ദോഹ: ലോക ഹൃദയ ദിനത്തോടനുബന്ധിച്ച് ഹൃദയാരോഗ്യത്തെക്കുറിച്ചുള്ള ബോധവത്കരണം ശക്തിപ്പെടുത്തുന്നതിനും പ്രതിരോധ ആരോഗ്യപരിചരണത്തിന്റെ പ്രാധാന്യം സമൂഹത്തിലേക്ക് എത്തിക്കുന്നതിനുമായി റിയാദ മെഡിക്കല്‍ സെന്റര്‍ ‘വേ ടു യുവര്‍ ഹാര്‍ട്ട്’ എന്ന ഹൃദയാരോഗ്യ ബോധവത്കരണ ക്യാമ്പയിന് തുടക്കമിട്ടു.
റിയാദ മെഡിക്കല്‍ സെന്റര്‍ മാനേജിംഗ് ഡയറക്ടര്‍ ജംഷീര്‍ ഹംസ, എക്‌സിക്യൂട്ടീവ് ഡയറക്ടര്‍ ഡോ. അബ്ദുല്‍ കലാം, കാര്‍ഡിയോളജി സ്‌പെഷ്യലിസ്റ്റ് ഡോ. ബിഷ്ണു കിരണ്‍ എന്നിവര്‍ ചേര്‍ന്നാണ് ക്യാമ്പയിന് ഔദ്യോഗികമായി ഉദ്ഘാടനം ചെയ്തത്. റിയാദ മെഡിക്കല്‍ സെന്ററിലെ ജീവനക്കാരുടെ സാന്നിധ്യത്തിലായിരുന്നു ചടങ്ങ്.
ഹൃദയ സംബന്ധമായ രോഗങ്ങളെ പ്രതിരോധിക്കുന്നതിലും നേരത്തെ തിരിച്ചറിയുന്നതിലും സമയബന്ധിതമായ ചികിത്സ ഉറപ്പാക്കുന്നതിലും പൊതുജനങ്ങളില്‍ കൂടുതല്‍ അവബോധം സൃഷ്ടിക്കുകയാണ് ‘വേ ടു യുവര്‍ ഹാര്‍ട്ട്’ ക്യാമ്പയിന്റെ പ്രധാന ലക്ഷ്യം. ഹൃദ്രോഗ സാധ്യത വര്‍ധിപ്പിക്കുന്ന വിവിധ ഘടകങ്ങളെക്കുറിച്ചും കൃത്യമായ ആരോഗ്യ പരിശോധനകളുടെ പ്രാധാന്യത്തെക്കുറിച്ചും ആരോഗ്യകരമായ ജീവിതശൈലിയുടെ ആവശ്യകതയെക്കുറിച്ചും വിദഗ്ധ മെഡിക്കല്‍ നിര്‍ദേശങ്ങള്‍ സമയബന്ധിതമായി തേടേണ്ടതിന്റെ പ്രാധാന്യത്തെക്കുറിച്ചും ക്യാമ്പയിന് ബോധവത്കരണം നല്‍കുന്നു.
നല്ല ആരോഗ്യത്തിന് ചികിത്സയ്‌ക്കൊപ്പം പ്രതിരോധവും ആരോഗ്യ ബോധവത്കരണവും പ്രധാനമാണെന്നും ‘വേ ടു യുവര്‍ ഹാര്‍ട്ട്’ ക്യാമ്പയിനിലൂടെ എല്ലാവരെയും അവരുടെ ഹൃദയാരോഗ്യത്തില്‍ കൂടുതല്‍ ശ്രദ്ധിക്കാനും ആരോഗ്യകരമായ ജീവിതശൈലി പിന്തുടരാനും പ്രോത്സാഹിപ്പിക്കുകയാണ് തങ്ങളുടെ ലക്ഷ്യമെന്നും റിയാദ മെഡിക്കല്‍ സെന്റര്‍ മാനേജിംഗ് ഡയറക്ടര്‍ ജംഷീര്‍ ഹംസ പറഞ്ഞു:
ആരോഗ്യപ്രശ്‌നങ്ങള്‍ നേരത്തെ കണ്ടെത്തുന്നതിലും മികച്ച ആരോഗ്യഫലങ്ങള്‍ ഉറപ്പാക്കുന്നതിലും പ്രതിരോധ ആരോഗ്യപരിചരണത്തിന് വലിയ പ്രാധാന്യമുണ്ടെന്നും ആരോഗ്യ ബോധവത്കരണം ശക്തിപ്പെടുത്തുന്നതിനും കൂടുതല്‍ ആളുകളിലേക്ക് പ്രതിരോധ ആരോഗ്യപരിചരണം എത്തിക്കുന്നതിനുമുള്ള റിയാദയുടെ തുടര്‍ച്ചയായ പ്രവര്‍ത്തനങ്ങളുടെ ഭാഗമാണ് ഈ ക്യാമ്പയിനെന്നും എക്‌സിക്യൂട്ടീവ് ഡയറക്ടര്‍ ഡോ. അബ്ദുല്‍ കലാം പറഞ്ഞു.
