ന്യൂഡല്‍ഹി: ജിയോസിന്‍ക്രണസ് ഭ്രമണപഥത്തില്‍ പ്രവര്‍ത്തിക്കാന്‍ രൂപകല്‍പ്പന ചെയ്ത ഇന്ത്യയുടെ ആദ്യ ഇമേജിങ് ഉപഗ്രഹമായ ഇഒഎസ്-05 വിജയകരമായി വിക്ഷേപിച്ചു. ശ്രീഹരിക്കോട്ടയിലുള്ള സതീഷ് ധവാന്‍ ബഹിരാകാശ കേന്ദ്രത്തില്‍നിന്നാണ് ഇന്ത്യന്‍ ബഹിരാകാശ ഗവേഷണ സംഘടന ഐ എസ് ആര്‍ ഒ ഉപഗ്രഹം വിക്ഷേപിച്ചത്.
2,367 കിലോഗ്രാം ഭാരമുള്ള ഇഒഎസ്-05 മൂന്ന് ഘട്ടങ്ങളുള്ള ജി എസ് എല്‍ വി-എഫ്17 റോക്കറ്റിലാണ് വിക്ഷേപിച്ചത്.
വിക്ഷേപണം വിജയകരമായി പൂര്‍ത്തിയാക്കി ഏകദേശം 18 മിനിറ്റിന് ശേഷം റോക്കറ്റ് ഉപഗ്രഹത്തെ സബ്-ജിയോസിന്‍ക്രണസ് ട്രാന്‍സ്ഫര്‍ ഓര്‍ബിറ്റില്‍ എത്തിച്ചതായി ഐ എസ് ആര്‍ ഒ അറിയിച്ചു.
ഇന്ത്യന്‍ ഉപഭൂഖണ്ഡത്തിന്റെ വിവിധ ഭാഗങ്ങള്‍ നിരീക്ഷിക്കുകയാണ് ഇഒഎസ്-05ന്റെ പ്രധാന ദൗത്യം. വിദൂര അതിര്‍ത്തി പ്രദേശങ്ങള്‍, തന്ത്രപ്രധാന കേന്ദ്രങ്ങള്‍, ശക്തമായ കാലാവസ്ഥാ പ്രതിഭാസങ്ങള്‍, വിവിധ പാരിസ്ഥിതിക സംഭവങ്ങള്‍ എന്നിവ നിരീക്ഷിക്കുന്നതിനും ഉപഗ്രഹം ഉപയോഗിക്കും.
ദുര്‍ഗമമായ അതിര്‍ത്തി മേഖലകളിലെ സാഹചര്യങ്ങള്‍ നിരീക്ഷിക്കുന്നതിനും പ്രകൃതിദുരന്തങ്ങളും കാലാവസ്ഥാ വ്യതിയാനങ്ങളും സംബന്ധിച്ച വിവരങ്ങള്‍ ശേഖരിക്കുന്നതിനും ഉപഗ്രഹത്തിന്റെ സേവനം പ്രയോജനപ്പെടും.
ജിയോസിന്‍ക്രണസ് ഭ്രമണപഥത്തില്‍നിന്നുള്ള നിരീക്ഷണ ശേഷിയിലൂടെ രാജ്യത്തിന്റെ ഭൗമനിരീക്ഷണ സംവിധാനത്തിന് കൂടുതല്‍ ശക്തി പകരുന്നതാണ് ഇഒഎസ്-05ന്റെ വിക്ഷേപണം. പ്രതിരോധം, ദുരന്തനിവാരണം, പരിസ്ഥിതി നിരീക്ഷണം തുടങ്ങിയ മേഖലകളിലും ഉപഗ്രഹത്തില്‍നിന്നുള്ള വിവരങ്ങള്‍ നിര്‍ണായകമാകുമെന്നാണ് പ്രതീക്ഷ.
