ദോഹ: ഉയര്‍ന്ന നിലവാരത്തിലുള്ള രോഗനിര്‍ണയവും ചികിത്സാ രീതികളുമായതിനാല്‍ ഖത്തറിലെ കിഡ്നി കാന്‍സര്‍ അതിജീവന നിരക്ക് 60 ശതമാനത്തിലെത്തി.
ഹമദ് മെഡിക്കല്‍ കോര്‍പ്പറേഷന്റെ നാഷണല്‍ സെന്റര്‍ ഫോര്‍ കാന്‍സര്‍ കെയര്‍ ആന്‍ഡ് റിസര്‍ച്ചിലെ സീനിയര്‍ കണ്‍സള്‍ട്ടന്റായ ഡോ. അബ്ദുല്‍ റഹ്മാന്‍ സര്‍ ഗുല്‍ പറയുന്നതനുസരിച്ച് ഖത്തറിലെ അതിജീവന നിരക്ക് മറ്റ് രാജ്യങ്ങളെ അപേക്ഷിച്ച് കൂടുതലാണ്.
ഖത്തറിലേതുള്‍പ്പെടെ ലോകമെമ്പാടുമുള്ള നിരവധി വ്യക്തികളെ ബാധിക്കുന്ന ഗുരുതരമായ രോഗാവസ്ഥയാണ് കിഡ്നി ക്യാന്‍സര്‍. ഖത്തറില്‍ കിഡ്നി ക്യാന്‍സറിന്റെ എണ്ണം വര്‍ഷങ്ങളായി വര്‍ധിച്ചുകൊണ്ടിരിക്കുകയാണ്. ഇത് ഇപ്പോള്‍ രാജ്യത്തെ കാന്‍സര്‍ സംബന്ധമായ മരണങ്ങളുടെ പ്രധാന കാരണങ്ങളിലൊന്നാണ്. എന്നിട്ടും മറ്റ് രാജ്യങ്ങളെ അപേക്ഷിച്ച് ഇത് കുറവാണ്.
ശരിയായ രോഗനിര്‍ണയവും ചികിത്സയും ഉപയോഗപ്പെടുത്തി ഖത്തറിലെ നിരവധി രോഗികള്‍ക്ക് രോഗത്തെ മറികടക്കാനും ആരോഗ്യകരവും ഉത്പാദനക്ഷമവുമായ ജീവിതം നയിക്കാനും കഴിയും. ഖത്തര്‍ നാഷണല്‍ കാന്‍സര്‍ രജിസ്ട്രിയുടെ ലഭ്യമായ കണക്കുകള്‍ പ്രകാരം ഖത്തരി പുരുഷന്‍മാരില്‍ ഏറ്റവും സാധാരണമായ ഏഴാമത്തെ ക്യാന്‍സറും ഖത്തരി സ്ത്രീകള്‍ക്കിടയില്‍ ഏറ്റവും സാധാരണമായ പതിനൊന്നാമതുമാണ് കിഡ്നി ക്യാന്‍സര്‍. 2011നും 2015നും ഇടയില്‍ ഖത്തറില്‍ കിഡ്നി കാന്‍സര്‍ ബാധിതരുടെ നിരക്ക് 100,000 പേര്‍ക്ക് 5.6 ആയിരുന്നു.
യു എസ് പോലുള്ള മറ്റ് രാജ്യങ്ങളുമായി താരതമ്യപ്പെടുത്തുമ്പോള്‍ ഈ നിരക്ക് താരതമ്യേന കുറവാണെന്നും അവിടെ 100,000 ആളുകള്‍ക്ക് 15 കേസുകളാണ് സംഭവിക്കുന്നതെന്നും’ ഡോ. സര്‍ ഗുല്‍ പറഞ്ഞു.
മറ്റ് രാജ്യങ്ങളിലെന്നപോലെ ഖത്തറിലും, സിടി സ്‌കാന്‍, എം ആര്‍ ഐ, അള്‍ട്രാസൗണ്ട് തുടങ്ങിയ ഇമേജിംഗ് ടെസ്റ്റുകള്‍ ഉപയോഗിച്ചാണ് മെഡിക്കല്‍ പ്രൊഫഷണലുകള്‍ വൃക്ക കാന്‍സര്‍ നിര്‍ണ്ണയിക്കുന്നത്.
