ദോഹ: ഖത്തര്‍ ഔഖാഫ് മന്ത്രാലയം ഹിജ്‌റ 1447ലെ റമദാനിനായി നോമ്പുതുറക്കുന്നവര്‍ക്കുള്ള ഇഫ്താര്‍ പദ്ധതിക്ക് തുടക്കം കുറിച്ചു. ഗുണനിലവാരപരമായ വിപുലീകരണവും സമ്പൂര്‍ണ ഡിജിറ്റലൈസേഷനും ഉള്‍ക്കൊള്ളുന്ന പദ്ധതിയാണിത്.
2026 ജനുവരി 25 ഞായറാഴ്ച ഔഖാഫ് ജനറല്‍ ഡിപ്പാര്‍ട്ട്മെന്റില്‍ നടന്ന വാര്‍ത്താസമ്മേളനത്തിലാണ് പദ്ധതിയുടെ പ്രഖ്യാപനം നടത്തിയത്. മുതിര്‍ന്ന ഉദ്യോഗസ്ഥരും പദ്ധതി സമിതി അംഗങ്ങളും പരിപാടിയില്‍ പങ്കെടുത്തു.
നീതിയുടെയും ഭക്തിയുടെയും വഖഫ് ഫണ്ടിന്റെ കീഴിലാണ് പദ്ധതി നടപ്പാക്കുന്നത്. വിപുലമായ കേന്ദ്രങ്ങള്‍, വര്‍ധിപ്പിച്ച സേവന ശേഷി, ശക്തിപ്പെടുത്തിയ നിരീക്ഷണ സംവിധാനങ്ങള്‍, മെച്ചപ്പെടുത്തിയ സമൂഹ പങ്കാളിത്തങ്ങള്‍, തുടക്കം മുതല്‍ അവസാനം വരെ ഡിജിറ്റല്‍ മാനേജ്‌മെന്റ് എന്നിവ ഉള്‍ക്കൊള്ളുന്ന സമഗ്ര പദ്ധതിയാണിത്.
റമദാന്‍ കാലത്ത് മന്ത്രാലയം നടപ്പാക്കുന്ന പ്രധാന ചാരിറ്റബിള്‍- സാമൂഹിക സംരംഭങ്ങളിലൊന്നായ ഈ പദ്ധതി, സാമൂഹിക ഐക്യവും കരുണയും പ്രോത്സാഹിപ്പിക്കാനും, ദാനികളുടെ വഖഫ് വ്യവസ്ഥകള്‍ പാലിക്കാനും തൊഴിലാളികള്‍ക്കും ആവശ്യക്കാര്‍ക്കും മാന്യമായ മാനവിക സഹായം നല്‍കാനുമാണ് ലക്ഷ്യമിടുന്നത്.
ഈ വര്‍ഷം, ഉയര്‍ന്ന ജനസാന്ദ്രതയുള്ള താമസ മേഖലകളിലും തൊഴിലാളി മേഖലകളിലുമായി ഒമ്പത് കേന്ദ്രങ്ങളിലേക്കാണ് ഇഫ്താര്‍ ടെന്റുകളുടെ എണ്ണം വര്‍ധിപ്പിച്ചിരിക്കുന്നത്. വിശുദ്ധ മാസത്തിലുടനീളം 3.6 ലക്ഷത്തിലധികം ഭക്ഷണങ്ങള്‍ വിതരണം ചെയ്യാന്‍ കഴിയുന്ന ശേഷിയാണ് പദ്ധതിക്കുള്ളത്.
നോമ്പുതുറക്കുന്നവര്‍ക്ക് സുരക്ഷിതവും പോഷകസമൃദ്ധവും ക്രമബദ്ധവുമായ സേവനം ഉറപ്പാക്കുന്നതിനായി വിതരണം ചെയ്യുന്ന ഭക്ഷണങ്ങള്‍ അംഗീകൃത ആരോഗ്യ- പോഷക മാനദണ്ഡങ്ങള്‍ പാലിക്കുന്നതാണെന്ന് ബന്ധപ്പെട്ട അധികാരികള്‍ സ്ഥിരീകരിച്ചു.
