കൊച്ചി: നിരഞ്ജ് മണിയന്പിള്ളയെ നായകനാക്കി സാജന് ആലുംമൂട്ടില് സംവിധാനം ചെയ്ത സാമൂഹിക ആക്ഷേപഹാസ്യ ചിത്രം ‘വിവാഹ ആവാഹനം’ ഒ ടി ടി റിലീസായി. എച്ച് ആര് എന്ന ഒ ടി ടി പ്ലാറ്റ്ഫോം വഴിയാണ് ചിത്രത്തിന്റെ സ്ട്രീമിംഗ് ആരംഭിച്ചിരിക്കുന്നത്.
ചാന്ദ് സ്റ്റുഡിയോ, കാര്മിക് സ്റ്റുഡിയോസ് എന്നിവയുടെ ബാനറില് മിഥുന് ആര്. ചന്ദ്, സാജന് ആലുംമൂട്ടില് എന്നിവര് ചേര്ന്നാണ് ചിത്രം നിര്മിച്ചത്. യാഥാര്ഥ സംഭവങ്ങള് ഉള്ക്കൊള്ളിച്ച് ഒരുക്കിയ ചിത്രത്തില് പുതുമുഖ താരം നിതാരയാണ് നായിക.
അജു വര്ഗീസ്, പ്രശാന്ത് അലക്സാണ്ടര്, സുധി കോപ്പ, സാബുമോന്, സന്തോഷ് കീഴാറ്റൂര്, രാജീവ് പിള്ള, ബാലാജി ശര്മ, ഷിന്സ് ഷാന്, ഫ്രാങ്കോ, സ്മൃതി, നന്ദിനി എന്നിവരാണ് ചിത്രത്തിലെ മറ്റ് അഭിനേതാക്കള്. സോണി സി. വി, പ്രമോദ് ഗോപകുമാര് എന്നിവരാണ് ചിത്രത്തിന്റെ സഹനിര്മ്മാതാക്കള്.
സംവിധായകനോടൊപ്പം സംഗീത് സേനനും ചേര്ന്ന് സംഭാഷണങ്ങള് ഒരുക്കിയ ചിത്രത്തിന്റെ കഥ, തിരക്കഥ ഒരുക്കിയത് നിതാര ആണ്. വിഷ്ണു പ്രഭാകര് ആണ് ഛായാഗ്രഹണം. പി ആര് ഒ- പി ശിവപ്രസാദ്.
