കുറ്റ്യാടി: കുന്നുമ്മല് ഉപജില്ല ശാസ്ത്രമേള അവസാനിക്കുമ്പോള് യു പി വിഭാഗം സയന്സ് വര്ക്കിങ് മോഡലില് കുറ്റ്യാടി എം ഐ യു പി സ്കൂളിന് ഒന്നാം സ്ഥാനവും എ ഗ്രേയ്ഡും.
വിദ്യാര്ഥികള് ഈ പ്രാവശ്യം പുതിയ പരീക്ഷണവുമായാണ് ശാസ്ത്രമേളയില് എത്തിയത്.
തെരുവ് നായ്ക്കളുടെ ആക്രമണത്തിലും മറ്റും വലിയ പ്രശ്നങ്ങള് നേരിടുന്ന ഈ കാലത്ത് നായ്ക്കളെ കൂട്ടിലേക്ക് ആകര്ഷിക്കുന്നു എന്നതാണ് കുട്ടികള് അവതരിപ്പിച്ച മോഡലിന്റെ പ്രത്യേകത. കൂട്ടിലെത്തിയവയ്ക്ക് മെഷീന് തന്നെ സ്വയം വാക്സിനേഷന് നല്കും.
വന്ധ്യംകരണം, പേ വിഷബാധ തുടങ്ങി ഏത് തരം വാക്സിനും ചെയ്യാന് പറ്റുന്ന തരത്തിലാണ് ഈ മെഷീന് സംവിധാനിച്ചിരിക്കുന്നത്. വാക്സിനേറ്റഡായ നായ്ക്കളെ തിരിച്ചറിയാനുള്ള സീലും ഈ മെഷീനില് ഘടിപ്പിച്ചിട്ടുണ്ട്.
വിദ്യാര്ഥികളായ നാഹിദ്, നൗഷാദ്, നൈഷ ഫാത്തിമ എന്നിവരാണ് ശാസ്ത്രമേളയില് ഈ മോഡല് അവതരിപ്പിച്ചത്. പഞ്ചായത്തിന്റെ ശ്രദ്ധയിലേക്ക് ഈ ഉപകരണം കൊണ്ടുവരണമെന്നും ഇതിന്റെ പ്രവര്ത്തനങ്ങള് കാണിച്ചു കൊടുക്കണമെന്നും വിധി കര്ത്താക്കള് വിദ്യാര്ഥികളോട് നിര്ദ്ദേശിച്ചു.
അധ്യാപകരായ അഫീഫ് കെ പി ആര്, അനുപം ജെയ്സ്, ഷിജിന സി കെ എന്നിവരുടെ മേല്നോട്ടത്തില് ആണ് കുട്ടികള് മേളയില് വേറിട്ട ഇനം അവതരിപ്പിച്ചത്.
