തിരുവനന്തപുരം: അമ്മ സംഘനടയുടെ ആഭ്യന്തര പരാതി പരിഹാര സെല് അധ്യക്ഷ സ്ഥാനത്ത് നിന്ന് ശ്വേത മേനോന് രാജിവെച്ചു. വിജയ് ബാബു കേസില് അമ്മ സ്വീകരിച്ച മൃദു സമീപനത്തില് പ്രതിഷേധിച്ചാണ് രാജി. നേരത്തെ മാലാ പാര്വതി ആഭ്യന്തര പരാതി പരിഹാര സെല് അംഗത്വം രാജിവെച്ചിരുന്നു.
വിജയ് ബാബുവിനെതിരെ നടപടി വേണമെന്ന് ശ്വേത മേനോന് ചെയര്പേഴ്സണായ ആഭ്യന്തര പരിഹാര കമ്മിറ്റി ശിപാര്ശ ചെയ്തിരുന്നു. അമ്മയിലെ എക്സിക്യൂട്ടീവ് കമ്മിറ്റി അംഗമായ വിജയ് ബാബുവിനെ സസ്പെന്ഡ് ചെയ്യുകയോ തരംതാഴ്ത്തുകയോ ചെയ്യണമെന്നായിരുന്നു കമ്മിറ്റിയുടെ ആവശ്യം.
എന്നാല് നടപടിയിലേക്ക് നീങ്ങാതെ വിജയ് ബാബു സംഘടനയ്ക്ക് നല്കിയ കത്തിന്റെ അടിസ്ഥാനത്തില് എക്സിക്യൂട്ടീവ് കമ്മിറ്റിയില് നിന്ന് ഒഴിവാക്കാന് തീരുമാനിക്കുകയായിരുന്നു. പീഡന പരാതി ഉയര്ന്നതിനെ തുടര്ന്ന് നിരപരാധിത്വം തെളിയും വരെ മാറ്റി നിര്ത്തണമെന്ന് വിജയ് ബാബു തന്നെ അമ്മയ്ക്ക് മെയില് അയച്ചിരുന്നു. ഇതേ തുടര്ന്നാണ് അമ്മ നിര്വാഹക സമിതി യോഗം തീരുമാനമെടുത്തത്. എക്സിക്യൂട്ടീവ് കമ്മിറ്റിയില് നിന്നും വിജയ് ബാബു സ്വമേധയാ മാറുന്നു എന്നാണ് അമ്മ വാര്ത്താക്കുറിപ്പ് ഇറക്കിയത്.
