ദോഹ: ഖത്തറിലെ പുനരുപയോഗ ഊര്‍ജം 2030ഓടെ 18 ശതമാനമായി ഉയര്‍ത്താന്‍ ശ്രമം. നിലവിലെ പുനരുപയോഗം മൊത്തം ഊര്‍ജ്ജ മിശ്രിതത്തിന്റെ അഞ്ച് ശതമാനമാണെന്നാണ് കണക്കാക്കുന്നത്.
കഹ്റാമയിലെ പ്രൊഡക്ഷന്‍ പ്ലാനിംഗ് ആന്‍ഡ് ബിസിനസ് ഡെവലപ്മെന്റ് ഡയറക്ടര്‍ അബ്ദുല്‍ റഹ്‌മാന്‍ ഇബ്രാഹിം അല്‍ ബേക്കര്‍ ഖത്തര്‍ വാര്‍ത്താ ഏജന്‍സിക്ക് നല്‍കിയ അഭിമുഖത്തിലാണ് ഇക്കാര്യം പറഞ്ഞത്.
ദേശീയ വികസന തന്ത്രം 2024- 2030ല്‍ പറഞ്ഞിരിക്കുന്ന ലക്ഷ്യങ്ങള്‍ കൈവരിക്കുന്നതിന് ഖത്തറിന് പുനരുപയോഗ ഊര്‍ജത്തിന്റെ നിര്‍ണായക പ്രാധാന്യത്തെക്കുറിച്ച് അല്‍ ബേക്കര്‍ ഊന്നിപ്പറഞ്ഞു. ഖത്തര്‍ നാഷണല്‍ റിന്യൂവബിള്‍ എനര്‍ജി സ്ട്രാറ്റജി, രാജ്യത്തിന്റെ സമൃദ്ധമായ പ്രകൃതി വാതക ശേഖരവും പുനരുപയോഗിക്കാവുന്ന ഊര്‍ജ്ജ സാധ്യതകളും പ്രയോജനപ്പെടുത്തി സുസ്ഥിരവും ചെലവ് കുറഞ്ഞതുമായ ഊര്‍ജ്ജ സംവിധാനം വികസിപ്പിക്കാന്‍ ലക്ഷ്യമിടുന്നു.
2030ഓടെ കേന്ദ്രീകൃത പുനരുപയോഗ ഊര്‍ജ പദ്ധതികളില്‍ നിന്ന് 4 ജിഗാവാട്ടും വിതരണ പദ്ധതികളില്‍ നിന്ന് 200 മെഗാവാട്ടും എത്തിക്കാനാണ് തന്ത്രം ലക്ഷ്യമിടുന്നതെന്ന് അല്‍ ബേക്കര്‍ എടുത്തുപറഞ്ഞു. സുസ്ഥിര നയങ്ങളിലൂടെ കാര്‍ബണ്‍ ഡൈ ഓക്സൈഡ് പുറന്തള്ളല്‍ കുറയ്ക്കുക, ഗ്രിഡ് നിലനിര്‍ത്തിക്കൊണ്ടുതന്നെ പുനരുപയോഗ ഊര്‍ജത്തിന്റെ വിഹിതം വര്‍ധിപ്പിക്കുക. പുനരുപയോഗ ഊര്‍ജ പരിപാടികളുടെ സാമൂഹികവും സാമ്പത്തികവുമായ നേട്ടങ്ങള്‍ പരമാവധിയാക്കുക എന്നിങ്ങനെയുള്ള പ്രധാന ലക്ഷ്യങ്ങളിലാണ് ഈ തന്ത്രം ശ്രദ്ധ കേന്ദ്രീകരിക്കുന്നത്.
