ദോഹ: ഖത്തര് കെ എം സി സി മൊഗ്രാല്പുത്തൂര് പഞ്ചായത്ത് കമ്മിറ്റിയുടെ ആഭിമുഖ്യത്തില് ആരംഭിക്കുന്ന ‘സ്പീക്ക് ടു ദി വേള്ഡ്’ എന്ന പേരിലുള്ള സൗജന്യ സ്പോക്കണ് ഇംഗ്ലീഷ് ക്ലാസുകള് ജൂണ് ഒന്നിന് ഔപചാരികമായി ആരംഭിക്കും. വിവിധ രാജ്യങ്ങളിലായി പ്രവര്ത്തിക്കുന്ന പ്രവാസികള്ക്കും വിദേശത്ത് വിദ്യാഭ്യാസം പിന്തുടരുന്ന വിദ്യാര്ഥികള്ക്കും പൊതുജനങ്ങള്ക്കും ഇംഗ്ലീഷ് ഭാഷയിലെ പ്രാവീണ്യം നേടാന് ആഗോളതലത്തില് സംഘടിപ്പിക്കുന്ന അഭിമുഖപരമായ പഠനപദ്ധതിയാണ് ഇത്.
ഉദ്ഘാടന ചടങ്ങ് ജൂണ് 1ന് മുസ്ലിം ലീഗ് മൊഗ്രാല്പുത്തൂര് പഞ്ചായത്ത് ജനറല് സെക്രട്ടറി സിദ്ദിഖ് ബേക്കല് ഉദ്ഘാടനം ചെയ്യും. കാസറഗോഡ് ജില്ലാ കെ എം സി സി പ്രസിഡന്റ് ലുക്മാന് തളങ്കര, മുസ്ലിം യൂത്ത് ലീഗ് ജില്ലാ വൈസ് പ്രസിഡന്റ് എം എ നജീബ്, സാമൂഹ്യ പ്രവര്ത്തകന് കെ എം ഇര്ഷാദ് തുടങ്ങിയ പ്രമുഖര് ചടങ്ങില് സന്നിഹിതരായിരിക്കും.
പരിശീലന പരിപാടിയുടെ മുഖ്യ ഉദ്ദേശം മലയാളി സമൂഹം ഉള്പ്പെടെ അനേകം ജനങ്ങള്ക്ക് ആശയവിനിമയം ലളിതമാക്കി ആത്മവിശ്വാസത്തോടെ ഇംഗ്ലീഷില് സംസാരിക്കാനുള്ള കഴിവ് വളര്ത്തുകയാണ്. വിവിധ പ്രൊഫഷണല് രംഗങ്ങളിലെയും വിദ്യാഭ്യാസ മേഖലകളിലെയും പരിചയ സമ്പന്നരായ അധ്യാപകരാണ് ക്ലാസുകള് നയിക്കുക. ഓണ്ലൈന് പ്ലാറ്റ്ഫോമിലൂടെ ക്ലാസുകള് ഒരുക്കപ്പെടുന്നതിനാല് ലോകത്തിന്റെ ഏതു ഭാഗത്തുമുള്ള ആളുകള്ക്കും പങ്കെടുക്കാന് കഴിയുന്ന വിധത്തിലാണ് പദ്ധതിയുടെ രൂപകല്പ്പന.
കെ എം സി സി മൊഗ്രാല്പുത്തൂര് പഞ്ചായത്ത് കമ്മിറ്റി പ്രസിഡന്റ് അന്വര് കടവത് അധ്യക്ഷത വഹിക്കും. ജനറല് സെക്രട്ടറി അബ്ദുല് റഹിമാന് എരിയാല് സ്വാഗതം പറയും. നിലവിലെ ജോലി സ്ഥിതികളില് വളര്ച്ച പ്രതീക്ഷിക്കുന്ന പ്രവാസികള്ക്കും ഇംഗ്ലീഷിന്റെ അഭാവം മൂലം സഞ്ചാരത്തിനും പഠനത്തിനും നേരിടുന്ന ബുദ്ധിമുട്ടുകള് ഒഴിയാന് ആഗ്രഹിക്കുന്നവര്ക്കും ഏറെ ഗുണകരമായ പദ്ധതിയാണിതെന്നും അവര് പറഞ്ഞു.
രജിസ്റ്റര് ചെയ്യുന്നതിന് 00974 3343 3808, 00974 7747 9575 വാട്സ് ആപ് നമ്പറുകളില് ബന്ധപ്പെടാവുന്നതാണ്.
