ദോഹ: സന്ദര്ശകരെ സ്വീകരിക്കുന്നതിനായി വികസിപ്പിച്ച 15 ബീച്ചുകളുടെ പട്ടിക മുനിസിപ്പാലിറ്റി മന്ത്രാലയം പുറത്തിറക്കി. സന്ദര്ശകരുടെ സൗകര്യാര്ഥം നിരവധി ബീച്ചുകള് നവീകരിക്കുകയും പുതിയ സേവനങ്ങള് ചേര്ക്കുകയും ചെയ്തിട്ടുണ്ട്.
വിനോദ സൗകര്യങ്ങള്, ബീച്ചുകള്, പൊതുപാര്ക്കുകള് തുടങ്ങിയവ പൂര്ണ്ണ സേവനങ്ങളോടെ ലഭ്യമാക്കുന്നതിനുള്ള മന്ത്രാലയത്തിന്റെ ബൃഹത്തായ ശ്രമങ്ങളുടെ ഭാഗമാണ് ഈ പദ്ധതി.
ഫുവാര്ട്ട് ബീച്ച്, അല് മറൂണ ബീച്ച്, അരിദ ബീച്ച്, അല് ഫെര്ക്കിയ ബീച്ച്, സിമൈസ്മ ബീച്ച്, അല് വക്ര ബീച്ച്, സീലൈന് ബീച്ച്, അല് അദായിദ് ബീച്ച്, അല് മംലാഹ ബീച്ച് (സ്ത്രീകള്ക്ക്), അല് ഘരിയ ബീച്ച്, സിക്രിത് ബീച്ച്, ദുഖാന് ബീച്ച് ഉമ്മു ബാബ് ബീച്ച്, അല് ഖറൈജ് ബീച്ച് (സിംഗിള്സിന്), സാല്വ ബീച്ച് എന്നിവയാണ് വികസിപ്പിച്ച ബീച്ചുകള്.
നവീകരണ പദ്ധതി പ്രകാരം ബീച്ചുകളില് നടപ്പാതകള്, വ്യത്യസ്ത ഡിസൈനിലുള്ള ഷേഡുകള്, സ്ഥിരം ടോയ്ലറ്റുകള്, കിയോസ്ക്കുകള്, ബാര്ബിക്യൂ ഏരിയകള്, കുട്ടികള്ക്കുള്ള കളിസ്ഥലങ്ങള്, വോളിബോള്, ഫുട്ബോള് ഗ്രൗണ്ടുകള് എന്നിവ ഒരുക്കിയിട്ടുണ്ട്.
പ്രത്യേക ആവശ്യങ്ങളുള്ള ആളുകള്ക്ക് കടലിലേക്ക് പ്രവേശനം നല്കുന്നതിനായി ചില ബീച്ചുകളില് പ്രത്യേക നടപ്പാതകളും നിര്മ്മിച്ചിട്ടുണ്ട്. മിക്കവാറും എല്ലാ ബീച്ചുകളുടെയും ലൈറ്റിംഗ് സംവിധാനം സൗരോര്ജ്ജം ഉപയോഗിച്ചാണ് പ്രവര്ത്തിക്കുന്നത്.
ബീച്ചുകള് സുരക്ഷിതമായി സൂക്ഷിക്കുന്നതിനുള്ള നിര്ദ്ദേശങ്ങളും മുനിസിപ്പാലിറ്റി മന്ത്രാലയം പുറപ്പെടുവിച്ചു.
മണലില് നേരിട്ട് തീ കൊളുത്തുന്നത് ഒഴിവാക്കാന് സന്ദര്ശകരോട് ആവശ്യപ്പെടുന്നു. ബീച്ചുകളില് നേരിട്ട് തീ ഉണ്ടാക്കുന്നത് മണലിന്റെ സ്വഭാവത്തെ ദോഷകരമായി ബാധിക്കുകയും അത് പരിസ്ഥിതിയെ ബാധിക്കുകയും ചെയ്യും.
കരി ചാരം മണലില് കുഴിച്ചിടരുതെന്നും മാലിന്യങ്ങള് നിയുക്ത മാലിന്യ പാത്രങ്ങളില് നിക്ഷേപിച്ച് ശുചിത്വം പാലിക്കണമെന്നും മന്ത്രാലയം സന്ദര്ശകരോട് നിര്ദ്ദേശിച്ചു. സുരക്ഷയ്ക്കായി കടലില് നീന്തുമ്പോള് ലൈഫ് ഗാര്ഡ് ജാക്കറ്റുകള് ധരിക്കാനും സന്ദര്ശകര് അഭ്യര്ഥിച്ചു.
ഖത്തറിലെ ഏറ്റവും പ്രശസ്തമായ ബീച്ചുകളില് ഒന്നായ മെസയിദിലെ സീലൈന് ബീച്ച് കുടുംബങ്ങള്ക്കും സുഹൃത്തുക്കളുടെ ഗ്രൂപ്പുകള്ക്കും അനുയോജ്യമാണ്. നീന്തലിന് പുറമെ ഒട്ടക സവാരി, സഫാരി ടൂറുകള്, ഡ്യൂണ് ബാഷിംഗ് എന്നിവ പോലെ വൈവിധ്യമാര്ന്ന പ്രവര്ത്തനങ്ങളും വാഗ്ദാനം ചെയ്യുന്നു. മാത്രമല്ല, സൂര്യാസ്തമയം കാണാനുള്ള ഒരു മികച്ച സ്ഥലമാണിത്.
ഖത്തറിലെ ഏറ്റവും പ്രശസ്തമായ ബീച്ചുകളില് ഒന്നാണ് അല് മറൂണ. കടല്ത്തീരത്ത് ഒരു ദിവസം ആസ്വദിക്കാന് അനുയോജ്യമാണ്. നല്ല മണലും ആഴം കുറഞ്ഞ വെള്ളവും തീര്ച്ചയായും സന്ദര്ശിക്കേണ്ട സ്ഥലമാക്കി മാറ്റുന്നു.
സിമൈസ്മ ബീച്ചില് മൃദുവായ മണലും ആഴം കുറഞ്ഞ വെള്ളവും ഉണ്ട്. ഇത് കുട്ടികളുള്ള കുടുംബങ്ങള്ക്ക് വെള്ളത്തിനരികില് ഒഴിവുസമയം ആസ്വദിക്കാന് സുരക്ഷിതമായ അന്തരീക്ഷം പ്രദാനം ചെയ്യുന്നു. ശാന്തവും വൃത്തിയുള്ളതും നീണ്ട നടത്തത്തിനും സൂര്യനു കീഴില് വിശ്രമിക്കാനും അനുയോജ്യമാണ്.
