് കോടികള് ചെലവാക്കി പരസ്യം നല്കുന്ന മുഖ്യമന്ത്രിക്ക് ഗുജറാത്തില് നിന്ന് ഇനിയെന്ത് പഠിക്കാനാണുള്ളതെന്നും സുധാകരന് പരിഹസിച്ചു.
ബി ജെ പിയും സി പി എമ്മും തമ്മിലുള്ള ബന്ധം ഭരണതലത്തിലേക്കും വ്യാപിക്കുന്നതിന്റെ ഭാഗമാണ് ഈ സന്ദര്ശനമെന്ന് കരുതണം. മോദിയും പിണറായി വിജയനും തമ്മിലുള്ള ആത്മബന്ധമാണ് ഗുജറാത്ത് മാതൃക പഠിക്കാന് മുഖ്യമന്ത്രിയെ പ്രേരിപ്പിച്ച ഘടകമെന്നും സുധാകരന് പറഞ്ഞു.
