കൊച്ചി: പുതിയതായി അധികാരമേറ്റ മുഖ്യമന്ത്രി വി ഡി സതീശനും പുതിയ സംസ്ഥാന മന്ത്രിസഭയ്ക്കും സതേണ് ഇന്ത്യ ചേംബര് ഓഫ് കോമേഴ്സ് ആന്ഡ് ഇന്ഡസ്ട്രി (എസ് ഐ സി സി ഐ) കേരള അഭിനന്ദനങ്ങള് അറിയിച്ചു. ശക്തമായ ജനപിന്തുണയോടെ വന്ന ഈ പുതിയ സര്ക്കാര് കേരളത്തിന്റെ സാമ്പത്തിക വളര്ച്ചയ്ക്കും വ്യവസായ വികസനത്തിനും പുതിയ തൊഴിലവസരങ്ങള് സൃഷ്ടിക്കുന്നതിനും വലിയ ഊര്ജം പകരുമെന്നാണ് പ്രതീക്ഷയെന്ന് ചേംബര് ചെയര്മാന് ഡോ. തോമസ് പൗലോസ് നെച്ചുപ്പാടം പറഞ്ഞു.
കേരളത്തിന്റെ മികച്ച വിദ്യാഭ്യാസമുള്ള ജനശക്തിയും ഡിജിറ്റല് മേഖലയിലെ പുരോഗതിയും ടൂറിസം, ആരോഗ്യം, മല്സ്യബന്ധനം തുടങ്ങിയ മേഖലകളിലെ സാധ്യതകളും ഉപയോഗപ്പെടുത്തിയാല് സംസ്ഥാനത്തെ രാജ്യത്തെ മുന്നിര വിജ്ഞാന സമ്പദ്വ്യവസ്ഥയാക്കി മാറ്റാന് സാധിക്കുമെന്നും അദ്ദേഹം ചൂണ്ടിക്കാട്ടി.
കേരളത്തില് വ്യവസായങ്ങള് കൂടുതല് വളരുന്നതിനായി എളുപ്പമുള്ള ചില നിര്ദ്ദേശങ്ങളും ചേംബര് മുന്നോട്ടുവെച്ചിട്ടുണ്ട്. പുതിയ ബിസിനസുകള് തുടങ്ങുന്നതിനും അതിനുള്ള ലൈസന്സുകള് നേടിയെടുക്കുന്നതിനുമുള്ള നടപടികള് സര്ക്കാര് കൂടുതല് വേഗത്തിലാക്കണം. ചെറുകിട ഇടത്തരം സംരംഭങ്ങള്, സ്റ്റാര്ട്ടപ്പുകള്, ടൂറിസം ബിസിനസുകള് എന്നിവയ്ക്ക് സവിശേഷ പിന്തുണ നല്കണം. ആര്ട്ടിഫിഷ്യല് ഇന്റലിജന്സ്, പരിസ്ഥിതി സൗഹൃദമായ ശുദ്ധ ഊര്ജം, കൃഷിയിലെ പുതിയ സാങ്കേതികവിദ്യകള് (അഗ്രിടെക്), ആരോഗ്യ മേഖലയിലെ നവീകരണം എന്നിവയില് ശ്രദ്ധിച്ചാല് കേരളം രാജ്യത്തിന് തന്നെ മാതൃകയാകാന് കഴിയും.
ഇത്തരം വികസനങ്ങള് യാഥാര്ഥ്യമാക്കാന് വ്യവസായ മേഖലകളെ ബന്ധിപ്പിക്കുന്ന കോറിഡോറുകള്, തുറമുഖ വികസനം, യുവാക്കള്ക്കുള്ള തൊഴില് നൈപുണ്യ പരിശീലനം എന്നിവയില് കൂടുതല് നിക്ഷേപം വരണമെന്നും ചേംബര് ആവശ്യപ്പെടുന്നു. ലോകമെമ്പാടുമുള്ള പ്രവാസി മലയാളികളുടെ കൂട്ടായ്മകളെ ഉപയോഗപ്പെടുത്തി കൂടുതല് പണവും ബിസിനസ് പങ്കാളിത്തങ്ങളും കേരളത്തിലേക്ക് കൊണ്ടുവരാന് ശ്രമിക്കണം. സര്ക്കാരും വ്യവസായ മേഖലയിലുള്ളവരും തമ്മില് എപ്പോഴും നല്ല ആശയവിനിമയം ഉണ്ടാകുന്നത് പുതിയ നിക്ഷേപകര്ക്ക് വലിയ ആത്മവിശ്വാസം നല്കും.
സംസ്ഥാനത്തിന്റെ വ്യവസായ വളര്ച്ചയ്ക്കും പുതിയ സംരംഭങ്ങള് വളര്ന്നുവരുന്നതിനും സര്ക്കാരുമായി കൈകോര്ത്ത് പ്രവര്ത്തിക്കാന് സിക്കി കേരള പൂര്ണ്ണമായും സന്നദ്ധമാണെന്ന് ഡോയ നെച്ചുപ്പാടം ഉറപ്പുനല്കി.