ഹൃദയാരോഗ്യവുമായി ബന്ധപ്പെട്ട പല അപകടസാധ്യതകളും നേരത്തെ തിരിച്ചറിയാന്‍ സാധിച്ചാല്‍ അവയെ ഫലപ്രദമായി നിയന്ത്രിക്കാന്‍ കഴിയുമെന്നും കൃത്യമായ ആരോഗ്യ പരിശോധനകള്‍, ആരോഗ്യകരമായ ജീവിതശൈലി, സമയബന്ധിതമായ വിദഗ്ധ മെഡിക്കല്‍ നിര്‍ദേശം എന്നിവ ഹൃദയാരോഗ്യം സംരക്ഷിക്കുന്നതിലും ഭാവിയിലെ സങ്കീര്‍ണതകള്‍ കുറയ്ക്കുന്നതിലും പ്രധാന പങ്കുവഹിക്കുന്നതായും ക്യാമ്പയിന്റെ ക്ലിനിക്കല്‍ പ്രാധാന്യം വിശദീകരിച്ചുകൊണ്ട് റിയാദ മെഡിക്കല്‍ സെന്ററിലെ കാര്‍ഡിയോളജി സ്‌പെഷ്യലിസ്റ്റ് ഡോ. ബിഷ്ണു കിരണ്‍ പറഞ്ഞു.
‘വേ ടു യുവര്‍ ഹാര്‍ട്ട്’ പോലുള്ള ആരോഗ്യ ബോധവത്കരണ പ്രവര്‍ത്തനങ്ങളിലൂടെ പ്രതിരോധ ആരോഗ്യപരിചരണത്തിനും സമൂഹകേന്ദ്രീകൃത ആരോഗ്യ പ്രവര്‍ത്തനങ്ങള്‍ക്കും കൂടുതല്‍ പ്രാധാന്യം നല്‍കുകയാണ് റിയാദ മെഡിക്കല്‍ സെന്റര്‍. ക്യാമ്പയിന്റെ ഭാഗമായി ഹൃദയാരോഗ്യവുമായി ബന്ധപ്പെട്ട വിവിധ താങ്ങാനാവുന്ന ആരോഗ്യ പരിശോധനാ പാക്കേജുകളും ലഭ്യമാക്കുന്നുണ്ട്.
ദോഹയിലെ സി-റിംഗ് റോഡില്‍ സ്ഥിതി ചെയ്യുന്ന റിയാദ മെഡിക്കല്‍ സെന്റര്‍ ജെ സി ഐ അക്രഡിറ്റഡ് മള്‍ട്ടി- സ്‌പെഷ്യാലിറ്റി മെഡിക്കല്‍ സെന്ററാണ്. 18-ലധികം സ്‌പെഷ്യാലിറ്റികളും 40-ലധികം വിദഗ്ധ ഡോക്ടര്‍മാരുമുള്ള സെന്ററില്‍ റേഡിയോളജി, ലബോറട്ടറി, ഫാര്‍മസി, ഒപ്റ്റിക്കല്‍, ഫിസിയോതെറാപ്പി തുടങ്ങി വിവിധ ആരോഗ്യ സേവനങ്ങള്‍ ലഭ്യമാണ്. എല്ലാവര്‍ക്കും മികച്ചതും താങ്ങാനാവുന്നതുമായ ആരോഗ്യപരിചരണം ലഭ്യമാക്കുകയാണ് റിയാദ മെഡിക്കല്‍ സെന്ററിന്റെ ലക്ഷ്യം.
