കോഴിക്കോട്: സംസ്ഥാന വനിതാ വികസന കോര്പ്പറേഷന് സംസ്ഥാനത്തെ എല്ലാ ജില്ലകളിലും 18നും 55നുമിടയില് പ്രായമുള്ള വനിതകള്ക്കായി സംരംഭകത്വ വികസന പരിശീലന പരിപാടി ആരംഭിച്ചു. ആറു ദിവസം നീണ്ടുനില്ക്കുന്ന പരിപാടിയില് ആദ്യം രജിസ്റ്റര് ചെയ്യുന്ന യോഗ്യരായ 30 പേരെയാണ് തിരഞ്ഞെടുക്കുക.
സ്ത്രീകളെ സ്വയംപര്യാപ്തതയിലേക്കു നയിക്കുന്നതിനായി സംരംഭകത്വ പരിശീലനവും ധൈര്യപൂര്വം ജീവിതസാഹചര്യങ്ങളെ നേരിടുന്നതിനും സ്വയം തീരുമാനമെടുക്കുന്നതിനും സാമ്പത്തിക കാര്യങ്ങള് കൈകാര്യം ചെയ്യുന്നതിനും പ്രാപ്തരാക്കുന്ന പരിശീലന പരിപാടികളാണ് സംഘടിപ്പിക്കുന്നത്. പരിശീലനം വിജയകരമായി പൂര്ത്തിയാക്കുന്നവര്ക്ക് 1000 രൂപ സ്റ്റൈപ്പന്റ് നല്കും. മിനിമം യോഗ്യത പത്താം ക്ലാസ് പഠനം. 35നുമേല് പ്രായമുള്ള അവിവാഹിതകള്, വിവാഹമോചിതര്, അവിവാഹിതരായ അമ്മമാര്, സാമ്പത്തികമായി പിന്നോക്കവും നിലവില് തൊഴിലില്ലാത്തവര് എന്നിവര്ക്കു മുന്ഗണന നല്കും.
തൊഴിലന്വേഷകരായ വനിതകള്ക്കു സ്വന്തമായി യൂണിറ്റുകള് ആരംഭിച്ച് തൊഴിലവസരങ്ങള് സൃഷ്ടിക്കുന്നതിനും ഭാവിയില് സ്വയംപര്യാപ്തത നേടുന്നതിനും വേണ്ട സാഹചര്യം ഒരുക്കുന്നതിനുമാണ് വനിതാ വികസന കോര്പ്പറേഷന് ലക്ഷ്യമിടുന്നത്. ജില്ലകളില് ജൂണില് നടക്കുന്ന പരിശീലനത്തില് പങ്കെടുക്കാന് ആഗ്രഹിക്കുന്നവര് വെള്ളപ്പേപ്പറില് തയാറാക്കിയ അപേക്ഷ വനിതാ വികസന കോര്പ്പറേഷന്റെ തിരുവനന്തപുരം, എറണാകുളം, കോഴിക്കോട് മേഖലാ ഓഫിസുകളില് മെയ് 21നു മുമ്പായി സമര്പ്പിക്കണം. വിവരങ്ങള്ക്ക് www.kswdc.org, ഫോണ്: 0471-2454570/89.
